Экклезиаст 1 - Библи

Оршол

¹ Энэ хадаа Багшын, Иерусалимай хаан Давидай удам болохо хүнэй хэлэһэн үгэнүүд гэхэ.

² – Хүлгөөн хөөрсэг, хамаг юумэн дэмы хүлгөөд, хөөрсэгэнөөд дүүрэхэ, – гэжэ Багша хэлэбэ.

³ Нарата үдэрэй дүүрэтэр ажалаа хэжэл байдаг хүнэй хүдэлмэриин ашаг үрэ гэжэ юун байхаб?

⁴ Үеһөө үедэ һуудаг нэгэшүүлынь ябажа, нүгөө үеынхин ерэжэл байдаг, харин дэлхэй юртэмсэ эгүүридэ оршон байдаг.

⁵ Наран мандажа дээшэлһээр, мандаһан газар руугаа яаран буудаг.

⁶ Һалхин урда зүг тээшэ үлеэжэ, хойшоо хотирон ошодог, өөрын тойрогоор дахин дахин эрьедэг.

⁷ Бүхы гол мүрэнүүд далайда шудхан ородог, гэбэшье далай хэзээдэшье эрьеһээ халима дүүрэдэггүй; уһаниинь үүлэн боложо дэгдээд, эхилһэн газар тээшээ бусажа, голнууд урасхалаа дахинаа эхилдэг.

⁸ Хамаг юумэн ажал хэшээлһээ эхитэй, ажал гээшэ ажалтай, эдэ бүгэдые хөөрөөд яалтайб, нюдэн хараһаараа хужарлахагүй, шэхэн дуулаһаараа ханахагүй.

⁹ Юун байгаал һэм, тэрэл байха болоно, юун хэгдэжэ байгаа һэм, тэрэл хэгдэжэ байха, наран доро шэнэ юумэн гэжэ үгы.

¹⁰ Ямар нэгэ юумые «Харыш, энэ шэнэ зүйл» гэжэ болодог, харин тэрэншье манһаа холо урда байһан юм.

¹¹ Урданай юумэн тухай дурсагдахагүй, дам саашадаа хожомынь болохо юумэн тухай хойто үеынхидэйнь һанаанда юуншье үлэхэгүйл.

Засаг түрэ толгойлогшын дүршэл

¹² Би, Багша, Иерусалим хотодо Израилиин хаан түрые эзэлжэ һуугаа һэм.

¹³ Тэнгэри доро үйлэдэгдэдэг бүхы юумые мэргэн ухаагаар туршан шэнжэлхэ гэжэ эрмэлзээб. Энэ хадаа Бурханай хүнүүдтэ сэдьхэл амар бэшэ байхынь тулада үгэһэн орёо бэрхэ үүргэ байгаа.

¹⁴ Би нарата дэлхэйдэ үйлэдэгдэдэг бүхы юумэ үзөөб, энэ хадаа дэмы хүлгөөн хөөрсэг, сэдьхэлэй зоболон.

¹⁵ Гажаһаниие сэхэлжэ болохогүй, үгы юумые тоолохо аргагүй.

¹⁶ «Иерусалимда намһаа урид хаан түрэ эзэлэгшэдһээ үлүү боложо, ёһото мэргэн ухаан юун гээшэб гэжэ мэдэжэ абааб» гэжэ би зосоогоо сэдьхээ һэмби.

¹⁷ Мэргэн ухаа мэдэжэ абахын хажуугаар галзуу тэнэгые таниха гэжэ бүхы бодолоо зорюулааб. Энэ баһал сэдьхэлэй ехэ зоболон гэжэ ойлгооб.

¹⁸ Юундэб гэхэдэ, мэргэн ухаанһаа зоболон ехэдэнэ, мэдэлгэ нэмэхэдээ, шаналал нэмэгдэхэ байна.