Экклезиаст 6 - Библи

¹ Нарата дэлхэйдэ минии хараһан муу гэхэдэ,

² юугээршье дутаангүй, эд зөөри, мүнгэ хүрэнгэ, нэрэ алдар хүндэ үгэбэшье, тэрэ бүхыгөө эзэмшэн эдлэхэ эрхые Бурхан үгэдэггүй, ондоо хүн тэрэнииень эдлэдэг байна. Энэнь дэмы хүлгөөн ба угаа зоболонтой хэрэг мүн.

³ Хүн зуун хүүгэдтэй боложо, ута наһа наһалбашье, сэдьхэлынь һайн юумэндэ садаагүй ба үхэхэдөө, ёһо руугаа хүдөөшье гаргуулаагүй байхадань «Амигүй түрэһэн хүүгэнэй хуби тэрээнһээ дээрэ» гэжэ хэлэдэг байна.

⁴ Юуб гэхэдэ, тэрэ дэмы ерээд, харанхы руу нэрэ алдаршьегүй ошоо.

⁵ Хэзээшье улаа нара үзөөгүй тэрээндэ амгалан.

⁶ Гэхэдэш, нүгөө хүн хоёр мянган жэл һуугаад, жаргал үзөөгүй байха, эсэстээ эдэ хоёр нэгэл газар руу ябадаг бэшэ юм гү?

⁷ Хүнэй бүхы хүдэлмэринь амандаа зорюулагдадаг, харин сэдьхэлынь ханаха гэжэ үгы.

⁸ Ухаатайнь тэнэгһээ юугээрээ үлүү юм бэ? Энэ наһандаа юу хэхэеэ мэдээшье һаань, үгытэй хүндэ ямар ашагтай юм бэ?

⁹ Нюдэн юу харанаб, тэрэнь сэдьхэлэй хүсэгшэһөө үлүү шухала. Энэ баһал сэдьхэлэй зоболон, һалхи намнагшатай адли.

¹⁰ Байһан бүхы юумэн нэрэтэй, хүн гээшэ ямар бэ гэжэ баһал мэдээжэ. Өөрһөө үлүү хүсэтэнтэй хүн яажа арсалдажа тэнсэхэб?

¹¹ Дэмы хүлгөө үүсхэдэг юумэн олон. Алиниинь хүндэ туһатайб даа?

¹² Һүүдэр мэтэ үнгэрдэг удхагүй амидаралай үсөөхэн үдэрнүүдтэ өөртэнь юун һайн бэ гэжэ хэн мэдэхэб? Нарата дэлхэйдэ өөрһөөнь хойшо юунэй болохые тэрээндэ хэн хэлэжэ шадахаб?