Египедһээ гаралга 5 - Библи

Моисей Аһароон хоёр фараондо анха удаа ерэнэ

¹ Удаань Моисей Аһароон хоёр фараондо ерээд хэлэбэ: – Сүл губида Намда зорюулһан һайндэр хэхыень арадыем табииш гэжэ Израилиин Эзэн Бурхан гуйжа байнал.

² – Эзэн гээшэш хэн гээшэб? Юундэ би Тэрэнэй үгэ дуулажа, израильшуудые табиха болоо хүмбиб? Эзэн гэжэ мэдэхэшьегүйб, тэдэ зониие табихашьегүйб, – гэжэ фараон харюусаба.

³ – Еврейнүүдэй Бурхан маанадта үзэгдөө; манай Эзэн Бурханда үргэл хэхэеэ гурбан үдэрэй зайда сүл губи руу ошохыемнай зүбшөөгыт. Үгы гэбэл, Тэрэ яра үбшөөр гү, али һэлмээр маанадые һүнөөхэл, – гэжэ Моисей Аһароон хоёр хэлэбэ.

⁴ Фараон харюудань: – Яаха гэжэ Моисей Аһароон та хоёр зоной тархи эрьюулэн, ажал хэрэгһээнь һаатуулха болообта?! Ажал тээшээ үтэр арилагты!

⁵ Эдэ олон зоной ажалаа хаябал, юун болохо юм?! – гэжэ хэлэбэ.

⁶ Тэрэл үдэртөө фараон харуулшадтаа ба хинадаг дарганартаа иигэжэ захирба:

⁷ – Энээнһээ хойшо эдэ зондо хирпиисэдэ худхаха һолоомо үгэхэеэ болигты, өөһэдөө ябажа, һолоомо суглуулаг!

⁸ Харин бүтээхэ хирпиисын даабарита тоо тэрэл зандаа үлэг. Урдань хэды хирпиисэ хэгшэ һэм, тэдые мүнөөш хэхэ ёһотой. Ажалынь багадаад годооролдожо, «Бурхандаа үргэл хэхыемнай сүл губи руу табигты» гэжэ хашхаралдажа байна.

⁹ Ажалыень ехэ болгогты, хооһон үгэ хүүр шагнаха сүлөөгүй болохо.

¹⁰ Харуулшад, хинагша дарганар газаа гараад, зондо соносхобо: – Һолоомо танда үгэхэгүй гэжэ фараон захирал үгэбэ.

¹¹ Хаанаһаа олонобта, һолоомо өөһэдөө бэдэржэ суглуулагты. Харин тэды хирпиисэ бүтээхэ гэһэн урданай даабаритнай зандаа үлэнэ!

¹² Еврейнүүд бүхы Египет ороноор таража, һолоомо бэдэрнэбди гэжэ таряалан дээрэхи үбдэл сүбдэл түүдэг болобо.

¹³ Үдэр бүри хэһэн хирпиисынтнай тоо урданайхида хүрэхэ ёһотой гэжэ харуулшад хашан бааладаг байба.

¹⁴ Бэлэдхэдэг байһан хирпиисэеэ яахадаа хүсөөхэеэ болибот гэжэ израильшуудай дундаһаа табигдаһан харуулшадыень сохидог болобо.

¹⁵ Израилиин харуулшад фараондо ерэжэ, гомдол барибад: – Юундэ иигэжэ богоолнуудаа харшалха болобот?

¹⁶ Һолоомо үгөөгүй аад, урданайнгаа хэмжээнэй хирпиисэ хэгты гэжэ маанадта, богоолнуудтатнай, захирна. Богоолнуудыетнай сохино! Танай арадта нүгэл болохо ха юм.

¹⁷ – Таанад залхуут! Миин байхадаа дашуураад, «Эзэндэ үргэл хэхэеэ ошохомнай» гэлдэнэт.

¹⁸ Арилагты эндэһээ, ажалаа ошожо хэгты. Һолоомо үгэхэгүй танда, яанабта, урдань хэдэг хирпиисэеэ хэхэл ёһотойт, – гэбэ фараон.

¹⁹ Израилиин харуулшад үдэр бүриин ажалай хэмжээ бага болгохоёо байнагүй гэжэ ойлгоходоо, улам сүхэрбэ.

²⁰ Фараонһоо гарахадань, Моисей Аһароон хоёр тэдэниие хүлеэжэ байба.

²¹ Харуулшад тэдээндэ гомдолоо хэлэбэ: – Таанадһаал боложо, фараон дахуулнуудтаяа бидэниие үзэн ядадаг болоо. Маанадые алуулха гэжэ гартань зэбсэг барюулһан болонот. Таанадай юу хэһые Эзэн үзэг, таанадые шүүбэрилэг!

²² Моисей Эзэндэ хандажа, иигэжэ хэлэбэ: – Эзэн Бурхан минии, юунэй түлөө эды ехэ зоболон амасаһан зон бэ, юундэ намайе иишэ эльгээбэт?

²³ Фараондо ерэжэ, Танай нэрэһээ хэлэжэ эхилһээрни, бүри муухайгаар зониие харшалдаг болоол. Өөрын арад түмэниие абархын тулада Танай хэһэн юумэн алим бэ?!