Египедһээ гаралга 6 - Библи

¹ – Фараондо юу хэхыем харахаш даа; Минии хүндэ гарай баалалтаар удамайш зониие тэрэ табиха, табихаһаа байтагай орон нютагһаа үлдэжэ гаргаха, – гэжэ Эзэн Моисейдэ харюусаба.

Бурхан Моисейдэ даабари үгэнэ

² Тиигээд Бурхан Моисейдэ айладаба: – Би Эзэн гээшэб!

³ Абраһаамда, Исаак болон Яковта «Түгэс Хүсэтэ» гэһэн нэрээр үзэгдөө һэм, харин «Эзэн» гэһэн нэрэеэ мэдүүлээгүйб.

⁴ Ханаһаан орондо тэдэ хэсэжэ ябагша һэн. Тэрэ орон нютагые өөһэдынь болгожо үгэхэ тухай тэдэнтэй хэлсээн баталаа бэлэйб.

⁵ Египедэй дарлалта доро Израиль угсаатанай ёолохые мүнөө дуулажа, тэрэ хэлсээ тухай һанаандаа оруулааб.

⁶ Израиль угсаатанда иигэжэ дуулга: «Би Эзэнби! Би таанадые Египедһээ гаргахаб, дарлалтаһаа сүлөөлхэб! Би таанадые абархаб, Минии гар һунаалгаатай, хэһээлтэм шанга!

⁷ Таанадые Минии арад болгожо, Бурхантнай болохоб. Таанадые Египедэй дарлалтаһаа гаргаһан танай Эзэн Бурхан гэжэ һанажа ябахат.

⁸ Абраһаамда, Исаак болон Яковта үгэхэб гэжэ тангариглаһан орон дэбисхэртэ таанадые оруулхаб, уг удамарайтнай эзэлэн һууха газар болгожо үгэхэб. Би Эзэн мүн гээшэб!»

⁹ Энэ айладаһыень Моисей Израилиин зондо дамжуулан хэлэбэ, харин тэдэнь хүшэр ажалда диилдэжэ, зоригоо мохонхой, Моисейн үгэ шагнахашье дурагүй байба.

^10-11 – Фараондо ошожо, Израиль угсаатанай орон нютагһаашни гарахыень зүбшөөгыш гэжэ тэрээндэ хэлэ, – гэбэ Эзэн.

¹² – Израилиин зон үгыемни дууланагүйл, хайшан гэжэ фараон минии үгэ дуулаха юм? Би үгэ хэлэндээ ахир һэмнэйб, – гэжэ Моисей хэлэбэ.

¹³ Израиль угсаатанда ошохыень, тэдэниие Египедһээ гаргахын тула Египедэй засаг түрэ эзэлдэг фараондо ошожо айладхал хэгты гэжэ Моисей Аһароон хоёрто Эзэнэй зарлигтаһаниинь тэрэ бэлэй.

Моисей ба Аһарооной угай бэшэг

¹⁴ Обогуудые ахалха хүнүүд гэбэл, иимэ байна. Израилиин ууган хүбүүн Рэүбээнэй хүбүүд Эноох ба Паллуу, Хэцроон ба Хармии гэгшэд болоно. Тэдэнһээ Рэүбээнэй обог эхи татаа юм.

¹⁵ Симеоной хүбүүд Емүһээл, Ямиин, Ооһад, Яхиин, Цохаар ба ханаһаан угтай эхэнэрэй хүбүүн Саул болоно. Тэдэнһээ Симеоной обог гараһан болоно.

¹⁶ Левиин хүбүүдые ахалан тоолоходо, Гэршоон, Кэһаат ба Мэрарии болоно. Левий гээшэ зуун гушан долоон наһа наһалһан гэхэ.

¹⁷ Гэршооной хүбүүд Либнии ба Шимэй гэгшэд өөрын урагтай.

¹⁸ Кехадай хүбүүд: Амраам ба Ицһаар, Хэброон ба Үззиһээл. Кэһаат зуун гушан гурбатай боложо наһа бараа.

¹⁹ Мэрариин хүбүүд Маһлии ба Мушии. Левиин обог гэхэдэ эдэл болоно.

²⁰ Амраам гээшэнь өөрынгөө абга эгэшэ Ёхээбэдые һамган болгожо абаһан байгаа. Тэрэ эхэнэрһээ Аһароон ба Моисей түрэһэн юм. Амраам зуун гушан долоотой болоһон гэхэ.

²¹ Ицһаарай хүбүүд: Коорах, Нээпэг ба Зихрии.

²² Үззиһээлэй хүбүүд: Мишаһээл, Элцапаан ба Ситрии.

²³ Аһароон Амминадаабай басаган, Нахшооной эгэшэ Элишээбые һамган болгожо абаһан юм. Тэрэнь Надааб, Абиһуу, Эльазаар ба Итамаар гэжэ хүбүүдые түрөө.

²⁴ Коорахай хүбүүд: Ассиир, Элканаа ба Абиасаап. Энэ Коорахай ураг удам гээшэ.

²⁵ Аһарооной хүбүүн Эльазаар Пүтиһээлэй басагадай нэгые абаа, тэрэнь Пинэһаасые түрөө. Эдэ хадаа левит угай эхи табигшад болоно.

²⁶ Израилиин хүбүүдые сэрэг шэнгеэр жагсаагаад, Египедэй газарһаа гаргагты гэжэ Эзэнэй зонхилһон Аһароон Моисей хоёр болоно.

²⁷ Моисей Аһароон хоёр Израиль угсаатаниие Египедһээ гаргахын тулада фараонтой үгөөр эдилдэн тэмсэжэ байгаа бэлэй.

Бурхан Моисейдэ үшөө нэгэ даабари үгэнэ

^28-30 Египедтэ Моисейтэй хөөрэлдэжэ байхадаа Эзэн айладаа һэн: – Би Эзэнби! Минии хэлэһэн бүгэдые фараондо дамжуула. – Үгэ хэлэндээ би ахир һэмнэйб. Фараон минии үгэ дуулаха юм аал? – гэжэ Моисей зүрхэ алдан дуугараа бэлэй.