Эхин 6 - Библи

Хүнэй нүгэлтэ хэрэгүүд

¹ Түби дэлхэй дээрэ зон олошоржо эхилбэ. Басагадтай тэдэнэй болоходонь,

² хүн түрэлтэнэй басагадай сэбэр һайханиие Огторгойн хүбүүд анхаржа, дуратай басагадые шэлэн, һамга абадаг болобо.

³ Тиихэдэнь Эзэн зарлиг буулгаба: – Хүн гээшэ юрэ бусын амитан, тиимэһээ иимэ удаан тэдэниие байлгаха хэрэггүй. Энээнһээ хойшо хүнэй ами наһанай болзор, амиды ябаха, ажамидарха сагынь зуун хорин жэл болог.

⁴ Бурханай хүбүүдэй хүн түрэлтэнэй басагадтай ханилхада, тэдэнь түрэжэ, түрэһэн хүүгэдынь абарга мантан бэетэйнүүд байгаа. Тэдэ эртэ урдын нэрэ солотой баатарнууд болоно.

⁵ Түби дэлхэй дээрэ хүн зоной муу үйлэ хэдэгые, мүн тэдэнэй хүсэл һанааньшье буруу шэглэлтэй гэжэ Эзэн харахадаа,

⁶ газар дэлхэй дээрэ хүн гээшые бии болгоһондоо хара бууба. Тэрэ угаа ехээр гэмшэн,

⁷ иигэжэ айладхаба: – Би газар дэлхэйн нюрууһаа хамаг хүн зониие, тэдэнтэй хамта адуу мал, мүлхидэг амитадые, арьяатаниие, шубуудые огтолон үгы болгохоб. Эдэниие байгуулһандаа голхорноб.

⁸ Эдээн сооһоо гансал Ной Эзэнэй һанаанда тааруу, аятай байгаа бэлэй.

Нойн үнэн шударга байлга

⁹ Энэ болбол Нойн түүхэ юм. Тэрэ сагай хүн зон соо гансал Ной зүб шударга, ямаршье өө мөөгүй байгаа, Бурхантай эбтэй эетэй ажаһуугаа.

¹⁰ Тэрэ Шээм, Хаам ба Яапэт гэдэг гурбан хүбүүтэй бэлэй.

¹¹ Ииһээр Бурханай урда хүн түрэлтэн ёро муу ябадалтан боложо, алаха, һүйд хэхэ ушар хаа-хаанагүй дэлгэрбэ.

¹² Хүн бүхэн ёро муу хэрэгтэ дашуурба. Иигэжэ хүн түрэлтэн газар дэлхэйе бузарлаа һэн. Бурхан энээниие хараад,

¹³ Нойдо айладхаба: – Хүн түрэлтэн хаа-хаанагүй ёрото муу хэрэг үйлэдэнэ, тиимэһээ Би тэдэниие дууһан хюдахам.

¹⁴ Харин ши һайн шанартай бүхэ модоор абдар мэтэ онгосо өөртөө бүтээжэ, тэрээн соогоо таһалгануудые хээд, онгосынгоо газаа, досоо талые дабирхайда.

¹⁵ Тэрэшни утаашаа гурбан зуун тохой, хүндэлөөшөө табин тохой, үндэрөөрөө гушан тохой байгуужаг.

¹⁶ Ханза-онгосошни хушалта оройтой байха, хушалта ба ханануудай хоорондо нэгэ тохой зай үлөөгөөрэй. Хажуу талаһаань үүдэ хэхэш. Ханза-онгосошни гурбан дабхартай байгуужан.

¹⁷ Амиды хамагые үгы хэхэеэ Би түби дэлхэйдэ уһан галаб – асари ехэ үер буулгахаб. Энэ дэлхэй дээрэ байгаа амитан бүхыдөө хосорхо.

¹⁸ Зүгөөр Би шамтай хэлсээ баталхаб. Тиимэһээ ши ханза-онгосо руу һамгантаяа, хүбүүдтэеэ, бэреэдтэеэ хамта орохош.

^19-20 Бүхы амитадһаа – жэгүүртэ шубуудһаа, адуу малһаа, мүлхидэг ба бусад амитадһаа түрэл түрэлөөрнь – эрэ, эмые өөртөө абалсахаш. Эдэ шамтай хамта амиды үлэхэ ёһотой.

²¹ Өөртөөшье, бэшэндээшье хүрэхөөр элдэб эдеэ абахаш.

²² Бурханай зарлигые Ной дүүргэхэеэ оролдоо һэн.