Экклезиаст 3 - Библи

Хүнэй бүхы хэрэгүүдһээ ашаг үрэ байхагүй

¹ Тэнгэри дорохи хамаг юумэн саг болзортой ба хамаг юумэн болохол сагтаа боложо байдаг:

² Үхэхэ түрэхэ саг, тариха ургуулха саг ба тариһаниие гэмтээн ходо татаха саг;

³ ами хороон алаха саг ба анагааха саг; эбдэхэ һандаргааха саг ба бодхоон бариха саг;

⁴ уйлаха муудаха саг ба энеэхэ эльгэлхэ саг; гомдохо гуниглаха саг ба хатар наада дэлгээхэ саг;

⁵ шулуу хаяха тарааха саг ба шулуу суглуулха обоолхо саг; тэбэрихэ саг ба тэбэрилгэһээ табиха саг;

⁶ бэдэрхэ олохо саг ба гээхэ хаяха саг; хадагалха гамнаха саг ба хаяха алдаха саг;

⁷ хубсаһаа удар татаха саг ба хубсаһаа хадхаха оёхо саг; анираа хатаха саг ба амалан яриха саг;

⁸ дурлаха хайрлаха саг ба үзэн ядаха саг; дайн дажарай саг ба найрамдалай саг.

⁹ Хэһэн ажалһаань хүндэ ямар туһа байнаб?

¹⁰ Бурханай зондо үгэһэн хэшээл хүдэлмэриин зоболонтойе би хараа һэм.

¹¹ Бурханай хэһэн бүхы юумэн тэрэ сагтаа һайхан байдаг, Бурханай үйлдэһэниие эхинһээнь эсэс хүрэтэр хүнүүдэй ойлгохогүйшье һаань, Тэрэ хүнүүдэй зүрхэндэ эгүүридэ мүнхые байгуулаа.

¹² Хүнэй хубида һайниие үйлэдэхэ ба баярлан бахаа ханахаһаа үлүү юумэн үгы гэжэ мэдээб.

¹³ Хүн уугаад эдеэд, ажал хүдэлмэридөө сэдьхэлээ баярлуулаад байгаа һаа, энэнь Бурханай үгэһэн юумэн гээшэ.

¹⁴ Бурханай хэһэн бүхы хэрэг мүнхэ гэжэ би мэдээб. Тэрээндэ нэмэхэ, тэрээниие хаһаха юуншье байхагүй. Бурханай хэһэн ушарынь Бурханһаа бэшэрэн һүгэдэхын тулада хэгдээ.

¹⁵ Юун байнаб, тэрэнь урданьшье байгаа, ерээдүйдэ болохошье юумэн баһал хэзээ нэгэтэ байһан лэ юумэн гээшэ. Тиигэжэ Бурхан эрмэлзэһэн юумые нэхэн һануулдаг байна.

¹⁶ Хуули шүүн шиидхэдэг газарта хуули буса ябадал, үнэн шударгын орондо ёрото муухай ушардаг гэжэ би нарата юртэмсэдэ мүн харааб.

¹⁷ «Шударга сэхэ хүниие ба гэмтэй нүгэлтэниие Бурхан лэ шүүжэ харана» гэжэ би өөртөө хэлээб, ушарынь хадаа бүхы юумэндэ саг үйлэ гэжэ байха.

¹⁸ Хүн хадаа адагуусан гэжэ харуулхаяа Бурхан хүнүүдые туршана гэжэ би өөртөө хэлээб.

¹⁹ Хүнэй табилан адагуусанай хубитай адли, адагуусанай үхэдэгтэ адли хүншье үхэнэ, али алинайнь амисхал адли, хүнэй адагуусанһаа дээрэ юумэниинь огто үгы. Ушар иимэһээ энэ хуу дэмы хооһон.

²⁰ Булта нэгэ газар руу харгытай: шоройһоо гараһан юумэн шоройдоо бусана.

²¹ Хүнэй амисхал дээшээ дэгдэжэ, адагуусанай амисхал доошоо уруудан шэнгэнэ гэжэ хэн хэлэхэб даа.

²² Тиимэһээ хэжэ байһан юумээрээ баярлахаһаа үлүү юумэн хүнэй хубида үгы гэжэ ойлгооб. Энэ хадаа табилангынь, хойшодоо юун болохыень харуулхаар хэн тэрээниие дахуулхаб даа.