Египедһээ гаралга 39 - Библи

Санаартанай хубсаһа хунар нэхэлгэ

¹ Сэнхир хүхэ, гүн улаан ба үдхэн улаан үнгэтэй ээрэһэн утаһаар һүмэдэ алба хэхэ хубсаһа – Аһарооной һахилай хубсаһа нэхэбэ. Тиигэжэ Эзэн Моисейдэ зарлиг болоһон байгаа.

² Алтан утаһаар, сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр эфод хэбэ.

³ Тиигэхын тулада алта дабтажа хабтайлгаад, тэрээнһээ утаһа өөлэжэ гаргаад, тэрэ утаһаараа, сэнхир хүхэ, гүн улаан ба үдхэн улаан ээрэһэн утаһаар, нарин маалингаар угалзатай бүд нэхэбэ.

⁴ Эфодой дала мүртэнь даруулгануудые оёбо.

⁵ Эфодой бүһэнь эфодтой нэгэн бүхэли шэнги байба: эфодтол адли алтан утаһаар, сэнхир хүхэ, гүн улаан ба үдхэн улаан хилгааһаар, нарин маалинга зүйлтэтэйгээр нэхэбэ. Тиигэжэ Моисейдэ Эзэн зааһан байгаа.

⁶ Угалзатай алтан гуунуудта һуулгаһан мана шулуунуудые бэлдэбэ. Шулуунууд дээрээ, тамга дээр мэтэ, Израилиин хүбүүдэй нэрэнүүд һиилэгдэбэ.

⁷ Тэдэ шулуунуудаа Израилиин хүбүүд тухай ходо һануулжа байхыень дала мүрэй даруулгануудта бүхэлбэ. Тиигэжэ Эзэн Моисейдэ зааһан байгаа.

⁸ Эфодтол адли алтан утаһаар, сэнхир хүхэ, гүн улаан ба үдхэн улаан үнгэтэй ээрэһэн хилгааһаар нарин маалинга зүйн, сээжэбшын түхэлэй уута хэбэ.

⁹ Уутаяа тэб тэбхэрхэнээр, ута, богонёороо хахад тохой хэмжээнэй хоёр дабхар бүдөөр оёбо.

¹⁰ Тэрээндээ эрдэни шулуу хэхэ дүрбэн халааһа зэргэлүүлэн оёбо. Нэгэндэнь бадмаа раага, молор, маргад;

¹¹ нүгөө зэргэдэнь – оюун, миндарга, очир;

¹² гурбадахидань – нал эрдэни, гартаам, ягаан болор;

¹³ дүрбэдэхи зэргэдэнь – бэгтэ молор, мана ба хас эрдэни. Бүхы эрдэни шулуунуудые угалзатай алтан гуунуудта һуулгаба.

¹⁴ Хамта дээрээ арбан хоёр шулуун, шулуун бүхэндэ тамга сохиһон шэнгеэр Израилиин арбан хоёр обогуудай нэгэнэйнь нэрэ һиилэгдэбэ.

¹⁵ Сээжэбшын түхэлэй уутада гэжэ шэжэр алтаар гэнжэ ооһорнуудые хэбэ.

¹⁶ Угалзатай хоёр алтан гуунуудые хэбэ. Үшөө хоёр алтан сахариг хээд, сээжэбшын углууда торгоогоод,

¹⁷ алтан хоёр гэнжээрээ

¹⁸ хоёр гуутай холбобо. Тэдэ гуунуудые эфодой даруулгануудта урдаһаань торгообо.

¹⁹ Үшөө хоёр алтан сахариг хэжэ, сээжэбшэ-уутын хоёр углууда досоо талаһаань, эфодтой уулзадаг таладань барюулба.

²⁰ Үшөө хоёр алтан сахариг хэжэ, дала мүрэй даруулгануудай доодо хирхагаар, урда талаһаа, эфодой бүһэтэй уулзадаг газарта торгообо.

²¹ Сээжэбшэ-уутын сахаригуудые эфодой сахаригуудтай сэнхир ооһороор холбобо. Тиихэдээ уутань эфодой бүһэ дээгүүр байжа, эфодтоо нягтаар няалданхай һэн. Тиигэжэ Эзэн Моисейдэ зааһан байгаа.

²² Эфод доро үмдэхэ самса сэнхир хилгааһан утаһаар нэхэбэ.

²³ Тэрээндэнь толгойгоо углаха нүхэн байба, хахархагүйн тула эрмэгыень лабаар хүбэрдэбэ, сэрэгэй хубсаһан шэнги бүхэ болобо.

²⁴ Доодо захаарнь сэнхир болон гүн улаан, үдхэн улаан үнгэтэй утаһануудаар болон нарин маалингаар анар жэмэсэй түхэлтэй булсуунуудые хэбэ,

²⁵ хоорондонь алтан хонхохонуудые үлгэбэ.

²⁶ Алтан хонхонууд болон анар жэмэсэй үрэнүүд ээлжэлэн, хурал уншалганда үмдэхэ самсын доодо захые хүбөөлһэн шэнги болобо. Тиигэжэ Эзэн Моисейдэ зааһан байгаа.

^27-28 Аһароондо ба тэрэнэй хүбүүдтэ маалинга бүдөөр самса, толгойдо хүрмэдэг бүд ба боолтонуудые, нарин маалинга бүдөөр үмдэ оёбо.

²⁹ Сэнхир хүхэ, гүн улаан, үдхэн улаан үнгэтэй ээрэһэн хилгааһаар нарин маалинга бүд зүйн, олон үнгэтэ гоё бүһэ нэхэбэ. Тиигэжэ Эзэн Моисейдэ зааһан байгаа.

³⁰ Һүмын нангин титим – алтан хабтаһа хээд, дээрэнь тамга һиилэһэн шэнгеэр «Эзэнэй нангин» гэһэн үгэнүүдые һиилэбэ.

³¹ Толгойдо хүрмэдэг бүд дээгүүр, урдаһаа, уяхын тула тэрэ хабтаһандаа сэнхир хүхэ ооһор хадаба. Тиигэжэ Эзэн Моисейдэ зааһан байгаа.

Майхан һүмын ажалай түгэсхэл

³² Уулзалгын асар майхан һүмэ бариха ажал түгэсэбэ. Израилиин зон Моисейдэ Эзэнэй зааһан зарлигаар жэншэдгүй наряар бүтээбэ.

³³ Тэдэ Моисейдэ майхан, тэрэнэй нэмэргэ болон хэрэгтэй бүхы зүйл – дэгээ түдүүлинүүдые, ханын хүреэнүүд болон хүндэлэбшэнүүдые, бахана болон доронь шудхаха түшэгүүдые,

³⁴ мүн утанжа элдэһэн хониной арһаар хэһэн хушалта ба нарин булгайр нэмэргэ, хүшэгэ,

³⁵ хэлсээнэй бэшэг хадагалдаг ханза, үргэхэ һургаагуудые, арюудхалгын хушалта,

³⁶ талханай шэрээ болон тэрэнэй амһарта, Эзэнэй урда табигдаха талха хилээмэ,

³⁷ шэжэр алтан дэн зулануудтайнь болон тэрэнэй бүхы хэрэгсэл, зулын тоһо,

³⁸ үргэлэй алтан шэрээ, магнайда түрхихэ тоһо ба уталгын хангал бодосуудые, майхан һүмэдэ орохо үүдэнэй хүшэгэ,

³⁹ үргэлэй зэд шэрээ зэд һагшууртайгаар, үргэхэ һургааг болон бусад хэрэгсэлыень, угаалгын амһарта табюуртайгаар,

⁴⁰ һүмын газаахи хашаагай хүшэгэ, бахананууд ба тэдэнэй доогуурхи түшэгүүдые, хашаагай үүдэнэй хушалта хүшэгэ, ооһорнууд болон гадаһануудые, Уулзалгын майхан һүмэ соо алба хэхын тулада хэрэгтэй бүхы хэрэгсэл,

⁴¹ һүмэдэ алба хэхэ хубсаһа – Аһароон санаартын һахилай хубсаһа ба тэрэнэй хүбүүдэй һахилай хубсаһа асараа бэлэй.

⁴² Эзэнэй Моисейдэ заан захирһанай ёһоор лэ Израилиин арад зон жэншэдгүй нарин бүтээгээ бэлэй.

⁴³ Моисей ябажа хараба, Эзэнэй захирһанай ёһоор нарин хэгдэһэн байба. Моисей тэдэниие адислан үреэбэ.