Экклезиаст 11 - Библи

Удхатай амидарал гээшэ юун бэ?

¹ Өөрын талхые уһанай нюруугаар хаябал, олон хоногой удаа тэрэнээ оложо болохош.

² Таряагаа долоон гү, али найман хубида хубаагаарай, дэлхэй дээрэ юунэйшье болохые мэдэхэгүйш.

³ Үүлэн бөөгнэрбэл, хура орожо магад; модон урда гү, али хойто зүг тээшэ унаа һаа, унаһан тэрэ газартаа үлэдэг.

⁴ Һалхинай зүг хараһан хүн таряа тарихагүй, үүлэ харууһалаа һаа, таряа сохижо шадахагүй.

⁵ Һалхинай шэг болон жэрмэһэн эхэнэрэй хээлидэ яһанай бүрилдэхые мэдэхэгүйтэй адли бүгэдые бүтээгшэ Бурханай хэрэгүүдые мэдэхэгүйш.

⁶ Үглөөгүүр тарихаяа гара, үдэшэлэн гараа һула бү таби, юундэб гэхэдэ, эртэ орой тариһанай алиниинь үрэжэлтэйб гэжэ ши мэдэнэгүйш, адли урагшатай байжашье магад.

⁷ Һаруул гэрэл таатай, нара харахада нюдэндэ урин.

⁸ Олон жэлдэ хүн амидархадаа ходо сэнгэлэн байг, гэбэшье оло дахин ушарха барагар үдэрнүүд тухай һанажа байг. Иигээд ерэхэдээ, бүхы юумэн ушар удхагүй болоно.

⁹ Залуу байгаа сагтаа баярлажа сэнгэ. Залуу наһанайш үдэрнүүдтэ зүрхэ сэдьхэлшни хүхюун тэнигэр байг. Сэдьхэлэй хүсэл, өөрынгөө нюдэнэй хараса дахан бай. Гэхэдээ энэ бүгэдынгөө түлөө Бурханай урда харюусаха саг ерэхэ гэжэ бү мартаарай.

¹⁰ Иимэһээ сэдьхэлэй зоболон, бэеын шаналалһаа зайлажа ябаарай. Ушарынь хадаа залуу наһан, эршэ хүсэн гээшэ ойро зуурын юм.