Экклезиаст 4 - Библи

Нарата юртэмсын дэмы хүлгөөн

¹ Нарата юртэмсэдэ бүхы дарлалтын үйлэ дахин дахин харабаб. Дарлуулагшадай нулимса хаража байхада, тэдэнэй һанаа заһаха хэншье олдохогүй. Дарлагшын талада хүсэн, харин дарлуулагшадые хайрлаха хэншье байхагүй.

² Тиимэһээ мүнөө хүрэтэр амиды байгшадһаа ами наһаа алдагшадай хуби үлүү дээрэ ха гэжэ ойлгобоб.

³ Нарата юртэмсэдэ үзэгдэдэг бүхы бузар үйлэ хэзээшье хараагүй, амидарал үзөөгүйдэ бүришье һайн.

⁴ Элдэб ажал ба амжалтануудынь хүнүүдэй дунда атаархал түрүүлдэг. Энэ дэмы хэрэг, һалхи намнагшатай адли.

⁵ Тэнэг хүн гараа хабсараад һуужа, мяхаяа барадаг.

⁶ Бэеэ зобоожо хоёр альгаяа тодогшоһоо нэгэ гарынь һула амаржа һуугшань дээрэ ха.

⁷ Удаань би нарата юртэмсэдэ үшөө нэгэ дэмы хүлгөө үзэбэб.

⁸ Хүн гансаардана, хажуудань хүн үгы, тэрэ хүбүүгүй, аха дүү гэжэ байхагүй. Ажалынь барагдахагүй, нюдэниинь өөрынгөө баялиг зөөридэ ханахагүй байна. «Хэнэй түлөө хүдэлнэ, һанаа сэдьхэлээ зобооно гээшэбиб?» гэһэн асуудал гарана. Энэнь мүн лэ дэмы хүлгөөн, зоболонтой ашаа болоно.

⁹ Ганса байгшаһаа хоюулан байхань дээрэ, тиигэбэл ажал үйлэнь ашагтай, харюутай байха.

¹⁰ Нэгэнэйгээ унабал, нүгөөдэнь нүхэрөө бодхоохо ушартай. Харин гансаараа байгаад унаа һаань, тэрээниие хэн бодхоохо болоноб?

¹¹ Хоюулаа суг хэбтэхэдэнь дулаан, харин гансаараа хайшан гэжэ дулаасаха болоноб?

¹² Ганса хүн диилдэхэ, хоюулан байгаа һаа, тэсэжэ шадахал. Гүрэмэл аргамжа бэлээр таһардаггүй.

¹³ Заабари хүлеэн шагнадаггүй тэнэг үбгэн хаанһаа үгытэйшье һаа, ухаатай залуунь дээрэ.

¹⁴ Тэнэг хаанай албатан соо үгытэй тэрэ түрөөшье һаа, шоронһоо мултаран гарахадаа хаан бологшо юм.

¹⁵ Наран доро ябаһан хүн бүхэнэй хажууда уг залгамжалха залуунь ябалсана гэжэ харабаб.

¹⁶ Зон гээшэ тоолошогүй олон, тэдэнэй урда амидарһан зониие тооложо болошогүй. Хожом ерэгшэдынь эртын үеынхидээ магтадаггүй. Энэ мүн лэ дэмы хооһон, һалхи намнагшатай адли.

¹⁷ Бурханай гэр тээшэ болгоомжотой алхала. Мунхаглан тахил үргэгшэһөө Һүмэ соо ошоод шагнагшань дээрэ. Хүн гээшэ буруу үйлэеэ ойлгодоггүй.