Египедһээ гаралга 40 - Библи

Майхын һүмые табилга

¹ Эзэн Моисейдэ хандаба:

² – Нэгэдэхи һарын нэгэндэ Уулзалгын майхан һүмэеэ табяарай.

³ Тэрээн руугаа хэлсээнэй ханзаяа оруулаад, хүшэгөөр халхалаарай.

⁴ Шэрээ оруулжа, хэрэгтэй бүхы юумэ дээрэнь табяарай; дэн асаржа, зулын амһартануудые дээрэнь табяарай.

⁵ Хэлсээнэй бэшэгтэй ханзын урда уталгын алтан шэрээ табяарай, майхан һүмын үүдэндэ хаалта хүшэгэ үлгөөрэй.

⁶ Уулзалгын майхан һүмэдэ орохо үүдэнэй дэргэдэ түгэс шатаалта үргэлэй шэрээ табяарай.

⁷ Уулзалгын майхан һүмэ ба үргэлэй шэрээ хоёрой хоорондо амһарта табижа, уһаар дүүргээрэй.

⁸ Һүмэеэ тойруулаад хашаа хээрэй, хашаагай үүдэндэ хүшэгэ үлгөөрэй.

⁹ Удаань үргэмжэлэлэй ёһололдо хэрэглэгдэдэг оливын тоһо абажа, майхан һүмэдэ ба тэрээн соо байһан хамаг юумэндэ сүршэхэш: майхан һүмэ ба тэрэнэй бүхы зүйлнүүд тиихэдэш арюудхагдаха.

¹⁰ Түгэс шатаалта үргэлэй шэрээдэ ба тэрэнэй бүхы хэрэгсэлдэ нангин тоһо баһал сүршэхэш: үргэлэй шэрээ арюудхагдаха – тиигэжэ нангинай нангин болохо.

¹¹ Угаалгын амһартада болон тэрэнэй табюурта баһал тоһо түрхихэш – тэдэш арюудхагдаха.

¹² Удаань Аһароониие хүбүүдтэйнь Уулзалгын майхан һүмын үүдэндэ асаржа, хүл, гарынь зайлан угаагаарай.

¹³ Аһароондо нангин ёһололой хубсаһыень үмдэхүүлжэ, оливын тоһо магнайдань түрхеэрэй: Минии санаартан болохынь тулада арюудхаарай.

¹⁴ Тэрэнэй хүбүүдые асаржа, самсануудыень үмдэхүүлээрэй.

¹⁵ Минии санаартад болохынь тулада эсэгынь магнайда тоһо түрхиһэн шэнгеэр түрхеэрэй. Магнайдань тоһо түрхихэдэш, хэтын хэтэдэ үеһөө үедэ дамжуулагдадаг санаартанай нэрэ зэргэ тэдээндэ үгтэхэ.

¹⁶ Моисей Эзэнэй зарлигтаһан соо жэншэдгүй наряар бултыень бүтээбэ.

¹⁷ Хоёрдохи жэлэй нэгэдэхи һарын нэгэнэй үдэр майхан һүмэ табигдаа бэлэй.

¹⁸ Моисей майхан һүмые һууридань табиба: түшэгүүдые тодхобо, тэдээн дээрэ хүреэнүүдые һуулгажа, хүндэлэбшэнүүдээр залгаба, баханануудые зогсообо,

¹⁹ майхан һүмые хушалтаар хушаба, дээрэһээнь нэмэргэ хэбэ – Эзэнэй зааһаар лэ бүтээбэ.

²⁰ Моисей хэлсээнэй бэшэг абажа, ханза соо хэбэ, ханзада һургааг модонуудые бүхэлөөд, дээрэнь арюудхалгын хушалта табиба.

²¹ Эзэнэй захирһанай ёһоор, хэлсээнэй ханзаяа майхан һүмэ соо оруулжа, хүшэгөөр хааба.

²² Майхан һүмын хойто хажуудань Моисей хүшэгын урдахана шэрээ табиба,

²³ тэрээн дээрэ Эзэнэй үмэнэ байха хилээмэ табиба. Эзэнэй өөртэнь зааһаар лэ бүтээбэ.

²⁴ Уулзалгын майхан һүмын урда хажууда, хилээмэнэй шэрээгэй урда Моисей дэн табижа,

²⁵ зулын амһартануудые Эзэнэй урда табиба. Эзэнэй өөртэнь зааһаар лэ бүтээбэ.

²⁶ Уулзалгын майхан һүмэ соо хүшэгын урда үргэлэй алтан шэрээ табижа,

²⁷ Эзэнэй зааһаар, уталга ууюулба.

²⁸ Уулзалгын майхан һүмын үүдэндэ халхалһан хүшэгэ үлгэбэ.

²⁹ Уулзалгын майхан һүмын үүдэнэй хажууда түгэс шатаалта үргэлэй шэрээ табижа, Эзэнэй зааһаар, түгэс шатаалта үргэл хэбэ, хилээмэнэй үргэл хэбэ.

³⁰ Уулзалгын майхан һүмын ба үргэлэй шэрээгэй хоорондо угаалгын амһарта табижа, уһаар дүүргэбэ.

³¹ Моисей, Аһароон ба Аһарооной хүбүүд

³² Уулзалгын майхан һүмэдэ орохын гү, али үргэлэй шэрээдэ дүтэлхын урда тэрэ амһарта соо хүл, гараа зайладаг һэн.

³³ Майхан һүмын ба үргэлэй шэрээ тойруулаад, хашаа соохи юумэ түхеэрбэ, хашаагай үүдэндэ хүшэгэ үлгэбэ. Моисей ажалаа түгэсхэбэ,

³⁴ Уулзалгын майхан һүмэ дээрэ үүлэн бууба, Эзэнэй һүр соло майхан һүмые сүм бүрхөөбэ.

³⁵ Моисей Уулзалгын майхан һүмэ руу орожо ядаба, юуб гэхэдэ, үүлэн тэрэниие далдалаа, Эзэнэй һүр соло майхан һүмые сүм эзэлээд байгаа.

Түгэсхэл

³⁶ Майхан һүмэһөө дээшээ дэгдэжэ, тэрэ үүлэнэй саашаа тамархадань, Израилиин зон замда гаража, ээлжээтэ зориһон газартаа хүрэдэг байба.

³⁷ Үүлэнэй дээшээ дэгдээгүй һаа, тэдэ һууриһаа хүдэлдэггүй, дэгдэхыень хүлеэдэг байба.

³⁸ Үдэрынь майхан һүмэ дээрэ Эзэнэй үүлэн байдаг байба, харин һүниндөө энэ үүлэн соо гал носодог байба – тэрээнииень бүхы Израиль угсаатан хараа. Тэдэнэй бүхы аян замдань хододоо тиимэ байгаа бэлэй.