Египедһээ гаралга 4 - Библи

¹ Моисей харюудань хэлэбэ: – Намда этигэнгүй, үгыем дуулангүй, «Эзэн шамда үзэгдөөгүй» гэжэ зоной хэлээ һаа, яаха болонобиб?

² Эзэн Моисейһээ: – Гарташни юун байнаб? – гэжэ асууба. – Дулды, – гэжэ Моисей харюусаба.

³ – Тэрэнээ газарта хаял даа, – гэжэ Эзэн захирба. Моисейн дулдыгаа газарта хаяхадань, тэрэнь могой болошобо. Моисей могойһоо һүрдэн тэрьелбэ.

⁴ – Гараа һарбайгаад, һүүлһээнь бари, – гэжэ Эзэн захирба. Могойн һүүлһээ Моисейн барихадань, тэрэнь һөөргөө дулды болошобо.

⁵ – Энэ хадаа Эзэнэй, тэдэнэй эсэгэнэрэй – Абраһаамай, Исаак ба Яковай Бурханай, шамда үзэгдэһэнэй гэршэ гэжэ зон ойлгог, – гэжэ Эзэн айладхаба.

⁶ Эзэн үшөө захирба: – Гараа үбэртөө хэл даа. Моисейн гараа үбэртөө хээд абахадань, гарынь нойтон хамуу үбшэнһөө саһан мэтэ сагаан болошоод байба.

⁷ – Дахяад гараа үбэр руугаа хэ, – гэжэ хэлэхэдэнь, гараа үбэртөө хээд, һөөргэнь абаба. Гарынь хуушан түхэлдөө оронхой, элүүр бэедэнь адли болоод байба.

⁸ – Шамда этигэнгүй, түрүүшын дүлгэ тэмдэгтэ үнэншэнгүй байгаа һаа, нүгөөдэ дүлгэдэ үнэншэхэ ха юм;

⁹ хоёр дүлгэдэ үнэншөөгүй, шинии үгэ дуулаагүй һаань, Нил мүрэнһөө уһа удхан абажа, эрьедэ адха. Мүрэнһөө удхаһан уһаншни хуурай газар дээрэ шуһан болошохо.

¹⁰ Моисей Эзэндэ зальбарба: – Эзэн Бурхан минии! Би үгэ хэлэндэ муу хүмби, түрэхын иимэ бэлэйб. Мүнөөшье Өөрын богоолтой хөөрэлдэжэ эхилхэдэтнай би үгэ амалхадаа ахир муулби.

¹¹ Эзэн харюудань айладаба: – Хэлэ ама хэн хүндэ үгөө юм? Хүниие хэлэхэ хэлэгүй, али шагнаха шэхэгүй хэн болгодог бэ? Хараха нюдэтэй, али хараагүй һохор хэн болгохо шадалтай юм бэ? Би, Эзэн!

¹² Зай, иигээд ошо. Шинии аманһаа үгын гарахада, Би байлсахаб, юу хэлэхыешни һургахаб.

¹³ – Эзэн Бурхан минии! Хайрлыт даа, ондоо хүниие эльгээхэ аргагүй юм гүт? – гэжэ Моисей гуйба.

¹⁴ Эзэн Моисейдэ уурлан хэлэбэ: – Левиин угай Аһароон дүүшни гэжэ байна. Үгэ хүүртээ тэрэ бэрхэ гэжэ мэдэнэм. Эндэһээ ябахадаш, урдаһаашни тэрэ ушарха, шамайе хараад, аргагүй баярлаха.

¹⁵ Тэрээндэ ши бүхы юумэ ойлгуулхаш. Хэлэхэ юумээ тэрэнэй амаар хэлэдэг байхаш. Харин юумэ хэлэхэ үедэтнай Би Өөрөө байлсахаб гэжэ хэлэнэ бэшэ аалби; юу хэхыетнай Өөрөө заахаб.

¹⁶ Тэрэ шинии орондо арадта хандан хэлэдэг байха, тэрэ шинии хэлэ аманшни болохо. Ши тэрээндэ Бурханиинь болохош.

¹⁷ Энэ дулдыгаа гартаа бари: дүлгэ тэмдэг бэелүүлхэ мэсэ зэбсэгшни гээшэ.

Моисейн Египет руу бусалга

¹⁸ Моисей хадам эсэгэ Итроодо ошожо: – Би ябахам, Египедтэ байһан аха дүүнэртээ бусахамни. Амиды юм гү тэдэмни, ошожо харахамни, – гэжэ хэлэбэ. – Тиигыш даа, аян замдаа һайн ябаарай, – гэжэ Итроо үреэбэ.

¹⁹ Мидиан угсаатанай нютагта Моисейн байхада: – Египет ошохо сагшни ерээ, шинии һүнэһэ бэдэрһэн хамаг зон наһа баранхай, – гэжэ Эзэн зарлиг буулгаһан байба.

²⁰ Моисей һамга, хүбүүдээ элжэгэндэ һуулгажа, Египет тээшэ зорибо. Бурханай дулдые гартаа баринхай ябаба.

²¹ Эзэн Моисейдэ айладаба: – Би шамда шэдитэ хүсэ үршөөбэб. Египет бусахадаа, Минии шамда даалгаһан эди шэдитэ үзэгдэлнүүдые фараоной хараһаар байтар бэелүүлээрэй. Би зорюута тэрэнэй үсэдынь хүдэлгэхэб: таанадые тэрэ табихагүй.

²² Харин ши фараондо иигэжэ дуулгахаш: «Израиль ууган хүбүүмни гэжэ Эзэн айладана.

²³ Намда үргэл хэхыень хүбүүем табииш гэнэб, табяагүй һааш, харюу болгожо, шинии ууган хүбүүнэй ами таһалхалби!»

²⁴ Харгыдаа хоножо байхадань, Эзэн ерэжэ, Моисейн ами хороохо һэдэлгэ хэбэ.

²⁵ Циппоораа һамганиинь тиихэдэнь хурса шулуугаар хүбүүнэйнгээ бэлгэ отолжо абаад, шуһыень Моисейн хүлдэ түрхибэ. Тиигээд хэлэбэ: – Шуһаар холбоотой эрэ нүхэрни ши мүн!

²⁶ Эзэн хажууһаань зайлаба. Шуһан холбоотой эрэ нүхэр гэжэ бэлгэ отололгын ушараар Циппоораа хэлээ болоно.

²⁷ – Моисейн урдаһаа сүл губи руу ошо! – гэжэ Эзэн Аһароондо зарлигтаба. Аһароон ошоходоо, Бурханай хадын хажууда Моисейтэй ушараад, тэрэниие тэбэрин таалаба.

²⁸ Өөрыень элшэ болгоһон Эзэнэй бүхы үгэнүүдые, зааһан дүлгэ үзэгдэлнүүдыень Моисей Аһароондо ойлгуулжа үгэбэ.

²⁹ Моисей Аһароон хоёр сугтаа ябажа, Израилиин аха захатаниие бултыень суглуулба.

³⁰ Моисейдэ Эзэнэй зарлиг болоһон бүгэдые Аһароон амалан, угсаатандаа ойлгуулба. Моисей арад зоной хараһаар байтар дүлгэ тэмдэгүүдые үзүүлбэ.

³¹ Арад зон одоошье үнэншэбэ. Эзэн Израилиингаа хүбүүдые анхаран, ядарал зоболонгымнай хараа гэжэ дуулахадаа, тэдэ һүгэдэн хүндэлжэ, доро дохин байгаа бэлэй.