Экклезиаст 10 - Библи

Сэсэшүүлэй һэргылэл

¹ Үхэһэн илааһан һайхан анхилалтай тоһые үмхэй болгодогтол адли багахан тэнэг ябадал сэсэн хүнэй алдар нэрэ гутаажа болодог.

² Ухаатай хүнэй зүрхэн эзэнээ зүб тээшэнь хүтэлдэг, тэнэгэй зүрхэн буруу тээшэ дахуулдаг.

³ Тэнэг хүн гансаараа харгыда ябахадаашье урагшагүй, тэнэгынь бултанда эли байдаг.

⁴ Зонхилдог даргын шамда уурлахада, абаһаар һуурияа бү орхи. Түбшэн даруу зан буруу ябадал зайлуулдаг.

⁵ Зонхилдог удамаршын гэнэ боложо хэһэн эндүүтэй шиидхэбэри харааб.

⁶ Мунхагууд үргэмжэлэгдэн, харин баяшуул доогуур һуудаг.

⁷ Богоолой морин дээрэ һуухадань, үндэр изагууртын ябаган һалирха ушар байдаг.

⁸ Нүхэ малтагша нүхэндөө унажа магад, хана нүхэлэгшэ могойдо хадхуулжа магад.

⁹ Шулуу буталагша шулуундаа сохюулжа, түлеэ хахалагша тэрээнһээ гэмтэжэ болохо.

¹⁰ Һүхын мохоходо эрииень заһаагүй һаа, ехэ хүсэ хүсэлхэ болоно, мэргэн ухаан тэрээниие заһадаг.

¹¹ Могойн хоро бууруулха арга биишье һаа, үрдижэ хазабалнь, бүхы шадабари хэрэггүй болохо жэшээтэй. Ямаршье хурдан хэлэтэ туһалхагүй.

¹² Сэсэн мэргэнэй аманһаа гараһан үгэ абарал хайра болохо, харин тэнэгэй аман өөрыень һүнөөхэ.

¹³ Тэрэнэй яряанай эхилэл тэнэг, түгэсхэлынь балмад.

¹⁴ Тэнэг хүн олон үгэтэй. Юунэй болохые хүн мэдэхэгүй, һүүлээрнь юун болохоб гэжэ хэн тэрээндэ хэлэхэб?

¹⁵ Тэнэг хүн ажалһаа ядардаг, хото руугаа бусаха замаашье тэрэ мэдэхэгүй.

¹⁶ Хааниинь гүлмэр, түшэмэлнүүдынь үглөөнһөө эхилжэ найрладаг орон нютагта атаархахаар бэшэ.

¹⁷ Хааниинь изагуур һайтай, түшэмэлнүүдынь һогтохоо бэшэ, хүсэ орохын түлөө хоол баридаг орон нютаг дэмбэрэлтэй.

¹⁸ Залхуу хүнэй гэрэй хушалта хотойжо, дуһаа дуһахань зайлашагүй.

¹⁹ Хүнүүд найр нааданда баярлажа, үзэмэй дараһан архяар амидаралаа сэнгүүлдэг, мүнгэн бүхы юумэндэ харюу болодог.

²⁰ Ухаан соогоошье хааниие бү хараа, нойрсохо үргөөдөөшье баян тухай муу үгэ бү хэлэ. Тэнгэриин шубууд үгыеш дамжуулжа болохо, далита амитан үгыншни удха ойлгуужа магад.