Ёһээл 1 - Библи

¹ Пэтүһээлэй хүбүүн Ёһээлдэ Эзэнэй айладаһан үгэ.

Һалаһан ургаса тухай гашуудал

² Аха захатан, энээниие соносогты. Энэ газарта оршон һуугшад, бултадаа Намайе шагнагты. Таанарай гү, али үбгэ эсэгэнэрэйтнай үедэ иимэрхүү ябадал болоо гү?

³ Энээн тухай таанар хүүгэдтээ хэлэжэ, тэдэ саашаа өөрын үхи хүбүүдтэ дамжуулан, тэдэнэй хүүгэд удаадахи үедөө дамжуулаг.

⁴ Төөлүүрэй үлөөһэн юумэ һүрэг таршаа шумуул эдеэ, таршаа шумуулай үлөөһэниие үтэ хорхой эдеэ.

⁵ Таанадай аманһаа һалгагдаһан шэхэрлиг үзэмэй дараһан архинай түлөө, үзэмэй дараһан архи уугша бүгэдэн бархиран гашуудагты. Танай хужарлан уудаг ундан үгы болоо.

⁶ Тоолошогүй олон, ехэ хүсэтэй үндэһэтэн Минии орон нютаг эзэлэн абаба. Шүдэнүүдынь арсаланай һоёо шүдэнүүд мэтэ, үргэниинь эмэ арсаланайхида адли.

⁷ Тэдэ минии уһан үзэмэй һөөгүүдые һүйдхэжэ, удамбар жэмэсэй модонуудые һалгааба. Холтоһыень хуулаһан нюсэгэн мүшэрнүүд сайран харагдана.

⁸ Удархай самса нэмэрһэн эхэнэртэ адли эдир залуу үеынгөө нүхэрэй түлөө орилон уйлагты.

⁹ Эзэнэй үргөөһөө үргэлэй эдеэн болон үзэмэй дараһан архи таһалдажа, Эзэнэй үйлэ бүтээдэг санаартад гашуудаба.

¹⁰ Таряалан хооһоржо, газар гашуудана. Тариһан таряан һалажа, үзэмэй дараһан архи шэргэбэ, олива модоной шэнэ тоһон хатаба.

¹¹ Таряашад, гашуудагты, уһан үзэм ургуулагшад бархирагты, таряалангай шэниисэ, ешмээн усадхагдаа.

¹² Уһан үзэмэй һөөг, удамбар жэмэстэ модон хаташоо. Анар жэмэс, дала модон, алима жэмэсэй модон болон талын бүхы модод хубхайран хатаба. Хүн зоной баяр, хүхюу байдал үсөөрөө.

¹³ Санаартан, гашуудалай хубсаһа нэмэрэн уйлагты. Үргэлэй шэрээдэ үйлэ бүтээгшэд орилогты. Гашуудалай таар хубсаһа үмдөөд, һүниие үнгэргэгты. Ушарынь хадаа Бурханай үргөөдэ эдеэн үргэл, үргэлэй үзэмэй дараһан архи үгы болоо.

¹⁴ Масаг сахилга тунхаглагты, ёһололой суглаа зарлагты. Ахамад болон орон нютагай хамаг зониие Эзэн Бурханай үргөөдэ суглуулжа, Эзэндэ зальбарагты.

¹⁵ Тэрэ үдэр гасалантай! Эзэнэй үдэр ойрохон байна. Тэрэ үдэр Түгэс Хүсэтэһөө хэһээлтэ ерэхэ.

¹⁶ Хараһаар байтарнай хоол хүнэһэн һалгагдажа, Бурханай Һүмэдэ баясхаланта үгэ хүүр замхаба.

¹⁷ Тариһан таряан хүрьһэнһөө бултайнгүй хаташоо. Орооһоной амбарнууд хаягдажа һандараа.

¹⁸ Үргүүлхэ туйлдаа хүрэһэн адагуусанай шэмхэхэ ногоон үгы болобо. Хонин хоол олохо шадалгүй хосоржо байна.

¹⁹ Эзэн манай, Танда хандан туһа эринэм. Хээрын бэлшээри галда абтажа, талын модые дүлэн үрэбхибэ.

²⁰ Зэрлиг ан арьяатан Танда баһал хандана. Ушарынь хадаа гол горхонууд уһаяа татажа, хээрын ногоон галда абтаба.