Эхин 5 - Библи

Адаамай угай бэшэг

¹ Энэ болбол Адаамай угай бэшэг юм. Бурхан зониие бии болгоходоо, Өөрынгөө дүрэ үгэжэ бүтээһэн гэхэ.

² Тэрэ эрэ эмэ хоёрые бүтээгээ, «хүн» гэжэ нэрлэн, һайн һайханиие үреэгөө.

³ Адаам зуун гуша наһатай байхадаа, өөртөө ехэ адлихан хүбүүтэй боложо, тэрээндээ Шээт гэжэ нэрэ үгэбэ.

⁴ Тэрээнһээ хойшо Адаам үшөө найман зуун жэл амидархадаа, хэдэн хүбүүд, басагадтай болоо.

⁵ Иигээд юһэн зуун гушан наһатайдаа Адаам наһа бараа һэн.

⁶ Шээт зуун таба наһатай байхадаа, Эноош гэжэ хүбүүтэй болоо.

⁷ Эноошой түрэһэнэй удаа Шээт үшөө найман зуун долоон жэл амидаран, үшөө хэдэн хүбүүд, басагадтай болоо һэн.

⁸ Юһэн зуун арбан хоёр наһатай болоод, Шээт нүгшөө бэлэй.

⁹ Эноош ерэтэй байхадаа, Хэнаан гэжэ хүбүүтэй боложо,

¹⁰ тэрээнһээ хойшо найман зуун арбан табан жэл амидараад, хэдэн хүбүүд, басагадтай болоод, наһа бараа.

¹¹ Юһэн зуун табатайдаа Эноош наһа бараа.

¹² Хэнаан далатайдаа Маһалалээл гэдэг хүбүүтэй болобо.

¹³ Тэрээнһээ хойшо Хэнаан хэдэн хүүгэдтэй боложо, үшөө найман зуун дүшэн жэл ажаһуугаа.

¹⁴ Юһэн зуун арба наһатайдаа Хэнаан наһа бараа.

¹⁵ Маһалалээл жаран таба наһатайдаа Ярээд гэдэг хүбүүтэй боложо,

^16-17 тэрээнһээ хойшо найман зуун гушан жэлэй удаа найман зуун ерэн таба хүрөөд, нүгшөө. Тэрээндэ баһа олон хүүгэд байгаа юм.

¹⁸ Ярээд зуун жаран хоёр наһатай байхадаа, Эноох гэжэ хүбүүтэй боложо,

^19-20 тэрээнһээ хойшо найман зуун жэлэй удаа юһэн зуун жаран хоёр наһандаа нүгшэбэ. Тэрээндэ баһа хэдэн хүбүүд, басагад бии һэн.

²¹ Эноох жаран табатайдаа Мэтүшээлах гэжэ хүбүүтэй боложо,

²² Бурханай захяа заабари сахин ажамидараа. Тэрэ үшөө гурбан зуун жэл амидаран, хэдэн хүүгэдтэй болоо һэн.

²³ Гурбан зуун жаран табан наһатайдань

²⁴ Бурхан тэрэниие дээшэнь Өөртөө дэгдээгээ.

²⁵ Мэтүшээлах зуун наян долоотой байхадаа, Лаамэх гэжэ хүбүүтэй боложо,

^26-27 тэрээнһээ хойшо долоон зуун наян хоёр жэлэй удаа юһэн зуун жаран юһэн наһатайдаа нүгшөө. Лаамэхһээ гадна тэрэ хэдэн хүүгэдтэй байгаа.

²⁸ Лаамэх зуун наян хоёртой байхадаа, хүбүүтэй болобо.

²⁹ – Эзэнэй газарай хүрьһэ хараалда хүртөөһэн ушарһаа бидэ саг үргэлжэ хүндэ хүшэр ажалда ябанабди. Энэ хүбүүн ажалыемнай жааханааршье һаа, хүнгэлжэ магад, – гэжэ Лаамэх хэлээд, хүбүүндээ Ной гэжэ нэрэ үгэбэ.

^30-31 Нойн түрэһэнэй һүүлээр Лаамэх үшөө табан зуун ерэн табан жэл ажаһуугаад, олон хүүгэдтэй болоод, долоон зуун далан долоон наһандаа гээгдээ бэлэй.

³² Ной табан зуу наһатай байхадаа, Шээм, Хаам ба Яапэт гэдэг гурбан хүбүүтэй болоо һэн.