Экклезиаст 12 - Библи

Бэе газарай тооһон болохо, һүлдэ Бурхандаа бусаха

¹ Хүшэр үдэрнүүд ерэжэ, амидаралай жаргал үзөөгүйб гэжэ хэлэхээр жэлнүүдэй ерэхэһээ урид шадал дундаа залуу ябахадаа, Зохёон бүтээгшые һанадаг бай.

² Һара наран, гэрэлтэ одод харанхыда унтаржа, бороогой һүүлдэ үүлэн эрьен ерэдэг.

³ Орон гэрээ хамгаалдаг байһан эрэлхэг шадалшни бууража, үсөөхэн шүдэншни үльтирүүлхэ шадалгүй болохо, сонхо руу шагаадаг нюдэдшни юумэ онигохоёо болихо.

⁴ Шэхэншни газаахи абяа шэмээе илгаруулхаяа болихо. Тээрмын абяан, басаганай дуунай аялга арай шамай дуулдадаг болохо. Үргэһэ нойроо алдажа, эрэ тахяагай донгодоходо бододог болохош.

⁵ Үгсүүр газарһаа зүрхэ алдажа, замда гарахаяа түбэгшөөдэг болохош. Үһэншни бүйлсэ модоной сэсэг мэтэ үнгэтэй болохо, бэешни даагдахаа болижо, голёо шэнги мүлхидэг болохош. Удаань мүнхэ гэртэ ошоходош гашуудалай орилоон гудамжада зэдэлхэ.

⁶ Мүнгэн утаһан таһаржа, алтан аяга хэмхэржэ, булагай хажууда домбо хахаржа, худагай хүрдэ унаха.

⁷ Газарай тооһонһоо гараһан зүйл тэндээ бусажа, һүлдэнь тэрэниие үгэһэн Бурхандаа бусаха болоно.

⁸ Хүлгөөн хөөрсэг, хамаг юумэн дэмы хүлгөөн гэжэ Багша хэлэбэ.

⁹ Багша сэсэн мэргэн байхаһаа гадна арад зондоо мэдэлгэ үгөө. Тэрэ бүгэдые туршажа шудалаад, гуримтай болгобо.

¹⁰ Багша оншотой сэсэн үгэ бэдэржэ, үнэниие байһан соонь бэшэхэ гэжэ оролдоо.

¹¹ Мэргэдэй үгэ зүүндэ ба хадаһан хадааһанда адли хаха шуу ородог, тэдэниие бэшэгшэдынь нэгэл Адуулагшаһаа гаранхай.

¹² Тэрээнһээ үлүү хэхэһээ зайла, ехэ ном зохёоходо түгэсхэл байхагүй, үлэмжэ ехээр уншахада бэедэ эсэбэритэй гэжэ һанажа ябаарайгты.

¹³ Эдэ бүгэдын удха гэбэл: Бурханһаа түбэгшөөдэг бай, Тэрэнэй захяа заабари сахидаг бай, хүндэ хабаатай бүхы юумэн тэрээн соо байха.

¹⁴ Бурхан нюусашье һаань, бүхы юумэ, һайтайнь муутайнь шүүжэ харадаг.