Эхин 20 - Библи

Абраһаам һамгантаяа ба Абимээлэх

¹ Абраһаам урагшаа нүүжэ, Кадээш ба Шүүр хотонуудай хоорондо тогтон байһанаа Гэраар хотын дэргэдэ һуурижаба.

² Тэрэ нютагай зонһоо айжа, Сарра һамгаяа дүү басагамни гэжэ хэлэһэн ушарһаань Гэраарай хаан Абимээлэх Саррые бага хатан болгохоор ордондоо асаруулба.

³ Зүгөөр нэгэтэ һүни зүүдэн соонь Бурхан үзэгдэжэ, Абимээлэхтэ иигэжэ айладхаба: – Энэ эхэнэрые абаһанайнгаа түлөө ши үхэхэш. Тэрэшни үбгэнтэй.

⁴ Харин Абимээлэх Саррые ордондоо асаруулһаншье һаа, тэрээнтэй унтажа үрдеэдүй байгаа. Тиимэһээ тэрэ Эзэниие иигэжэ гуйба: – Эзэмни! Гэмгүй намайе болон минии зониие Та усадхаха гээшэ гүт?

⁵ Тэрэ хүн өөрөө намда энэ эхэнэрые дүү басагамни гэжэ хэлээ юм. Эхэнэр өөрөө мүн лэ тиигэжэ хэлээ! Бэе болон сэдьхэлээрээ би ямаршье муу үйлэ хээгүйлби.

⁶ – Тиимэ, зүб, – гэжэ зүүдэн соонь Бурхан үгүүлбэ. – Ши гэмгүйш. Тиимэһээ Би энэ эхэнэрые эдлэхэ арга шэнээ шамда үгөөгүйб. Минии урда нүгэлтэй байха хэрэгһээшни зайлуулааб.

⁷ Зүгөөр ши мүнөө тэрэниие үбгэндэнь бусаа. Тэрэшни лүндэншэ хүн, шинии амиды үлэхын тула уншалга хэхэ, тиихэдэнь Би шамайе амиды мэндэ үлөөхэб. Хэрбээ тэрэниие үбгэндэнь бусаагаагүй һаа, өөрөөшье, шинии хамаг угшье хосорхо!

⁸ Үглөө үглөөгүүр Абимээлэх түшэмэлнүүдээ дуудан, зүүдэеэ хөөрэбэ. Тэдэ ехэ мэгдэбэ.

⁹ Удаань Абимээлэх Абраһаамые дуудажа асараад: – Та маанадые яажа байна гээшэбта? Ямар юумээр би таниие гомдохоогообиб, юундэ намайе, хаан түрыем иимэ нүгэл руу түлхибэт?

¹⁰ Юундэ иигээбта? – гэжэ зэмэлбэ.

¹¹ Абраһаам харюусаба: – Энэ нютагай зон Бурханһаа айдаг гэжэ мэдэхэгүй ушарһаа би һамганайм түлөө намайе алаха гэжэ һанааб. Энэ нэгэ талаһаа.

¹² Нүгөө талаһаа харабал, һамгамни нээрээ дүүмни юм. Тэрэ эсэгымни басаган, гансал ондоо эхэһээ гараһан. Тиигээд минии һамган болоһон юм.

¹³ Зүгөөр эсэгынгээ гэрһээ гаража, аянда гара гэжэ Бурханай эльгээхэдэ, би һамгандаа иигэжэ хэлээ һэм: «Хаанашье ябаа һаа, ерэһэн газартаа намайе ахамни гэжэ байхыеш гуйнаб. Тэрэ хадаа шинии намда үзүүлһэн энэрэл хайра болохо».

¹⁴ Абимээлэх Абраһаамда Сарра һамгыень бусаажа үгэхэдөө, хэдэн хони, үхэр, эрэ, эхэнэр зарасанарые бэлэглэбэ.

¹⁵ Тиигээд Абимээлэх Абраһаамда иигэжэ хэлэбэ: – Зай, минии газар дайда танай урда. Дуратай газартаа ошожо байрлагты.

¹⁶ Саррада тэрэ хэлэбэ: – Таниие ордондоо асаруулһан гэм зэмээ сагааруулхын тула би ахадатнай эндэ байһан олон зоной нюдэн дээрэ мянган шээкэл сагаан мүнгэ үгэнэб.

^17-18 Тиигээд Абраһаам Абимээлэхэй түлөө Бурханиие гуйжа, мүргэн зальбарба. Тиихэдэнь Абимээлэхэй бэень урдынхиһаа үлүү энхэ элүүр болобо. Абраһаамай һамган Саррые ордондоо оруулһан ушарһаань Абимээлэхэй хатаниие, шэбэгшэнэрыень Эзэн үрэгүй болгожо, тэдэ хээлитэй болохоёо болиһон юм. Харин Абраһаамай гуйхада, Эзэн тэдэниие дахин үрэтэй болгожо, тэдэ үхи хүүгэдые түрэжэ эхилбэ.