Ёһээл 3 - Библи

Ёшапаадай хүндыдэ болохо агууехэ зарга шүүбэри

¹ «Харагты, Иуда ба Иерусалимай хуби һэргээхэ тэрэ үедэ, тэдэ үдэрнүүдтэ

² Би бүхы үндэһэтэниие суглуулан, Ёшапаадай хүндыдэ асархаб. Тиигээд Би Өөрын угай түлөө, Минии арадые ондоо угсаатанай дунда тараан үлдэжэ, Минии газар хубааһанайнь түлөө заргалан, тэдэ арадуудай хэрэг шүүхэб.

³ Минии арад тухай тэдэ жээрэб хаяжа байгаа: хүбүүдые янхан эхэнэрнүүдэй түлөө үгэдэг, басагадые үзэмэй дараһан архи уухын түлөө худалдадаг байгаа.

⁴ Тиир, Сидоон ба Пилиштын тойрог Минии хубида юун бэ даа! Таанад үһөө абаха гэжэ байна гүт? Тэрэ үһөөетнай һөөргэнь тархи дээрэтнай буулгахаб.

⁵ Таанад Минии алта мүнгые абаат. Таанад Минии үнэтэ эрдэниие өөрын һүмэнүүдтэ оруулаат.

⁶ Таанад Иудын ба Иерусалимай хүбүүдые газар нютагһаань зайлуулхын тулада грек угсаатанда худалдаат.

⁷ Харахат, танай худалдаһан газарһаа тэдэниие бодхоожо, таанадай толгой дээрэ харюуень бусааха гэжэ байнаб.

⁸ Би таанадай хүбүүд басагадые Иудын арадта худалдахаб, тэдэ дам саашань холын сэбаа угсаатанда худалдаха». Эзэн энээниие айладхаа.

⁹ Арад үндэһэтэнэй дунда энээниие тунхагла, дайнда бэлдэ. Эрэлхэг хүсэтэй дорюун эрэшүүлые бодхоогты. Бүхы сэрэгшэд тулалдахын түлөө суглараг.

¹⁰ Анзаһануудаа һэлмэ, хадуурнуудаа жада болгон дабтагты. Ахир дорой хүн «Би хүсэтэйб», – гэжэ хэлэг!

¹¹ Тойронхи бүхы арад угсаатан яаран ерэжэ, тэндэ сугларагты. Эзэн, Та хүсэтэнөө буулгагты.

¹² «Ёшапаадай хүндыдэ арад угсаатаниие ерүүлэгты. Хамаг угсаатаниие шүүхын тулада Би тэндэ һуухаб.

¹³ Хадуурнуудаа гаргагты, таряан эдеэшээ. Үзэмэй архиин шахуурганууд дүүрэнхэй, ерээд гэшхэгты. Тэдэнэй муу ябадалынь олиггүй ехэ ушарһаа торхонууд саглажа байна».

¹⁴ Шиидхэлэй хүндыдэ зон бөөгнэржэ байна. Ушарынь хадаа Эзэн шиидхэлэй хүндыдэ ойрохон байна.

¹⁵ Һара наран харанхыдажа, ододой гэрэл бүхэхэ.

¹⁶ Эзэн Сионһоо нэерэн, Иерусалимһаа дуугаа шангадхаха. Газар тэнгэри шэшэрхэ. Гэбэшье Эзэн арад түмэнэйгөө хорохо газар, Израилиин хүбүүдэй бата тулга болохо.

¹⁷ «Тиихэдэ таанад Намайе Өөрын нангин уулада оршодог таанадай Бурхан, Эзэн мүн гэжэ мэдэхэ болохот. Иерусалим арюун боложо, хойто үедэ хари хүнүүд тэрэниие дайран үнгэрхэеэ болихо.

Ерээдүйн һүр жабхалан болон Израилиин мандалга

¹⁸ Тэрэ үдэр хада уулаһаа үзэмэй дараһан архи дуһалжа, гүбээнүүдһээ һүн урдаха, Иудын бүхы горхонууд уһаар дүүрэхэ. Эзэнэй үргөөһөө булаг орьёлон, Шиттиимэй хүндые уһалхал.

¹⁹ Иудын хүбүүдые харшалан, орон нютагтань гэмгүй зоной шуһа урадхуулһанай түлөө Египет һүнэһэн газар, Эдоом хооһон дайда болохо.

²⁰ Харин Иуда эгүүридэ мүнхэ байха, Иерусалимда бүхы үедэ хүн амидаран нютаглаха.

²¹ Би харюугаа абаагүй шуһанайнь харюу тэдээнһээ нэхэхэб». Ушарынь хадаа Эзэн Сиондо оршодог болохо.