Эхин 16 - Библи

Һагаар Ишмаһээл хоёр

¹ Абрамай һамган Сара хээлитэй болодоггүй хэбээрээ байба. Тэрэ Египет ороной Һагаар гэжэ нэрэтэй шэбэгшэтэй бэлэй.

² Тиигээд Сара Абрамда иигэжэ хэлэбэ: – Эзэн намда үхибүү заяанагүй. Тиимэһээ ши минии зараса эхэнэртэй һуу. Магад, тэрэ минии түрөөгүй хүбүүе шамда түрэжэ болохо. Абрам Сарын үгэ зүбшөөбэ.

³ Тиихэдэнь Сара үбгэндөө дэрэ хубаалдахаар өөрынгөө шэбэгшэ, Египет орон нютагай эхэнэр Һагаарые үгэбэ. Тэрэ үедэ Ханаһаанда байрлаһаар Абрам арбан жэл болоод байгаа.

⁴ Абрам Һагаартай унтажа, тэрэнь хээлитэй боложо, эзэн эхэнэртээ ехэ дээрэлхүүгээр хандадаг болобо.

⁵ – Ши минии доромжолуулһанда гэмтэйш, – гэжэ Сара Абрамда хэлэбэ. – Би шамда өөрынгөө шэбэгшэ эхэнэрые үгөө һэм, харин тэрэш хээлитэй болоходоо, намда дээрэлхэнэ. Тиибэл, Эзэн маанадай дунда хэнэй зэмэтэй байһые шиидхэг лэ!

⁶ – Шинии шэбэгшэ шинии мэдэлэй, – гэжэ Абрам харюусаба. – Юу хэхэеэ өөрөө мэдыш. Тиихэдэнь Сара Һагаарые зоргоороо харшалжа, тэрэнь тэрьедэбэ.

⁷ Шүүр хото руу Һагаар шэглэн ябаба. Хээрэ талада, булагай дэргэдэ тэрэнэй зогсожо байхада, Эзэнэй Эльгээмэл олоод,

⁸ иигэжэ асууба: – Сарын шэбэгшэ эхэнэр Һагаар, ши юундэ иигэжэ тэнэжэ ябанаш? Тэрэ харюусаба: – Би минии эзэн эхэнэр Сараһаа зугадажа ябанаб.

⁹ Эзэнэй Эльгээмэл айладаба: – Эзэн эхэнэртээ бусажа, мэдэлдэнь оро.

¹⁰ Шинии үри һадаһад тоо томшогүй олон болохо.

¹¹ Ши хээлитэйш. Хүбүүтэй болохош. Тэрээндээ Ишмаһээл гэжэ нэрэ үгөөрэй, юундэб гэхэдэ, зоболондо ороод уйлахадаш, Эзэн шамайе дуулаа. («Ишмаһээл» гэдэгынь «Бурхан хүнэй үгэ анхаран дууладаг» гэһэн удхатай.)

¹² Харин хүбүүншни зэрлиг амитан мэтэ нүүдэл байдалтай, тэнэн түгэншэлэн ябаха. Үри һадаһадынь түрэл саданһаа амяарлан, сусалһаа – гал, сухалһаа – хэрүүл гэдэгтэл, тэдэнтэеэ адага шүбгэ мэтэ бололсон байха.

¹³ Һагаар ехэтэ гайхаба, һүүлдэнь «нээрээ эндэ Бурханиие хараа гээшэ гүб?», – гэжэ өөрһөө асуун, өөртэйнь хөөрэлдэһэн Эзэндэ Бээр-Лахай-Роии гэжэ нэрэ үгэбэ.

¹⁴ Тэрээнһээ хойшо Кадээш болон Бээрэд хотонуудай хоорондо оршогшо тэрэ булаг «Намайе хододоо хаража байдаг Эзэн Бурханай булаг» гэжэ нэрэтэй болоо.

¹⁵ Һагаар эзэндээ бусажа, Абрамай хүбүү түрэбэ. Тиихэдэнь Абрам хүбүүндээ Ишмаһээл гэжэ нэрэ үгэбэ.

¹⁶ Абрам тэрэ үедэ наян зургаан наһатай байгаа.