Эхин 32 - Библи

Яков Эсаав ахатайгаа уулзахада бэлдэнэ

¹ Яковай эсэгынгээ орон нютаг руу шэглэн ябаха замдань хэдэн Эльгээмэлнүүд тэрээнтэй ушарба.

² Тэдэниие хараад, Яков иигэжэ хэлэбэ: – Энэ Бурханай бууса байра гээшэ. Тиигээд тэрэ газараа «Маханааим», оршуулбал, «Хоёр бууса» гэжэ нэрлэбэ.

³ Энэ үедэ Дабһата далайн урда талада оршодог Эдоом ороной Сэһиир гэдэг газарта ажаһуугша Эсаав ахадаа Яков хэдэн хүнүүдые эльгээжэ,

⁴ иигэжэ дуулгахыень захирба: – Танай богоол болохо Яков мүнөө хүрэтэр Лаваанайда ажаһуужа байгаа.

⁵ Мүнөө намда буха, элжэгэ, хонин һүрэг, эрэ, эмэ зарасануудшье бии. Танай һанаанда тааруу болохын тула энэ мэдээ элшэдээр эльгэнэб.

⁶ Эльгээгшэдынь Эсаавтай уулзаад бусахадаа, Яковта иигэжэ хэлэбэ: – Эсаав ахатайтнай уулзаабди. Тэрэ урдаһаатнай дүрбэн зуун хүнтэй хамта наашаа ерэжэ ябана.

⁷ Яков айхабтар ехээр айба. Тиигээд тэрэ өөрынгөө зониие, адуу малаа, тэмээнүүдээ хоёр бүлэг болгон хубаажа,

⁸ «Хэрбэеэ Эсаав нэгэ бүлэгтэ добтолжо усадхаа гээшэ һаань, нүгөө бүлэг зугадажа шадахадаа болохо» гэжэ бодобо.

⁹ Тиигээд Яков Эзэн Бурханда мүргэн зальбарба: – Үбгэ эсэгэ Абраһаамай, минии эсэгэ Исаагай Эзэн Бурхан! «Түрэһэн нютагаа, түрэл сададаа ши буса. Тэндэ шамда һайн һайханиие Би үгэхэб» гэжэ Та намда айладаа бэлэйлта.

¹⁰ Танай богоол би хамаг үршөөл хайраһаатнай, хэшэгһээтнай хүртэхэ эрхэтэй гээшэ гүб? Түрэл нютагһаа гаража, Иордан гол гаталхадаа, би гартаа гансахан тулгууртай ябаа бэлэйб. Мүнөө бусажа ябахадаа, хоёр бүлэг болгон хубаарилһан олон зонтой, үй түмэн адуу малтай ябанаб.

¹¹ Маанадые минии аха Эсаавһаа абарыт! Би айнаб: тэрэ ерэжэ, намайе, һамгад, хүүгэдыемни бултыень алахал!

¹² Та намда һайн һайханиие хүргэжэ, уг удамыем далайн эрьеын элһэн мэтэ тоо томшогүй болгохоб гэжэ айладаа бэлэйлта. Тэрэ үгэеэ һанажа, намда туһалыт!

¹³ Яков тэндээ хоноод, Эсаавта бариха бэлэг бэлдэжэ,

¹⁴ хоёр зуун ямаа, хорин тэхэ, хоёр зуун хони, хорин хуса,

¹⁵ ботоготой гушан энги, дүшэн үнеэ, арбан буха, хорин эмэ, арбан эрэ элжэгэ илгаба.

¹⁶ Тиигээд энэ малаа түрэл түрэлөөрнь илган, хэдэн һүрэг болгоод, тус бүрииень нэгэ нэгэ зарасада даалгажа, иигэжэ хэлэбэ: – Таанад минии урда ороод ябагты! Һүрэг бүхэнэй хоорондо зай баряад туугты!

¹⁷ Эгээл урид ябаһан һүрэг туугша зарасадаа Яков иигэжэ захирба: – Минии аха Эсаавтай уулзахадашни, тэрэ шамһаа: «Хэнэй зараса гээшэбши? Хайшаа зоринош? Хэнэй мал туунаш?» – гэжэ һурахадань,

¹⁸ иигэжэ харюусахаш: «Энэ танай дүү, үнэн сэхэ богоол Яковайтнай мал. Эдэ бүгэдые дүүтнай танда бэлэг болгон үгэнэ. Эзэмнай хойноһоомнай ерэжэ ябана».

¹⁹ Хоёрдохи, гурбадахи болон бусад һүрэг туужа ябааша зарасанарта адли эдэ үгэнүүдые хэлэхыень заажа үгөөд, – Таанад Эсаавтай уулзахадаа,

²⁰ «Танай үнэншэ зараса Яков маанадай хойноһоо ерэжэ ябана» гэжэ заабол хэлээрэйгты, – гэбэ. «Хэрбээ Эсаав ахадаа уридшалан иимэ олон бэлэг үгөө һаам, сэдьхэлынь зөөлэржэ, намтай уулзажа магадгүй» гэжэ Яков досоогоо бодоһон байгаа.

²¹ Бэлэг болохо малаа туулгажа эльгээгээд, Яков өөрөө тэрэ һууридаа дахин хонохоёо үлэбэ.

²² Гэбэшье тэрэл һүни Яков Лэһаа, Рахээл һамгадаа, Зилпаа, Билһаа гэдэг хоёр зараса эхэнэрнүүдээ, арбан нэгэн хүүгэдээ абаад, Яббоок голые гарасаар гаталан гараба.

²³ Удаань тэрэ бүхы зөөри хогшолоо, мал һүрэгөө голой саана гаргаба.

²⁴ Тиигээд Яков һөөргөө голоо гаталан, хуушан газартаа ерэжэ, гансаараа үлэбэ. Һүниндөө танигдаагүй хэн нэгэн Яковта ерэжэ, үүр сайтар тэрээнтэй барилдаба.

²⁵ Яковые диилэхэгүй байһанаа Тэрэ ойлгоод, Яковай ташаагай яһанай үеһөөнь гаратар сохибо.

²⁶ Тиигээд Тэрэ Яковта хэлэбэ: – Намайе таби, үүр сайхаяа байна. – Намай үреэгөөгүйдэтнай табихагүйб, – гэбэ Яков.

²⁷ – Шинии нэрэ хэн бэ? – гэжэ Тэрэ асууба. – Яков, – гэбэ тэрэ.

²⁸ Тиихэдэнь Тэрэ хэлэбэ: – Энээнһээ хойшо шинии нэрэ «Яков» бэшэ болохо. Ши хүнтэй барилдажа, илаад, удаань Бурхантай барилдажа диилэһэн хадаш шамда «Израиль», оршуулбал, «Эзэн Бурхантай барилдагша» гэдэг нэрэ үгтэбэ.

²⁹ – Өөрынгөө нэрэ намда хэлыт! – гэжэ Яковай гуйхада, – Ши Минии нэрэ мэдээд яаха гээбши? – гэжэ Тэрэнь харюусаад, үреэл табяад, ошобо.

³⁰ – Бурхантай нюураараа уулзаһан аад, амиды мэндэ үлэһэмни гайхалтай, – гэжэ Яков хэлээд, тэрэ газарые «Пэнүһээл», оршуулбал, «Бурханай нюур» гэжэ нэрлэбэ.

³¹ Наран гараба. Яков Пэнүһээлһээ ошоходоо, ташаа яһанайнгаа үеһөөн гараһанай ушарһаа дохолжо ябаа бэлэй.

³² Мүнөө болотор израильшууд ташаа гуяын мяха юундэ эдидэггүйб гэбэл, Яковай тэрэ газарайнь үе мүсэ булгалуулагдаһанһаа болоно.