Эхин 38 - Библи

Иуда Тамаар хоёр

¹ Тэрэ сагта Иуда аха дүүнэрээ орхин, уруудажа, Адуллаам хотын Хираа гэжэ нэрэтэй нэгэ хүнтэй хүршэ боложо байрлаба.

² Тэндэ байхадаа Иуда Ханаһаан яһатан Шуһаа гэдэг нэгэ хүнэй басага хаража, һамга абаба.

³ Тэрэнь хээлитэй боложо, хүбүү түрэбэ. Иуда тэрээндээ Ээр гэжэ нэрэ үгэбэ.

⁴ Һамганиинь дахин хээлитэй боложо, хоёрдохи хүбүү түрэбэ, тэрээндээ Онаан гэжэ нэрэ үгэбэ.

⁵ Удаань Иудын һамгантаяа Хэзиибтэ байха үедэ һамганиинь гурбадахи хүбүүгээ түрэжэ, Шэлаа гэжэ нэрэ үгэбэ.

⁶ Иуда ууган хүбүүн Ээрэй томо болоходонь, Тамаар гэдэг басага һамга абажа үгэбэ.

⁷ Зүгөөр ууган хүбүүн Ээртэнь Эзэн дурагүй бэлэй, тиимэһээ Эзэн Ээрые усадхаба.

⁸ Тэрэ үеын заншалай ёһоор, үхи хүүгэдгүй хүнэй наһа барабал, дүүниинь наһа барагша ахынгаа һамга абажа, гал гуламтыень унтаруулдаггүй бэлэй. Тиимэһээ Иуда хоёрдохи хүбүүн Онаанда иигэжэ хэлэбэ: – Ши наһа бараһан ахынгаа һамган Тамаарда ошожо, гэрлээд, ахынгаа гал гуламтые саашань үргэлжэлүүлэ.

⁹ Зүгөөр Тамаарай түрөө һаань, үхибүүниинь тэрэнэй бэшэ, наһа бараһан ахынь гэжэ тоологдохо ёһотойдо Онаан эбсэхэгүй байжа, Тамаартай унтаха бүридөө тэрэниие хээлитэй болгохогүйн тула үрэ һалайгаа газарта адхаруулдаг һэн.

¹⁰ Иимэ ябадалда Эзэн Бурхан дурагүй байгаа, тиимэһээ тэрэнэй түлөө Тэрэ Онааниие хорообо.

¹¹ Тэрэнэй удаа Иуда Тамаарта иигэжэ хэлэбэ: – Минии хүбүүн Шэлаа үшөө бэеэ хүсөөдүй байна, ехэ болоторынь эсэгынгээ гэртэ бусаад, бэлбэһэн эхэнэр мэтээр ажаһуулши. Харин Иуда үнэхөөр Тамаарые Шэлаада үгэхэ дурагүй байгаа. Тамаартай гэрлэжэ, Шэлаа аханартаа адляар мүн лэ Эзэн Бурханда шиидхүүлэгдэжэ, алуулна аа гү гэжэ тэрэ айһан байгаа. Тиигээд Тамаар түрхэмдөө бусаа һэн.

¹² Хэдэн жэлэй үнгэрһэнэй удаа Шуһаа гэдэг хүнэй басаган болохо Иудын һамган наһа бараба. Гашуудаха сагай дүүрэһэнэй һүүлээр Иуда өөрын анда нүхэр Адуллаам хотын Хираатай хамта Тимнаа хотын хажуугаар бэлшэжэ байһан хонин һүрэгтөө нооһыень хайшалхаяа ошоо бэлэй.

¹³ Хадам абамни хонидойнгоо нооһо хайшалхаяа Тимнаа зорибо гэжэ дуулаһан Тамаар

¹⁴ үбгэеэ алдаһан эхэнэрнүүдэй үмдэдэг хубсаһаяа һэлгээд, нюураа нэмэргээр бүглөөд, Тимнаа ошодог харгыда байдаг Энааһим хотын хэрэмэй бартаануудай хажууда ошожо һууба. Шэлаагай бэеэ хүсөөшье һаань, Иуда тэрэниие өөртэйнь гэрлүүлхэ дурагүй гээшые Тамаар ойлгоһон байгаа.

^15-16 Иуда харгы зам дээрэ һуужа байһан эхэнэрые хараашье һаа, танибагүй. Нюурынь нэмэргээр бүглөөтэй байхадань, янхан эхэнэр гэжэ һанаа. Тиимэһээ тэрэ эхэнэртэ эрьежэ, иигэжэ хэлэбэ: – Танайда ошожо, хамта унтая. – Тиигээ һаа, та намда юу үгэхэбта? – гэжэ Тамаар асууба.

¹⁷ – Би шамда эшэгэ эльгээхэб, – гэжэ Иуда харюусаба. – Зай, тиигэбэл, тэрэнээ эльгээхэ гэһэнэй бариса болгон, намда нэгэ юумэ орхигты, – гэбэ Тамаар.

¹⁸ – Ямар юумэ бариса болгон үгэхэбиб? – гэжэ Иуда асууба. – Хүзүүндээ зүүһэн тамгаяа ооһортойнь, гартаа байһан тулгуураа намда үлөөгты, – гэжэ Тамаар харюусаба. Иуда эриһэн юумыень тэрэ эхэнэртэ үгөөд, тэдэнэйдэ ошожо, хамта унтаба. Тамаар хээлитэй болоһоноо удангүй ойлгобо.

¹⁹ Тэрэ нюураа бүглэһэн нэмэргэеэ тайлаад, бэлбэһэн эхэнэрэй хубсаһа дахин үмдэбэ.

²⁰ Иудын эшэгэ эльгээжэ, бариса болгожо үлөөһэн юумэеэ тэхэрюулхэеэ Адуллаам хотын Хираа нүхэрөө ябуулхадань, тэрэнь хэды шэнээн бэдэрээшье һаа, эхэнэрые олобогүй.

²¹ Тиигээд тэндэхи зонһоо тэрэ асууба: – Энааһим хотодо харгын хажууда һуугааша янхан эхэнэр хаана гээшэб? Зүгөөр тэдэ: – Тэндэ ямаршье янхан эхэнэр һуугаагүйл, – гэжэ харюусаба.

²² Нүхэрынь бусажа ерээд, Иудада хэлэбэ: – Би тэрэниие олоогүйб. Харин нютагай зон тэндэ ямаршье янхан эхэнэр үгы һэн гэжэ хэлэнэл.

²³ Иуда харюусаа һэн: – Тэрэниие олохо гэжэ оролдобол, амитанай наадан болохо жэшээтэй байна. Үгэхэ гэһэн эшэгэеэ шамаар эльгээһэн ушарһаам тэрэ эхэнэрые мэхэлээ гэжэ намайе хэншье буруу болгохогүй.

²⁴ Гурбан һарын үнгэрөөд байхада, Иудада зон дуулгаба: – Танай бэри Тамаар янхан мэтэ һальхайраад, тэрээнһээ байтагай хээлитэй болоод байна. – Тэрэниие гэрһээнь шэрэжэ гаргаад, олоной урда галдаха хэрэгтэй, – гэжэ Иуда харюусаба.

²⁵ Зүгөөр зоной Тамаарые гэрһээнь шэрэжэ гаргаха гэхэдэ, тэрэ хадам эсэгэдэм иигэжэ хэлыт гэбэ: – Намайе хээлитэй болгоһон хүн намда хүзүүндээ зүүжэ ябаһан ооһортой тамга, тулгуураа орхёод ошоо һэн. Тэрэ юумэнүүдыень танда эльгээнэб. Хэнэй зөөри гээшэб гэжэ та элирүүлхэ гүт?

²⁶ Иуда өөрынгөө тамга, тулгуур тэрэ дары танижа, иигэжэ хэлэбэ: – Би ехэ зэмэтэйб, бурууб. Шэлаа хүбүүндээ һамган болгожо тэрэниие үгөөгүй ушарһаа тэрэнэй урда мянга дахин бурууб. Тэрээнһээ хойшо Иуда Тамаартай унтаагүй бэлэй.

²⁷ Тамаарай нарайлха сагай ерэхэдэ, умай соонь хоёр эхир үхибүүнэй байһаниинь мэдэгдэбэ.

²⁸ Хүүгэдэйнь нэгэнэй гаража эхилхэдэ, нэн түрүүн гарынь бултайба. Хүйһэ хүндэжэ байгша эхэнэр гартань улаан утаһа уяжа, иигэжэ хэлэбэ: – Энэ хүүгэн ахань болоно.

²⁹ Зүгөөр нялха гараа һөөргэнь татажа абаба, нүгөө хүүгэниинь гаража ерэбэ. Тиихэдэнь хүйһэ хүндэгшэ тэрээндэ хандан, иигэжэ хэлэбэ: – Ши хайшан гээд һэтэ гараабши? Тиигээд тэрээндэ «Пээрэц», оршуулбал, «Һэтэлэгшэ» гэжэ нэрэ үгтэбэ.

³⁰ Хойноһоонь гартаа улаан утаһатай хүбүүн гараба. Тэрээндэ «Зээрах», оршуулбал, «Шад улаан», гэһэн нэрэ үгтэбэ.