Эхин 13 - Библи

Абрам ба Лоот

¹ Абрам һамгантаяа хамаг малаа туун, эд бараагаа абаад, Египедһээ һөөргөө Нээгэб ошобо, түрэһэн дүүгэйнь хүбүүн Лоодшье тэрээнтэй суг ябалсаба.

² Мүнөө Абрам айхабтар баян болоод ябаа: адуу малааршье, алтааршье, сагаа мүнгөөршье.

³ Нээгэбһээ тэрэ Бэт-Ээл ба Һай хоёр хотонуудай тэг дундахи газар руу бусаба. Анхан тэрэ эндэ тогтожо,

⁴ Эзэндэ зорюулан, үргэлэй шэрээ шулуугаар бүтээгээ бэлэй. Абрам мүнөө тэндээ Эзэниие дахин хүндэлжэ, үреэл гуйба.

⁵ Абрамтай суг нүүжэ ябаһан Лоот өөрын гэр бүлэтэй, мүн лэ өөрын малтай, өөрын майхангуудтай болонхой ябаа.

⁶ Тэрэ газар нютагай бэлшээри, уһалуури эдэ хоёр айлай мал һүрэгтэ хүртэхөөр бэшэ болобо.

⁷ Абрам Лоот хоёрой зараса малшад энээнһээ боложо, арсалдадаг, хэрэлдэдэг болобо. Тэдээнһээ гадна тэндэ ажаһуудаг ханаһаан болон пэриззии обог аймагайхид бэлшээри, уһанда бүришье хүртэхэгүй болоһон байгаа.

⁸ Тиимэһээ Абрам Лоодто иигэжэ хэлэбэ: – Бидэ түрэл гарал зон гээшэбди. Тиимэһээ маанадай, түрэл зоной, мүн зараса малшадаймнай хоорондоо эбээ таһархань һайн бэшэ.

⁹ Үргэн салуу газар дайда урдашни байна бэшэ гү? Бэе бэеһээ таһарая. Шинии зүүлээ һааш, би баруулхаб. Шинии баруулаа һааш, би зүүлжээ ошохоб. Дуратай газараа шэлыш даа.

¹⁰ Лоот хараба: Иордан голой нюруу Цооһар хото хүрэтэр үргэлжэ бэлшээри, уһа һайтай, Эзэнэй Эдээм сэсэрлиг мэтэ, Египедэй баян шэмэтэй газар дайда мэтэ һалбаржа байба. Тэрэ үедэ Эзэн Содом болон Гоморро хотонуудые усадхаадүй байгаа.

¹¹ Лоот энээниие шэнжэлээд, Иордан голой нюруу шэлэжэ, зүүн зүг зорин ябаба. Иигэжэ эдэ хоёр бэе бэеһээ таһаржа,

¹² Абрам Ханаһаанда нютагжаба, харин Лоот Иордан голой нюруу дамжан нүүһээр Содом хотын шадар ерэжэ байрлаба.

¹³ Содомой улад муу аяг зантай зон байгаа, Эзэниие оройдоошье ойндоо оруулдаггүй, хүндэлдэггүй һэн.

Мамрээ гэдэг хүнэй сарса мододой дэргэдэ Абрам түбхинэнэ

¹⁴ Лоодой таһаржа нүүһэнэй удаа Эзэн Абрамда айладхаба: – Байһан газартаа зогсоод, зүг бүхэниие шэртэ!

¹⁵ Нюдэнэйш хараагай хүрэхэ бүхы энэ дайдые шамда болон шинии үри һадаһадта хэтын хэтэдэ эзэлхыетнай үгэхэб.

¹⁶ Шинии үри һадаһадые элһэн мэтэ олон болгохоб. Сүл губиин элһэ тоолохын аргагүй мэтэ шинии үри һадаһад тоогүй олон болохо.

¹⁷ Ши энэ байһан газараа орхёод, энэ Минии шамда гэжэ үгэһэн бүхы газар дайдаар нүүн яба!

¹⁸ Иигээд Абрам майханаа хуряагаад, аян замда гаража, Хэброон хотын хажууда тогтон, тэндэхи Мамрээ гэдэг хүнэй сарса мододой дэргэдэ ерэбэ. Тэрэ Эзэндэ зорюулан, шулуугаар баһа нэгэ үргэлэй шэрээ барин бодхообо.