Египедһээ гаралга 7 - Библи

¹ Эзэн Моисейдэ зарлиг болобо: – Би шамайе фараондо бурхан болгожо табиба гээшэб, харин Аһароон ахашни шинии нэрэһээ лүндэншэн болохо.

² Минии хэлэ гэһэн юумэ ши хуу хэлэхэш, Аһароон ахашни Израиль угсаатаниие өөрын газар дайдаһаа табииш гэжэ фараондо хандан хэлэхэ.

³ Зүгөөр Би фараоной үсэд зангыень хүдэлгэхэб. Минии олон дүлгэ тэмдэг болон гайхамшаг үзэгдэлнүүдые Египет орондо үзүүлхэб.

⁴ Харин таанадай үгэ фараон дуулахагүй. Одоол тиихэдэ Египет Минии гарай хүндые мэдэхэ даа! Минии арад болохо Израиль угсаатаниие сэрэг шэнгеэр жагсаан Египедһээ гаргахаб. Хэһээлтэм шанга!

⁵ Минии хүндэ гарта сохюулхадаал Эзэн хэн гээшэб гэжэ Египет зон мэдэхэ даа. Тиихэдэнь лэ Израиль угсаатаниие тэндэһээ гаргахаб.

⁶ Эзэнэй зарлигые Моисей Аһароон хоёр гүйсэд бэелүүлбэ.

⁷ Фараондо хандаха тэрэ үедөө Моисей наян наһатай, Аһароон наян гурбатай байгаа.

Фараондо үзүүлһэн дүлгэ тэмдэгүүд

⁸ Эзэн Моисей Аһароон хоёрто айладаба:

⁹ – Фараоной таанадта «Гайхамшаг үйлэ бүтээгыт» гэжэ хэлээ һаань, ши Аһароондо «Дулды абажа, фараоной урда шэдэ» гэжэ хэлээрэй, тиихэдэш могой болошохо.

¹⁰ Моисей Аһароон хоёр фараондо ерэжэ, Эзэнэй захирһанай ёһоор хэбэ: Аһароон дулдыгаа фараоной, тэрэнэй түшэмэлнүүдэй урда шэдэбэ, тэрэнь могой болошобо.

¹¹ Фараон өөрын мэргэшүүлые ба эльбэшэдые дуудажа ерүүлбэ. Египедэй эльбэшэд иимэ юумэ баһал харуулба.

¹² Хүн бүхэниинь дулдыгаа газарта шэдэбэ, тэдэнь могойнууд болошобо. Гэбэшье Аһарооной дулды тэдэнэй дулдынуудые бэедээ татан шэнгээжэрхибэ.

¹³ Теэд фараон тэдэнэй үгэ шагнаха дурагүй байба. Эзэнэй айладаһаар лэ болобо.

Египет зониие хэһээлгэ

¹⁴ Эзэн Моисейдэ айладаба: – Фараоной үсэд зангынь хүдэлөөд, зониие табиха дурагүй байна.

¹⁵ Үглөөдэр фараоной гол тээшэ ерэхэдэнь, урдаһаань ошоорой. Могой боложо хубилдаг дулдыгаа гартаа баряад, голой эрье дээрэ урдань зогсон,

¹⁶ иигэжэ тэрээндэ хэлэхэш: «Сүл губида ошожо Намда үргэл хэхыень Минии арадые табииш», – гэжэ Эзэн, еврейнүүдэй Бурхан, шамда дамжуулаа. Харин ши мүнөө болотор үгыень дууланагүйш.

¹⁷ «Эзэн хэн гээшэб гэжэ мүнөө мэдэхэш!» – гэжэ Эзэн шамда айладана. Дулдыгаар Нил мүрэнэй уһа сохиходом, тэрэ уһан шуһан болошохо.

¹⁸ Нил мүрэнэй загаһан хуу хосорхо, уһаниинь жэрхэдэһэ хүрэмэ муухай үнэртэй болохо, египедэйхид голһоо уһа уужа шадахаяа болихо.

¹⁹ Эзэн Моисейдэ айладаба: – Дулдыгаа Египедэй бүхы уһан дээрэ – гол мүрэн, һэдэһэ, тэдэнэй һалаа, нуур, сөөрэмүүд дээрэ дэлгэн дэехэш гэжэ Аһароондо хэлэ, уһаниинь шуһан болохо. Бүхы Египедэй газар дайдаар – модон дээрэ, шулуун дээрэ – шуһан бии болохо.

²⁰ Моисей Аһароон хоёр Эзэнэй захирһанай ёһоор бүтээбэ. Аһароон дулдыгаа үргэжэ, фараоной, тэрэнэй түшэмэлнүүдэй хараһаар байтар Нил мүрэнэй уһа сохибо. Нил мүрэн шуһаар урдаба.

²¹ Уһа мүрэнэй хамаг загаһан үхэбэ, уһаниинь аргагүй муухайгаар анхилба. Египедэй зон голһоо уһа ууха аргагүй болобо. Египет орон шуһаар дүүрэбэ.

²² Египедэй эльбэшэд тиимэ эльбэ баһал хэжэ шадаба. Эзэнэй урид айладаһаар, фараон үсэрһөөр үсэржэ, Моисей ба Аһароон хоёрой үгэ дуулабагүй.

²³ Тэрэ эрьелдээд, ордон тээшээ ябаба, эдэ бүгэдые анхарбагүй.

²⁴ Египет зон голһоо хажуу тээгүүр худагуудые малтажа, ууха уһаяа бэдэрбэ. Юуб гэбэл, голһоо уухын арагагүй болоод байгаа.

²⁵ Эзэнэй Нил мүрэндэ гар хүрэһэнһөө хойшо долоон хоног үнгэрбэ.