Эхин 17 - Библи

Бурхан Абрамые хүбүүтэй болохош гэжэ найдуулна

¹ Абрамай ерэн юһэтэй байхада, Эзэн тэрээндэ дахин үзэгдэжэ, иигэжэ айладхаба: – Би Түгэс Хүсэтэ Бурхамби. Минии үгөөр ябажа, зэмэгүй арюун ажаһуугаарай.

² Би шамтай хэлсээ баталхаб, тиигээд олоной олон үри һадаһадые шамда бэлэглэхэб.

³ Абрам газар мүргэн һүгэдэбэ. Бурхан тэрээндэ хандан, үгэеэ үргэлжэлүүлбэ:

⁴ – Мүнөө Би шамтай хэлсээ баталжа, үнэр олон арад зоной эхи табигша элинсэг эсэгэ болгохоб.

⁵ Тиигээд шинии нэрэ Абрам бэшэ, харин «Абраһаам» болохо, юуб гэбэл, Би шамайе үнэр олон арад зоной элинсэг эсэгэ болгооб.

⁶ Шинии угые олошоруулан үнэржүүлхэб, зариманиинь хаан шэрээ эзэлхэ, олон арадууд шамһаа уг гарбалтай болохо.

⁷ Би энэ хэлсээ шамтай баталаад, шинии хойто үе удамтай мүн лэ баталнаб. Энэ хэлсээн хадаа үеын үедэ хүсэн түгэлдэр байха. Хэлсээнэй ёһоор, та бүгэдэнэй хүндэлхэ, шүтэхэ Бурхан гэбэл, Бил болохоб!

⁸ Нүүжэ амидаржа байгаа энэ Ханаһаан нютагые хэтэ мүнхэдөө эзэмшэхээр шамда болон үри һадаһадташ үгэхэб. Таанадай шүтэхэ Бурхан Бил болоноб!

⁹ Бурхан Абраһаамда дахин хандан айладхаба: – Зүгөөр шишье Намтай баталһан хэлсээгээ бэелүүлхэ, сахиха ёһотойш, мүн шинии һүүлээр үри һадаһадшни үеһөө үедэ сахиха ёһотой.

¹⁰ Бидэнэй хоорондо хэлсээнэй баталагдаһые гэршэлһэн зүйл гэбэл, танай угай эрэ хүн бүхэндэ бэлгэ отолхо ёһолол хэгдэхэ ёһотой.

¹¹ Иигэжэ энэ Минии болон таанадай хоорондо хэлсээнэй баталагдаһые гэршэлхэ тэмдэг болохо.

^12-13 Түрөөд долоо хоноһон нарай хүбүүн бүхэндэ энэ ёһолол хэхэ хэрэгтэй. Өөрын, түрэлэйшье зондо, бусад арад яһатанһаа худалдажа абаһан богоолдошье, хүгшэн, залуу илгаагүй эрэ хүн бүхэндэ энэ ёһолол хэхэт. Ёһололой удхань гэбэл, хүнэй бэедэ табигдаһан тэмдэг маанадай хоорондохи хэлсээнэй үеын үедэ хүсэндөө байһанай гэршэ мүн.

¹⁴ Энэ ёһолол хэнгүй үнгэрһэн хүниие Би Минии бэшэ гэжэ тоолохоб, юундэб гэхэдэ, тэрэ хүн Минии хэлсээ эбдэһэн болохо.

¹⁵ Үшөө Бурхан Абраһаамда иигэжэ айладхаба: – Энээнһээ хойшо шинии һамган Сара бэшэ, харин «Сарра» гэжэ нэрэтэй болохо.

¹⁶ Би тэрэниие үреэгөөд, шамда тэрээнһээ хүбүү түрүүлхэб, уг удамһаань агууехэ улас яһатаниие байгуулжа, заримыень хаан шэрээдэ һуулгахаб.

¹⁷ Абраһаам урдань һүгэдэн мүргэн унабашье, үнэншэжэ ядангяар бүтүү энеэсэгээгээд, досоогоо бодобо: «Зуу наһатай би хүүгэдтэй болохо юм аалби? Ерэ хүрэһэн Сарра түрэжэ шадаха юм гү?»

¹⁸ Тиигээд тэрэ Бурханда: – Ишмаһээлыешье харууһан дороо байлгаа һаатнай, хэды һайн һайхан байгааб! – гэбэ.

¹⁹ Бурхан: – Үгы. Сарра, шинии һамган, хүбүү түрэхэ, тиихэдэнь тэрээндээ Исаак гэжэ нэрэ үгэхэш. Би баталһан хэлсээгээ тэрэ хүбүүндэ болон хойшонхи үедэнь хүсэн түгэлдэр бэелүүлхэб. Тэрэ болбол хэтэ мүнхын хэлсээн юм.

²⁰ Ишмаһээл тушаа гуйжа байгаашашни һайн хэрэг. Би тэрээнииеш үреэхэб, тэрэнэй угые үнэржүүлхэб, тиигэжэ тэрээндэ олон үри һадаһадые заяахаб. Арбан хоёр удамарша Ишмаһээлһээ гараха: тэрэшни агууехэ арадай эхин удамай эсэгэ болохо.

²¹ Харин Намтай баталһан хэлсээн Исаагта хамаатай. Тэрэ хүбүүе Сарра хойто жэл түрэхэ, – гэжэ айладхаба.

²² Иигээд Бурхан ябашаба.

²³ Тэрэл үдэртөө Абраһаам Эзэнэй захирһанай ёһоор, гэртээ байһан эрэ хүн бүхэнэй бэлгэ отолбо. Өөрынь хүбүүн болон гэртэнь түрэһэн бүхы эрэшүүл, тэдээндэ ажал хэдэг, хари газарһаа худалдажа абаһан бүхы богоолнууд бэлгэндээ отололго хүүлэбэ.

²⁴ Абраһаам отололго хүүлэхэдээ ерэн юһэн наһатай байгаа,

²⁵ харин тэрэнэй хүбүүн Ишмаһээл арбан гурбан наһатай бэлэй.

²⁶ Нэгэл үдэр Абраһаамшье, тэрэнэй хүбүүн Ишмаһээлшье отололго хүүлэбэ.

²⁷ Тэдэнэйдэ түрэһэн бүхы эрэшүүл, хари газарһаа худалдажа абаһан бүхы богоолнууд тэрэ үдэр мүн лэ бэлгэндээ отололго хүүлэбэ.