Эхин 39 - Библи

Иосифые жүрөөдэлгэ ба шорондо хаалга

¹ Ишмаһээл обог аймагай наймаашад Иосифые Египет руу абаашажа, богоол болгон, Египедэй фараоной түшэмэл, харуулай дарга Потипаарта худалдаһанайнь удаа

² Иосиф тэрэнэй гэртэ байжа, ажалынь хэдэг болобо. Эзэн тэрээниие анхаржа, үршөөдэг байһан ушарһаа Иосифой хэһэн ажал хододоо урагшатай, һайн бэлэй.

³ Эзэнэй туһаламжаар тэрэ залуу хүнэй хэһэн ажал бүхэниинь амжалтатай гэжэ Потипаар ажаглан хараба.

⁴ Тиимэһээ тэрэнэй һанаанда Иосиф тааруу боложо, эзэниинь Иосифые гэр байрын зонхилогшо болгоод, хамаг эдлэжэ байһан юумэеэ тэрээнэй харюусалга доро даалгаба.

⁵ Тэрэ гэһэнһээ хойшо Эзэнэй Иосифые үреэжэ эхилхэдэ, Потипаарай эд зөөри, мал һүрэгынь, таряалангуудынь, юрэдөө, бүхы юумэниинь дэлгэржэ, олошоржо эхилбэ.

⁶ Хамаг ажахыгаа эрхилхыень Иосифто найдаад, Потипаар юуншье тухай һанаагаа зобохоёо болёод, гансал эдихэ ууха ажалтай болобо. Иосиф бэеэршье, шэг шарайгааршье сэбэр гоё бэлэй.

⁷ Эзэнэйнь һамган Иосифто анхаралаа ехэтэ хандуулдаг боложо, тэрэниие ехээр хүсэһэндөө иигэжэ хэлэбэ: – Намтай унтыш даа.

⁸ Иосиф энээнһээнь эрид арсажа, иигэжэ харюусаба: – Эзэмни гэрэйнгээ бүхы юумэ намда этигэн даалгажа, өөрөө юундэшье һанаагаа зобохоёо болёо.

⁹ Энэ гэртэ намайе өөртөө адли эрхэтэй болгожо, һамганһаа бэшые минии гарта үгөө. Би эндэ юушье хэхэ эрхэтэй болоһоншье һаа, эзэнэйнгээ гэргэ эдлэжэ, намайе үргэдэг Бурханай урда нүгэл абажа, иимэ муухай хэрэг хэжэ шадахагүйб.

¹⁰ Үдэр бүри энэ эхэнэр Иосифые үгэдөө оруулхаяа оролдобо, зүгөөр Иосиф тэрээнтэй унтахаяа огто арсадаг һэн.

¹¹ Теэд нэгэтэ гэртэ хүнэй үгыдэ Иосифой ажалаа хэхэеэ тиишээ ороходонь,

¹² эзэнэйнь һамган хубсаһандань аһажа, дахин хэлэбэ: – Намтай хэбтыш. Харин Иосиф гадар хубсаһаяа тэрэнэй гарта орхёод, гэрһээ гүйжэ гараба.

¹³ Иосифой гадар хубсаһанай гартань үлэһые Потипаарай һамган хараад,

¹⁴ гэрэйнгээ зарасанарые дуудаба: – Харагты, үбгэнэймни асарһан тэрэ еврей маанадые доромжолжо байна! Гэртэмнай орожо, намайе хүсөөрөө эдлэхэ гэжэ һэдэхэдэнь, би шангаар хашхарааб.

¹⁵ Һүхирхэ бархирхадамни тэрэ сошоод, хубсаһаяашье орхижо, хаяжа байгаад, гэрһээ гүйжэ гараба!

¹⁶ Тиигээд тэрэ эхэнэр үбгэнэйнгөө ерэтэр Иосифой хубсаһа хадагалба.

¹⁷ Потипаарай ерэхэдэнь, һамганиинь үнөөхи хэлээшэеэ дабтаба: – Шинии асарһан тэрэ еврей богоол манайда орожо, намайе хүсөөрөө эдлэхээр аашалаа.

¹⁸ Харин минии хашхархада, гадар хубсаһаяа эндэ хаяад, тэрьедээ.

¹⁹ Һамганайнгаа хэлэхые дуулахадаа, Иосифой эзэн Потипаар ехэ уурлан сухалдажа,

²⁰ Иосифые түрмэ шороной оёорто хаяба. Тэрэ түрмэ шорондо Египедэй фараоной захиралтаар орогшо зон байдаг бэлэй.

²¹ Зүгөөр Эзэн тэндэшье тэрээнтэй байлсажа, үршөөл хайраяа элирхэйлбэ. Тиимэһээ түрмэ шороной ноёной һанаанда Иосиф тааруу болобо.

²² Тэрэ ноён хаагдаһан зониие хаража, түрмын бүхы ажал ударидаха ажал Иосифто даалгаба.

²³ Иосифой ямаршье ажал хэхэдэнь, Эзэн тэрээнтэй хамта байжа, үршөөдэг ушарһаа ажалынь урагшатай байжа, түрмэ шороной ноён Иосифто хамаг ажалаа даалгаад, өөрөө юундэшье оролсохоёо болибо.