Эхин 15 - Библи

Бурханай Абрамтай баталһан хэлсээн

¹ Энэ болоһон үйлэ хэрэгүүдэй удаа нэгэ хэды сагай үнгэрөөд байхада Абрамда үзэгдэл үзэгдэжэ, тэрэ Эзэнэй иимэ айладхал дуулаба: – Абрам, юунһээшье бү ай! Би шамайе хододоо хаража хамгаалжа, угаа ехэ һайн һайханиие үршөөхэб.

² Тиихэдэнь Абрам хэлэбэ: – Агууехэ Эзэмни! Үхи хүүгэдһээ бэшэ ондоо ямар шагнал намда угаа ехэ байхаб даа. Дамааск хотоһоо уг гарбалтай Элиээзэр зараса минии һүүлээр зөөриием эдлэхэ хүн болохол.

³ Нэрым нэрлүүлхэ хүбүү намда үршөөгөөгүй хадатнай Танай намда заяаһан эд баялиг наһа бараһанайм удаа тэрэнээр лэ эдлэгдэхэ.

⁴ Абрам Эзэнэй дахин тэрээндэ иигэжэ айладхахые дуулаба: – Үгы! Шинии зөөри тэрэ эдлэхэгүй. Ши өөрын гэхэ хүбүүтэй болохош!

⁵ Эзэн Абрамые майханһаань гаргаад, иигэжэ айладхаба: – Огторгой өөдэ хара, одо мүшэдые тооло, харин тооложо шадаха гүш? Иимэ олон үри һадаһадтай болохош.

⁶ Абрам Бурханда этигэбэ, Бурхан тэрэниие үнэн сэдьхэлтэн гэжэ тоолобо.

⁷ Тиигээд Эзэн Бурхан Абрамда иигэжэ айладхаба: – Би болбол Эзэн гээшэб. Шамайе халдейн Үүр хотоһоо иишэнь асаржа, энэ газар нютагые эзэлэн байхыеш үгэнэб.

⁸ – Агууехэ Эзэмни! Теэд энэ газар минии болохо гээд би яажа мэдэхэбиб, үгэеэ бэелүүлхээ баталжа үгыт! – гэжэ Абрам гуйба.

⁹ Тиихэдэнь Эзэн Бурхан иигэжэ захирба: – Ши Намда гунжан үнеэ, шүдэлэн эмэ ямаа, шүлгэ хуса гаргажа, мүн баһа эрэ, эмэ хоёр гулабхаа үргэл болго.

¹⁰ Абрам эдэ амитадые асараад, үнеэ, эмэ ямаа, хусын ами таһалжа, хоёр хуби болгон таһа сабшаба, гулабхаануудыел бүтэн орхибо. Тиигээд тэрэ хахад хубинуудые, гулабхаануудые урда урдаһаань харуулан табижа, Эзэниие хүлеэжэ эхилбэ.

¹¹ Мяхаша шубуудай ниидэн ерэхэдэ, Абрам үргээн һуугаа бэлэй.

¹² Наранай орожо байхада Абрам бүхэ нойрто абтажа, оршон тойронгоо тэрэниие харанхыгаар хүреэлжэ байһандал мэдэрэлдэ абтан хүндөөр нойрмоглобо.

¹³ Тиигээд Эзэн айладхал тэрээндэ буулгаба: – Шинии үри һадаһад хожом хариин газарта нүүхэ, дүрбэн зуугаад жэлэй туршада тэндэ богоол болон дарлуулха.

¹⁴ Гэбэшье Би тэрэ дарлагша үндэһэ яһатаниие ехэ шэрүүнээр шиидхэхэб, тиихэдэм шинии уг удам хариин нютагһаа сүлөөлэгдэхэдөө ехэ олзотой гаран ошохо.

¹⁵ Харин ши өөрөө тэрээнһээ урид наһанайнгаа дүүрэхэдэ элинсэг хулинсагтаа амгалан тайбан мордохош, айһанай хэрэггүй.

¹⁶ Дүрбэн үеын уг удамшни хариин нютагта ажаһууһанай удаа иишээ бусажа ерэхэ. Тэдэнэй эндэ ерэтэр эмоор обог зон энэ газар нютаг эзэлэн ажаһууха. Эдэ зоной доройтоһон ушарһаа Би тэрэ үедэ шинии уг удамай тала хаража, эмоор обогой зониие эндэһээ үлдэхэб. Харин эмоор обогойхидой тиимэ ёро муутай болотор Би мүнөө хүлеэгөөд, һүүлдэнь хэһээлтэ амсуулхаб.

¹⁷ Наранай орожо, бүтүү харанхы болоходо, гэнтэ дүрэлзөөд ехэ гал аһаба. Галһаа үдхэн утаан бөөгнэрэн гаража, дүлэн сасаржа байба. Тэрэ гал дүлэн амитадай хахадлан сабшагдаһан бэеын хубинуудай хоорондуур гаража үнгэрбэ.

¹⁸ Иигэжэ тэрэ үдэр Эзэн Абрамтай хэлсээ баталаад, айладхаба: – Египедэй хилэ дээрэхи голһоо эхилээд Евфрат мүрэн хүрэтэр нэмжыһэн энэ орон нютагые Би шинии уг удамда үгэнэб.

¹⁹ Хээн, кэнэззэй, кадмонии,

²⁰ хээт, пэриззии, рэпаиим,

²¹ эмоор, ханаһаан, гиргааш болон евүүс обогтон аймагуудай газар тэрэ болоно.