Эхин 19 - Библи

Лоодой, Содом ба Гоморрын хуби заяан

¹ Тэнгэриин хоёр Эльгээмэл тэрэ үдэшэ Содом хото ерэбэ. Тэрэ үедэ Абраһаамай дүүгэй хүбүүн Лоот хотые хүреэлһэн үндэр хэрэм ханын үүдэнэй хажууда һуугаа. Аяншадые харамсаараа тэрэ һууриһаа бодожо, доро дохин хэлэбэ:

² – Хүндэтэ айлшад, мэндээ! Аян замтнай амгалан гү? Хайраараа орхингүй, минии, танай богоолой, гэртэ орыт. Манайда хонолго табижа, хүлөө угаажа амараад, эдеэ хоол барихыетнай уринаб. Тиигээд үглөөгүүр аян замдаа гарана бэзэт. – Үгы, – гэжэ тэдэ харюусаба. – Танайда орожо, түбэг ушараажа байһамнай үлүү. Бидэнэй газаашье хоноходо болохо.

³ Зүгөөр Лоот тэдэниие ехэл гуйба, тиихэдэнь тэдэ зүбшөөжэ, Лоот гэгшын гэртэ ошобо. Лоот тэдээндэ эдеэ хоол бэлдэжэ, хилээмэ барижа хүндэлбэ.

⁴ Унтарида ороодүй байхадань, Содом хотын үбгэн, залуугүй бүхы эрэшүүл Лоодой гэрые бүһэлжэ зогсоод,

⁵ тэрэниие дуудан: – Танайда үдэшэ ерэһэн зон хаанаб? Наашань тэдэниие гарга! Одоо бидэ зоргоороо тэдэниие эдлэхэбди! – гэжэ хашхаралдаба.

⁶ Лоот өөрөө тэдээндэ гараад, гэрэйнгээ үүдэ нюргаараа тулан,

⁷ хэлэбэ: – Нүхэдни, иимэ муухай үйлэ бү хыт!

⁸ Эрэ хүниие үшөө үзөөгүй хоёр басагад намда бии. Эдэ үхидөө таанадта үгэнэлби, юушье тэдэнтэй хэгты, зүгөөр минии гэртэ орогшодой ойро бү хүрэгты!

⁹ – Тонило! – гэжэ тэдэ һүхирэлдэбэд. – Хэн аад, маанадые захирха болообши? Бидэ шамтай энээнһээ дороор аашалхабди! Тэдэнэр Лоодые түлхин, гэрэйнь үүдэ эбдэхээр дугташалдаба.

¹⁰ Гэртэ байһан хоёр тэдэ айлшад үүдэ онгойлгон, Лоодые досоошонь татажа оруулаад, үүдэ хаажархиба.

¹¹ Харин газаа байгша бүхы эрэшүүлые, ехэ багагүй, бултыень харахагүй һохор болгобо. Хэдышье оролдоо һаа, тэдэнэр үүдэ оложо шадахагүй болобо.

¹² Айлшад Лоодто: – Энэ хотодо шинии гэхэ үшөө хэд бииб? Хүрьгэд, хүбүүд, басагад болон үшөө түрэл гаралаа бултыень эндэһээ дахуулан гарга!

¹³ Эзэн энэ хотын зоной бузар муухай аашанууд тушаа дуулаһан ушарһаа маанадые эльгээжэ, хотые үгы хэхэ даабари үгөө, – гэжэ хэлэбэ.

¹⁴ Лоот ошожо, басагадтайнь гэрлэхэ заяатай хүбүүдтэ хэлэбэ: – Дары түргэн энэ хотоһоо гаража ошогты! Эзэн энэ хотые үгы хэхэнь! Теэд тэдэ Лоот шоглон наадаба гэжэ һанаба.

¹⁵ Үүр сайжа эхилбэ. Эльгээмэлнүүд Лоодые яаруулба: – Һамгаяа, хоёр басагадаа абаад бушуу яба! Үгы һаа, энэ нүгэл шэбэл шэнгээһэн хото балгааһантай хамта хосорхош!

¹⁶ Зүгөөр Лоот яаха гээшэб гэжэ бодолгото болон удаарба, хүдэлбэгүй. Эзэнэй Лоодые хайрлаһан ушарһаа тэдэ хоёр Эльгээмэлнүүд Лоодые, тэрэнэй һамга болон хоёр басагадыень гарһаань хүтэлэн, хотоһоо гаргаба.

¹⁷ Тиигээд тэдэ Эльгээмэлнүүдэй нэгэн Лоодой гэр бүлэдэ хандажа: – Амиды үлэхэ гэбэл, эндэһээ түргэн тэрьедэгты! Гэдэргээ эрьежэ бү харагты, талада ошожо зогсожо бү байгты! Хада өөдэ түргөөр гарагты! Үгы бол, таанад хосорхот! – гэжэ захирба.

¹⁸ Теэд Лоот: – Эзэмни! Би тэндэ ошожо шадахагүйб.

¹⁹ Һанаандатнай намайе тааруу гэжэ тоолон, таанад намайе энэрэн хайрлажа, ами наһыем абаржа, һайе хэһэншье һаатнай, би тэрэ холын хада уула руу хүрэжэ үрдихэгүйлби. Тэндэ хүрэхым урда тээ аймшагтай гай тодхор намайе хүсэхэ, хосорхолби!

²⁰ Тээ тэрэ багахан хото байна. Тиишээ би гүйһүүлби, үсөөхэн зонтой тэндэ би амиды мэндэ үлэһүүлби, – гэжэ гуйба.

²¹ – Зай, тиигэ, – гэбэ Эльгээмэл. – Таанадай хүрэжэ ошотор бидэ тэрэ хотые усадхангүй байхабди.

²² Зүгөөр ехэ яаралтай тиишээ гүйхэ хэрэгтэй. Таанадай тэндэ хүрөөдүйдэ бидэ хэрэгээ эхилхэ аргагүйбди. Энэ хото бага байһанһаа «Цооһар», оршуулбал, «Бишыхан» гэжэ нэрлэгдэнхэй.

²³ Наранай мандажа байха үедэ Лоот Цооһар хотодо хүрэбэ.

Содом ба Гоморро хотонуудай һүнэлгэ

²⁴ Гэнтэ Эзэн бусалжа байһан хүхэр огторгойн орьёлһоо аадар мэтэ Содом ба Гоморро хотонууд руу адхажа,

²⁵ тэдэ хоёр хотые, оршон тойронхи газар, ажаһуугша хүн зониие, хамаг ургасые үгы хэбэ.

²⁶ Лоодой һамган үбгэнэйнгөө арада ябаһанаа гэдэргээ эрьен харахадаа, тэрэ дары дабһан бахана болон зогсошобо.

²⁷ Нүгөөдэ үглөөгүүрнь Абраһаам эртэ бодожо, Эзэнтэй хөөрэлдэжэ байһан газартаа ерээд,

²⁸ Содом ба Гоморро хотонуудай байһан тала газарые шэртэн хараба: хаа-хаанагүй үнэһэн согһоо үдхэн хара утаан бааян һуунагтажа байба.

²⁹ Энэ тала дайдын хото һууринуудые үгы хэхэдээ, Бурхан Абраһаамые һанаандаа оруулжа, Лоодые абараа.

Моһааб болон аммоон яһатанай уг гарбал

³⁰ Лоот Цооһар тосхондо удаан ажаһуухаяа айжа, хоёр басагадаа абаад, хада уулада гаража, агы нүхэн соо байрлаба.

³¹ Нэгэ үдэр ехэ басаганиинь дүүдээ хэлэбэ: – Эсэгэмнай үтэлжэ үбгэржэ байна, дахин гэрлэхэгүйнь лабтай. Харин эндэ ши бидэ хоёрто ямар эрэ хүн олдохоб даа?

³² Эсэгэеэ архяар һогтоогоод, тэрээнтэеэ унтая. Тиигэбэл, эсэгынгээ уг удамые үргэлжэлүүлхэбди.

³³ Дүүнь зүбшөөжэ, һүни болоходо, тэдэ эсэгэдээ үзэмэй дараһан архи уулгажа һогтообо. Эгэшэнь ерэжэ, эсэгэтэеэ унтаба, харин тэрэнь шал һогтуу соогоо юуншье боложо байһые ойлгобогүй – хайшан гэжэ унтахаяа ерэһыеньшье, яагаад ошоһыеньшье.

³⁴ Үглөөдэр эгэшэнь дүүдээ хэлэбэ: – Үнгэрэгшэ һүни би эсэгэтэеэ унтааб. Энэ һүни эсэгэеэ дахин үзэмэй дараһан архи уулгажа һогтоое, ши ерэжэ, тэрээнтэй унтахаш. Тиигэбэл, бидэ эсэгынгээ уг удамые үргэлжэлүүлхэбди.

³⁵ Дахинаа тэдэ эсэгэдээ үзэмэй дараһан архи уулгажа һогтообо. Бага басаганиинь ерэжэ, эсэгэтэеэ унтаба, харин тэрэнь юун боложо байһые ойлгоогүй – хайшан гэжэ тэрэнэй хэбтэһыень, яагаад, хэдыдээ ошоһыеньшье.

³⁶ Тиигэжэ Лоодой хоёр басагад эсэгэһээ хээлитэй болоо һэн.

³⁷ Эгэшэнь хүбүү түрөөд, тэрэнээ Моһааб гэжэ нэрлэбэ. Тэрэнь моһааб обог зоной элинсэг эсэгэ болоно.

³⁸ Дүү басаганиинь баһа хүбүү түрөөд, тэрэнээ Бэн-Аммии гэжэ нэрлэбэ. Тэрэ аммоон обог зоной элинсэг эсэгэ болоно.