Эхин 22 - Библи

Бурханда Абраһаамай үнэн сэхэ байлга

¹ Энэ болоһон ушарай удаа Бурхан Абраһаамые туршахаяа шиидэжэ дуудахадань, Абраһаам: – Би энэ байнаб! – гэбэ.

² Тиихэдэнь Бурхан айладхал буулгаба: – Ори ганса хайрата Исаак хүбүүгээ абаад, Мориһаа нютаг руу ошо. Тэндэ ошоходош, Би шамда нэгэ хада заажа үгэхэб. Тэрэ хада өөдэ гараад, хүбүүгээ Намда түгэс шатаалта үргэл болгон тахи.

³ Үглөөдэрынь Абраһаам эртэ бодожо, элжэгэеэ унаад, хоёр залуу зарасые, мүн Исаак хүбүүгээ абаад, түгэс шатаалта үргэл хэхын тула түлеэ бэлдээд, Бурханай зааһан газар зорибо.

⁴ Аян замдаа хоноһоор гурбадахи хоногтоо Абраһаам тэрэ газар дайдые холоһоо обёорбо.

⁵ – Эндээ үлэжэ, элжэгэнүүдээ харан байгты, – гэжэ тэрэ зарасануудтаа хэлэбэ. – Бидэ хүбүүнтэеэ хоюулан тиишээ ошожо, Бурхандаа мүргөөд бусахабди.

⁶ Түгэс шатаалта үргэлэй гал дэгжүүлхэ түлеэгээ Абраһаам Исаагайнгаа мүр дээрэ ашаба. Һүүлээрнь хэтэ сахюур, хутага абаад, хада өөдэ тэдэ хоюулханаа зорибо.

⁷ Ябажа ябахадаа Исаагай: – Аба-аа! – гэжэ ооголходо, Абраһаам: – Зай, хүбүүмни, юуб? – гэбэ. – Хэтэ сахюуршье, түлеэншье манда бии, зүгөөр түгэс шатаалта үргэлэй хурьган хаанаб? – гэжэ хүбүүниинь асууба.

⁸ – Хүбүүмни! Бурхан түгэс шатаалта үргэлэй хурьгые Өөрөө хаража олохо, – гээ бэлэй Абраһаам. Тиигээд тэдэ хоюулаа саашалба.

⁹ Бурханай заагша газар хүрөөд, Абраһаам тэндэ шулуугаар үргэлэй шэрээ барижа, дээрэнь түлеэ табяад, Исаак хүбүүгээ ооһороор хүлижэ, түлеэн дээрэ хэбтүүлбэ.

¹⁰ Тиигээд хүбүүгээ алахаяа хутагаяа тэрэнэй далайхадань,

¹¹ Эзэнэй Эльгээмэл огторгойһоо ооголбо: – Абраһаам! Абраһаам! – Биб! – гэжэ тэрэ харюусаба.

¹² – Тэрээндээ гар бү хүрэ! – гэжэ Эльгээмэл айладаба. – Боли! Хайрата ганса хүбүүгээ Намда үргэхэһөө татагалзаагүй байһан дээрэһээш Намайе хүндэлдэг гэжэ Би мэдэбэб.

¹³ Абраһаам толгойгоо үргэхэдөө, һөөг бургааһанда эбэрээрээ тээгэлдэһэн хуса гэнтэ обёорбо. Тэрээндэ ошоод, хусые хүбүүнэйнгээ орондо түгэс шатаалта үргэл болгон тэрэ үргэбэ.

¹⁴ Эзэнэй иигэжэ хуса үгэһэн ушарһаа Абраһаам тэрэ газарые «Эзэн хэрэгтэй зүйл үгэдэг» гэжэ нэрлэбэ. Мүнөөшье болотор «тахилгатай уула дээрэ хэрэгтэй юумээр Эзэн хангажа үгэдэг» гэһэн яряа үгэ бии юм.

¹⁵ Эльгээмэл огторгойһоо Абраһаамда хоёрдохиёо хандаба:

¹⁶ – Эзэн иигэжэ айладхана: «Би шамда Өөрын нэрээр тангаригланаб. Ори ганса хүбүүгээ хайрлангүй Намда үргэхөөр бэлэн байһанайш түлөө

¹⁷ Би шамайе буян хэшэгтээ хүртөөхэб! Огторгойн одо мүшэд, далайн эрьеын элһэн мэтэ тоолошогүй олон үри һадаһадые шамда хайрлахаб. Шинии үри һадаһад дайсадаа даража, газар уһыень эзэлэн абаха.

¹⁸ Минии үгые дуулаһанайш түлөө шинии уг удамаар дамжан, бүхы дэлхэйн арад зон Минии үреэл хайрада хүртэхэ».

¹⁹ Энээнэй удаа Абраһаам хүбүүнтэеэ хамта хоёр залуу зарасанартаа бусажа, Бэһээр-Шээбэ нютагаа хариба. Абраһаам иишэ-тиишээ нүүжэ ябахаяа болижо, Бэһээр-Шээбэдэ удаан сагта ажаһуугаа бэлэй.

Нахоорой үри һадаһад

²⁰ Хэдэн сагай үнгэрһэн хойно Абраһаамда иимэ мэдээн дуулдаба: – Танай аха Нахоорой һамган Милкаа олон хүбүүдые түрөө.

²¹ Ууган хүбүүн Ууц, тэрэнэй дүү Бүүз, Кэмүһээл (һүүлдэнь Араам гэжэ хүбүүтэй болоо һэн),

²² Хээсэд, Хазоо, Пилдааш, Идлаап болон Бэтүһээл гэгшэд хүбүүдынь болоно.

²³ Һүүлдэнь Бэтүһээл гэрлэжэ, Рэбээккаа гэжэ басагатай болоо һэн. Абраһаамай аха Нахоорто эдэ найман хүбүүдые Милкаа түрэжэ үгөө.

²⁴ Нахоор Реумаа гэжэ нэрэтэй нэгэ бага һамгантай байгаа. Тэрэнь Нахоорто Тээбаа, Гаахам, Таахаш ба Маһахаа гэжэ дүрбэн хүбүүдые түрөө бэлэй.