Эхин 36 - Библи

Эсаавай үри һадаһад

¹ Энэ хадаа Эсаавай, ондоогоор тэрэниие нэрлэбэл, Эдоомой угай бэшэг юм.

² Эсаав Ханаһаан орон нютагһаа һамгадые абаа. Хээт яһатан Элооной Адаае, хиив яһатан Цибэһооной хүбүүн Анаагай басаган Оһолибамаае,

³ мүн Ишмаһээлэй басаган Басэмаадые тэрэ һамган болгон абаа юм. Басэмаадай аха Нэбайһоот бэлэй.

⁴ Эсаав Адааһаа Элипааз, Басэмаадһаа Рэүһээл,

⁵ мүн Оһолибамааһаа Еһүүш, Ялаам ба Коорах хүбүүдтэй болобо. Эдэ Эсаавай хүбүүд Ханаһаанда түрэһэн болоно.

⁶ Һамгадаа, хүбүүд басагадаа бултыень, хамаг албата зоноо мүн адуу малаа дууһыень, Ханаһаанда байхадаа олоһон бүхы эд зөөриеэ абаад, Эсаав дүүһээ холодон, ондоо орон дайда нүүжэ ошобо.

⁷ Ушар гэхэдэ, тэдэ хоёр тус бүридөө угаа олон мал адууһатай боложо, зэргэлээд ажамидархадань, бэлшээри, уһан хүртэхөө болиһон юм.

⁸ Эсаав Эдоом ороной Сэһиир гэдэг хада уулата нютаг ерэжэ һуурижаба.

⁹ Эсаавай уг удам «эдоом» гэдэг нэрэтэй үндэһэ яһатан болобо. Тэдэ Сэһиир орон дайдын хадалиг газараар байрладаг болоо һэн.

¹⁰ Эсаавай хүбүүд: Адааһаа гараһан Элипааз, Басэмаадһаа түрэһэн Рэүһээл.

¹¹ Элипаазай хүбүүд: Тэмаан, Омаар, Цэпоо, Гатаам, Кэнааз.

¹² Элипаазай Тимнаа гэдэг бага эхэнэрһээ хүбүүн түрэжэ, тэрэниие Амалээг гэжэ нэрлэбэ. Эсаав Адаа хоёрой уг удамынь эдэл болоно.

¹³ Эсаав Басэмаат хоёрһоо түрэһэн хүбүүн Рэүһээл. Рэүһээлэй хүбүүд: Наахат, Зээрах, Шаммаа, Миззаа гэгшэд.

¹⁴ Эсаав Цибэһооной Анаагай басаган Оһолибамааһаа Еһүүш, Ялаам ба Коорах гэдэг гурбан хүбүүдтэй болоо бэлэй.

^15-16 Эсаав Адаа хоёрһоо түрэһэн ууган хүбүүн Элипаазай хүбүүд Тэмаан, Омаар, Цэпоо, Кэнааз, Коорах, Гатаам, Амалээг өөр өөрын обог аймаг бүрилдүүлжэ, эхи табигшадынь болоо һэн. Тэдэ бултадаа Эдоом орон дайдада ажамидардаг бэлэй.

¹⁷ Эсаав Басэмаат хоёрһоо түрэһэн хүбүүн Рэүһээлэй хүбүүд Наахат, Зээрах, Шаммаа, Миззаа гэгшэд мүн лэ тус тустаа обог аймаг бүрилдүүлжэ, эхи табигшадынь болоо. Эдэнэрэй обог зониинь мүн лэ Эдоомдо ажаһуудаг һэн.

¹⁸ Эсаав Цибэһооной Анаагай басаган Оһолибамаа хоёрһоо түрэһэн хүбүүдынь Еһүүш, Ялаам, Коорах гэгшэд мүн лэ гурбан обог аймагай эхи табяа һэн.

¹⁹ Иигэжэ Эсаавай уг удам обог аймагайнгаа эхи табигшад болоһон байна. Иигэжэ Эдоом улас түрэ бии болоһон түүхэтэй.

²⁰ Эсаавай Сэһиир, үгышье һаа, Эдоом орон дайда руу ошохын урда тээ Хории яһатан Сэһиир гэдэг хүнэй үри һадаһад болохо Лотаан, Шобаал, Цибэһоон, Анаа,

²¹ Дишоон, Ээцэр, Дишаан гэгшэд Эдоомой газар нютагта ажаһуудаг, Сэһиирэй уг удам болохо хории обог аймагай эхи табигшад болоһон байгаа.

²² Лотаанай хүбүүд: Хории, Һэмаам. Лотаанай эгэшэ Тимнаа бэлэй.

²³ Сэһиирэй Шобаалай хүбүүд Алваан, Манаахат, Гэбаал, Шэпоо ба Онаам болоно.

²⁴ Сэһиирэй Цибэһоон хадаа Айяа ба Анаа гэжэ хоёр хүбүүдтэй, Анааниинь Цибэһоон эсэгынгээ элжэгэнүүдые адуулжа ябахадаа, хээрэ халуун аршаан олоһон түүхэтэй.

²⁵ Анаа Дишоон гэжэ хүбүүтэй, Оһолибамаа гэжэ басагатай болоо һэн. Тэрэ басаганиинь Эсаавта хадамда гараһан түүхэтэй.

²⁶ Анаагай Дишоон Хэмдаан, Эшбаан, Итраан ба Хэраан гэдэг дүрбэн хүбүүдтэй болоо бэлэй.

²⁷ Ээцэрэй хүбүүд Билһаан, Зааваан ба Акаан.

²⁸ Дишаанай хүбүүд: Ууц ба Араан.

²⁹ Иигэжэ хории яһатан Сэһиирэй уг удам болохо Лотаан, Шобаал, Цибэһоон, Анаа,

³⁰ Дишоон, Ээцэр, Дишаан гэгшэд Сэһиир орон дайдын тэрэ олон обог аймагуудай эхи табигшад болоо бэлэй.

³¹ Израильшуудай хаантай болоодүй байха үедэ Эдоом орондо өөһэдын хаашуул байһан юм.

³² Бэһоорой хүбүүн Бээла Эдоомой эртэ урдын хаан байгаа, Динһабаа хотодо ажаһуугаа.

³³ Бээлын наһа бараһан хойно Боцраа хотын Зээрахай Ёваав хаан шэрээдэ һуугаа бэлэй.

³⁴ Ёваавай наһа бараһанай һүүлээр Тэмаан ороной Хушаам хаан шэрээ эзэлбэ.

³⁵ Хушаамай наһа барахада, Авиит хотын Бэдаадай хүбүүн Һадаад хаан шэрээдэ һууба. Моһааб нютагта дайнай болоходо, мидиан обог аймагые хюдагша тэрэ үнөөхи Һадаад бэлэй.

³⁶ Һадаадай наһа барахада, Масрэкаа хотын Самлаа хаан болоо һэн.

³⁷ Самлаагай наһа барахада, Евфрат мүрэнэй эрьедэхи Рэхобоот хотын Саул хаан шэрээдэ һууба.

³⁸ Саулай наһа бараһанай удаа Ахбоорой хүбүүн Бааһал-Ханаан хаан болобо.

³⁹ Ахбоорой хүбүүн Бааһал-Ханаанай наһа барахада, Пааһу хотын Һадаар хаан шэрээдэ һууба. Һадаар Мэһэтэбээл гэдэг басага һамга абаа бэлэй. Тэрэ Матрээдэй басаган һэн. Матрээд Мэзаһаабай хүбүүн бэлэй.

⁴⁰ Эсаавай удамһаа мүн лэ олон угууд бии болоо. Тэдэниие нэрлэбэл, Тимнаа уг, Алваа уг, Етээт уг,

⁴¹ Оһолибамаа уг, Элаа уг, Пиноон уг,

⁴² Кэнааз уг, Тэмаан уг, Мибцаар уг,

⁴³ Магдиһээл уг, Ираам уг. Эдоомой угууд эдэ бэлэй. Тэдэ Эдоомой орон дайдада өөһэдын мэдэлэй газартай боложо, һуурижаһан ушарһаань газар нютагынь тэдэнэй нэрээр нэрлэгдээ бэлэй. Эдоом уласай эдэ бүхы угууд Эсаавһаа үдэн гараһан түүхэтэй.