Эхин 11 - Библи

Вавилооной самхаг

¹ Тэрэ үедэ дэлхэйн бүхы зон нэгэ түрэлхи хэлэтэй, нэгэн адляар хөөрэлдэдэг һэн.

² Олон зон зүүн зүгһөө нүүжэ, Шинаар ороной нюрууда ерэжэ һуурижаба.

³ Тиигээд өөһэд хоорондоо тэдэ иигэжэ хөөрэлдэбэ: – Һууринай барилга ябуулха хэрэгтэй. Шабараар хирпиисэнүүдые хээд, бүхэ шанартай байхынь тула тэдэнээ галда шатаая. Тиигээд тэдэ барилгада шулуунай орондо хирпиисэ, хирпиисэнүүдые барисалдуулхын тула сагаан шохойн орондо дабирхай хэрэглэдэг болобо.

⁴ Хоорондоо тэдэ дахин хэлсэбэ: – Газар дэлхэйгээр таража бутархагүйн тула бидэ асари хүсэтэй, алдар солотой, һүр ехэтэй улас түрэ болохо ёһотойбди. Тиимэһээ тэнгэри тулама үндэр самхаг, бата найдамтай хэрэмтэй хото бария.

⁵ Эзэн хүн түрэлтэнэй барижа байһан хото самхаг хоёрые харахаяа буужа,

⁶ иимэ зарлиг буулгаба: – Харыт, эдэ зон иишэ-тиишээ зөөжэ ябахын орондо нэгэ газарта обооржо, нэгэ хэлэтэй нэгэ арад болохоёо һэдэнэл. Иигэжэ суг хамта барилга эхилбэл, саашадаа тэдэ юушье хэжэ магад.

⁷ Тиимэһээ бэе бэеэ ойлгохоо болиторнь хэлыень худхан холиё!

⁸ Иигэжэ зон хотоёо барижа дүүргэнгүй, орон дайдаар зайгуултаба.

⁹ Тэрэ хотын зоной нэгэн хэлые бэе бэеэ ойлгохоёо болиторнь Эзэнэй худхаһан ушарһаа хото «худхаха» гэһэн удхатай, еврей хэлээр «Вавилоон» гэдэг нэрэтэй болоһон байна. Тэндэһээ Эзэн зониие бүхы түби дэлхэйгээр тараан сасаа.

Абраһаамай урда үенүүд

¹⁰ Шээмэй угай бэшэг эндэһээ эхилнэ. Үерэй һүүлээр хоёр жэл үнгэрөөд байхада, Шээм зуу наһатайдаа Арпахшаад гэжэ хүбүүтэй болобо.

¹¹ Арпахшаадай гараһанай һүүлээр хэдэн хүбүүд, басагадтай болоод, Шээм үшөө табан зуун жэл ажаһуугаад, наһа бараа бэлэй.

¹² Арпахшаад гушан табатай байхадаа, Шээлах гэжэ хүбүүтэй болобо.

¹³ Шээлахэй түрэһэнэй һүүлээр Арпахшаад үшөө дүрбэн зуун гурбан жэл ажаһуугаад, хэдэн хүбүүд, басагадтай болоод, гээгдэбэ.

¹⁴ Шээлах гушатай байхадаа, Ээбэр гэжэ хүбүүтэй болобо.

¹⁵ Ээбэрэй түрэһэнэй һүүлээр Шээлах үшөө хэдэн хүүгэдтэй болоод, дүрбэн зуун гурбан жэл ажаһууһанай удаа наһа бараа һэн.

¹⁶ Ээбэр гушан дүрбэтэй байхадаа, Пээлэг гэжэ нэрэтэй хүбүүтэй болобо.

¹⁷ Ээбэр энээнһээ гадна хэдэн хүүгэдтэй болоод, Пээлэгэй түрэһэнэй һүүлээр үшөө дүрбэн зуун гушан жэл ажаһуугаад, наһа бараа бэлэй.

¹⁸ Пээлэг гуша наһатай байхадаа, Рэһүү гэжэ хүбүүтэй болобо.

¹⁹ Энээнэй һүүлээр тэрэ хоёр зуун юһэн жэл ажаһуугаад, хэдэн хүүгэдтэй болоод, гээгдэбэ.

²⁰ Рэһүү гушан хоёртойдоо Сэрүүг гэжэ хүбүүтэй болобо.

²¹ Сэрүүг хүбүүнэй түрэһэнэй хойно Рэһүү хоёр зуун долоон жэл ажаһуужа, хэдэн хүбүүд, басагадтай болоод, наһа бараа һэн.

²² Сэрүүг гушатай байхадаа, Нахоор гэжэ хүбүүтэй болобо.

²³ Энээнэй удаа Сэрүүг үшөө хэдэн хүбүүд, басагадтай болоод, үшөө хоёр зуун жэл ажаһуугаад, гээгдээ бэлэй.

²⁴ Нахоор хорин юһэтэй байхадаа, Тээраа гэжэ хүбүүтэй болобо.

²⁵ Тэрэ сагһаа хойшо Нахоор зуун арба юһэн жэл ажаһуугаад, үшөө хэдэн хүбүүд, басагадтай болоод, нүгшэбэ.

²⁶ Тээраа далатай байхадаа, Абрам, Нахоор ба Һараан гэдэг гурбан хүбүүтэй болобо.

^27-28 Энэ болбол Тээраагай угай бэшэг юм. Абрам, Нахоор, Һараан гэгшэд Тээраагай гурбан хүбүүд болоно. Һараан Лоот гэдэг хүбүүтэй байгаа. Тээраа эсэгынгээ үшөө амиды байхада Һараан тоонто нютагтаа – халдейн Үүртэ наһа бараа бэлэй.

²⁹ Абрам ба Нахоор һамга абабад. Абрам Сара гэжэ нэрэтэй басагые, Нахоор Һараанай басаган Милкаае һамга абаба. Һараан хадаа Милкаа ба Искаа гэдэг басагадтай байгаа.

³⁰ Сара үхибүү түрэдэггүй, хээлитэй боложо шададаггүй һэн.

³¹ Тээраа Абрам хүбүүгээ, аша хүбүүгээ – Һараанай Лоот гэжэ хүбүүе, бэриеэ – Абрамай һамган Сарые абаад, Ханаһаан орон руу нүүжэ ошохоёо халдейн Үүр хотоһоо гараба. Гэбэшье тэдэнэр замдаа тогтожо, Месопотамиин Харраан хото хүрөөд, тэндээ байрлаа һэн.

³² Тээраа тэндэ ажаһуужа, хоёр зуун табан наһатайдаа нүгшэһэн юм.