Эхин 50 - Библи

¹ Иосиф эсэгынгээ толгой тэбэреэд, уйлан хайлан, таалан байба.

² Эмшэ домшонороо дуудан, Израиль эсэгынгээ шарилые занданшуулха захиралта тэрэ үгэбэ.

³ Дүшэн хоногой туршада занданшуулха ажал ябуулагдаба, удаань далан хоногой туршада Египедэй улад зон Израилиин хойноһоо гашуудаа һэн.

⁴ Уй гашуудалай үдэрнүүдэй дүүрэхэдэ, хаанай түшэмэлнүүдтэ Иосиф хандаба: – Та бүхэнэй һанаанда тааруу һаам, эзэн хаанда иигэжэ хэлыт.

⁵ Минии эсэгэ наһа барахынгаа урда тээ намһаа тангариг абаһан юм. Тэрэнэй ёһоор, би эсэгынгээ шарилые Ханаһаан ороной нэгэ хадын булаша бунханда абаашажа хүдөөлүүлхэ ёһотойб. Тэрэ булаша бунханиие эсэгэмни өөрөө бэлдэһэн юм. Эсэгэеэ хүдөөлүүлээд, бусажа ерэхэб. Минии ябахые зүбшөөгыт.

⁶ Тиихэдэнь эзэн хаан иигэжэ харюу дамжуулба: – Яба, эсэгэеэ хүдөөлүүлэ. Үгэһэн тангаригаа бэелүүлэ.

⁷ Тиигэжэ Иосиф эсэгынгээ шарил абаад, Ханаһаан орон зорибо. Египедэй хаанай бүхы түшэмэлнүүд, зүблэгшэд болон Египедэй бүхы дээдэ зиндаата зон тэрээнтэй хамта ябаба.

⁸ Тэдээнһээ гадна Иосифой бүхы гэр бүлэ, аха дүүнэр, эсэгэдэнь хамаатай бүхы түрэл гаралнууд ябалсаба. Гансал бага балшар үхибүүд, мал һүрэгынь лэ Египедэй Гоошэн нютагта үлэбэ.

⁹ Хүнгэн тэргэтэй зоной, морин сэрэгэй мүн лэ ябалсаһан ушарһаа эдэ бүгэдэ нилээд ехэ субаан болоо бэлэй.

¹⁰ Тэдэ Иордан голой зүүн талада оршодог Атаад гэдэг хүнэй таряанай тээрмэ дээрэ ерээд, дахин уйлалдаба. Иигэжэ Иосиф тэндэ долоон хоногой туршада тогтожо, эсэгынгээ хойноһоо угаа ехээр шаналан-гашуудан ёһолоо бэлэй.

¹¹ Энэ нютагта ажаһуудаг ханаһаанайхид энээниие хараад, гайхан хэлсэбэ: – Египедэй зон ямар ехээр бархиралдажа, гашуудажа байнаб! Тиимэһээ Иорданай саана оршодог энэ газарые «Египедэй зоной бархираан» гэжэ нэрлээ юм.

¹² Хүбүүдынь эсэгынгээ һүүлшын захяа дүүргээ:

¹³ шарилыень Ханаһаан орондо асаржа, Мамрээ хотын зүүн талада оршодог Махпэлаа гэдэг газарай хадын булашада абаашажа хүдөөлүүлбэ. Анхан сагта тэдэнэй үбгэ эсэгэ Абраһаам энэ газарые хээт обогой Эпроон гэдэг хүнһөө худалдан абаа бэлэй.

¹⁴ Хүдөөлүүлһэнэй һүүлээр Иосиф суг ябаһан хүн зонтоёо хамта Египет руу бусаба.

Аха дүүнэртэеэ Иосифой эблэрэлгэ

¹⁵ Эсэгынгээ наһа бараһанай һүүлээр Иосифой аха дүүнэр хоорондоо хөөрэлдэбэ: – Олон жэлэй урда тээ бидэ Иосифто муу юумэ хэһэн гээшэбди. Тиимэһээ тэрэ мүнөө маанадта муу һанажа, үһөөгөө абахаяа һанаа һаань, яахабибди?

¹⁶ Тиигэжэ тэдэ Иосифто иимэ үгэнүүдые дамжуулхыень хүниие эльгээбэ: – Наһа барахынгаа урда тээ эсэгэмнай иигэжэ захяа һэн:

¹⁷ «Урдань шамда муу юумэ хэһэн аханараа, зэмыень, тэдэнэйгээ үйлэдэһэн нүгэлыень хүлисыш даа гэжэ Иосиф хүбүүндэмни дамжуулаарайгты». Тиимэһээ эсэгымнай шүтэн зальбардаг Бурханай богоолнууд болохо маанадые хүлисыш даа гэжэ бидэ мүнөө шамайе гуйнабди. Эдэ үгэнүүдые шагнахадаа, Иосиф уйлаа һэн.

¹⁸ Аха дүүнэрынь тэрээндэ ерэжэ, урдань һүгэдэжэ мүргөөд, хэлэбэ: – Бидэ мүнөө танай богоолшье болохоор бэлэн байнабди!

¹⁹ – Бү айгты намһаа, – гэбэ Иосиф. – Би зарга шиидхэдэг Бурхан бэшэб.

²⁰ Таанад намда мууе хэхые оролдоот, зүгөөр Бурханай үршөөлөөр энэтнай дэмбэрэлтэ хэрэгээр дүүрээ: хэды олон зоной ами наһан тэрэнэй ашаар абарагдаа гээшэб!

²¹ Тиимэһээ бү айгты! Би таанадые, танай үхи хүүгэдыешье эдихэ хоолоор хангахаб. Энэ мэтэ һайн һайхан үгэнүүдые тэрэ хэлэжэ, аханарайнгаа һанаа сэдьхэл тэгшэрүүлээ бэлэй.

Иосиф наһа барана

²² Иосиф аха дүүнэртэеэ болон бүхы түрэл гаралаараа хамта иигэжэ Египедтэ амидаржа, зуун арбан наһаяа угтаба.

²³ Тэрэ түрэһэн хүбүүн Эпрааимайнгаа хүүгэдые, аша болон гушанараа, түрэһэн хүбүүн Мэнашшээ гэгшынгээ хүбүүн Махиирай хүүгэдые үзөө бэлэй.

²⁴ Наһа барахынгаа урда тээ Иосиф аха дүүнэрээ дуудаад, иигэжэ хэлэбэ: – Минии мордохо саг дүтэлжэ байна. Гэбэшье Бурхан таанадта туһалха, энэ орон нютагһаа гаргажа, үбгэ эсэгэнэрнай болохо Абраһаамда, Исаагта, Яковта үгэхөөр тангариглаһан тэрэ орон нютаг руу абаашаха.

²⁵ Тиигээд Иосиф аха дүүнэрһээ тангариг абаба: – Бурханай таанадта туһалан эндэһээ гаргажа, тэрэ орон нютаг руу зөөлгэхэдэнь, минии яһые эндэһээ тиишэнь абаашаад хүдөөлүүлхэт.

²⁶ Иигэжэ Иосиф зуун арбан наһандаа нүгшэбэ. Шарилайнь занданшуулагдаад, хайрсаг соо анжаруулһан орон Египет мүн.