Эхин 2 - Библи

¹ Иигэжэ оршолон юртэмсэ болон амитай, амигүй байгаали бүтээгдэһэн гээшэ.

² Долоодохи үдэр болоходо, Бурхан ажалаа дүүргэжэ, хэжэ байгаа бүхы ажалнуудһаа долоодохи үдэртөө Тэрэ амарба ха.

³ Бурхан долоодохи үдэрые үреэжэ, тусхай нангин үдэр гээд тодорхойлбо, юундэб гэхэдэ, энэ үдэр хэжэ байһан ажалһаа Тэрэ амараа: бүтээлгэ байгуулгын хэрэг түгэсөө.

⁴ Иимэл даа, оршолон юртэмсын байгуулагдаһан түүхэ. Эзэн Бурханай газар дэлхэй болон огторгой бүтээхэдэнь,

Эдээмэй сэсэрлиг

⁵ газар дээрэ нэгэшье һөөг бургааһан, нэгэшье ногоон үгы һэн. Эзэн Бурхан газарта бороо оруулаагүй мүн баһа таряа тариха хүн гэдэгые бии болгоодүй байгаа.

⁶ Гансал гүн гүнзэгыһөө нэбтэрэн гаража байгаа уурал газарые шиигтүүлжэ байгаа.

⁷ Тиигээд Эзэн Бурхан хүниие газарай шоройһоо бии болгожо, хамар руунь амидаралай амисхал үлеэжэ оруулба. Хүн амитан боложо амидырба.

⁸ Эзэн Бурхан зүүн зүгтэхи Эдээм гэдэгтэ сэсэрлиг һуулган таряад, тэндээ Өөрынгөө бии болгоһон хүн гэдэгые байрлуулба.

⁹ Энэ сэсэрлиг соогоо Эзэн Бурхан харахада аятай, эдихэдэ амтатай жэмэстэ мододые ургуулба. Сэсэрлигэй дунда ажамидарал үршөөдэг модон, тиихэдэ һайн, мууе ойлгохо болгодог эрдэмэй модон һуулгагдаба.

¹⁰ Эдээмэй сэсэрлигээр гол урдажа, тэрэниие уһална, саашалхадаа, дүрбэн һалаа гол болон урдана.

¹¹ Тэдэ голойнь нэгэн Пишоон гэгдэдэг, алтатай Хавилаа гэжэ нютаг ороноор урдана.

¹² Тэрэ газар орондо сэбэр алтан, гүгэл болон мана шулуун байна.

¹³ Хоёрдохи голынь Гихоон гэжэ нэрэтэй, Күүш гэжэ орон дайдые тойрон урдана.

¹⁴ Гурбадахи голынь Тигр, Ассириһээ зүүн тээшэ урдана. Дүрбэдэхи голынь – Евфрат.

¹⁵ Эдээмэй сэсэрлиг һэргээн харууһалжа байхыень Эзэн Бурхан хүниие тэндэ байрлуулаад,

¹⁶ иимэ захяа хүндэ үгэбэ: – Энэ сэсэрлигэй ямаршье алим жэмэс эдихэдэш болохо.

¹⁷ Зүгөөр һайн муугай илгаае мэдэрүүлдэг модоной жэмэсэй ойронь хүрэжэ болохогүй. Тэрэниие оройдоо бү эди. Эдеэ һаа, тэрэл үдэртөө үхэхэш.

¹⁸ Тиигээд Эзэн Бурхан: – Хүнэй гансаараа байхань муу. Өөртэнь таараха хани бии болгохомни, – гэжэ айладхан шиидэбэ.

¹⁹ Тиигээд Тэрэ газар шоройһоо элдэб түрэлэй хээрын ан гүрөөл, огторгойн янза бүриин шубуудые бии болгоод, тэдээндэ хүн ямар нэрэ үгэгшэ ааб гэжэ мэдэхэеэ ойронь асарба. Иигэжэ амиды голтой бүхэн нэрэтэй болобо.

²⁰ Хүн адуу мал, ангуудта болон жэгүүртэ шубуудта тус тустань нэрэ олгобо, зүгөөр тэдээн сооһоо өөртэнь таараха хани олдобогүй.

²¹ Тиихэдэнь Эзэн Бурхан хүниие гүнзэгы нойроор унтуулаад, нэгэ хабһыень абажа, шархыень юушьегүй болоторынь эдэгээгээд,

²² тэрэ хабһаараа эхэнэрые бүтээбэ. Тиигээд тэрэнээ хүндэ асарба.

²³ Хүн тэрэниие хараад: – Зай, энэ минии яһанһаа таһарһан яһан, мяханһаам таһарһан мяхан. Эрэ намһаа абтаһан энэ хүн эхэнэр гэжэ нэрэтэй болог, – гэбэ.

²⁴ Эгээл иимэһээ эрэ хүн эхэ эсэгэеэ орхёод, һамгантайгаа нэгэдэхэ, тиин хоёр хүн нэгэн бэе болон эблэрхэ ушартай.

²⁵ Хүн мүн тэрэнэй һамган хоюулаа шараа нюсэгэнүүд байгаа, зүгөөр эшэхэ гээшые мэдэдэггүйнүүд бэлэй.