Египедһээ гаралга 38 - Библи

Түгэс шатаалта үргэлэй шэрээ бүтээлгэ

¹ Акаци модоор түгэс шатаалта үргэлэй шэрээ хэбэ. Тэрэнь тэбхэр – утаараа табан тохой ба үргэнөөрөө табан тохой, үндэрынь гурбан тохой болобо.

² Дүрбэн углууень эбэр шэнгеэр дээшэнь ёдойлгоод, үргэлэй шэрээтэй нэгэн бүхэли болгобо. Шэрээгээ зэдээр бүрин хушаба.

³ Үргэлэй шэрээгэй хэрэгсэлнүүдые: нүүрһэнэй удхуур, шуһа сүршэхэ аяга, мяханай һэрээ, согой амһарта, хайруулай табаг – бултыень зэд түмэрөөр хэбэ.

⁴ Үргэлэй шэрээдэ хабтагар зэд һагшуур шэнгеэр нүхэлжэ, үргэлэй шэрээгэй захаһаа доошоо, хахадтань хүрэтэр барижа бүхэлбэ.

⁵ Модон һургааг хэхэ дүрбэн сахариг шудхажа, зэд һагшуурай дүрбэн углууда бүхэлбэ.

⁶ Акаци модоор һургаагуудые хайжа, зэд түмэрөөр бүрибэ.

⁷ Үргэлэй шэрээ зөөхэ хэрэгтэй болоо һаань, тэдэ һургаагуудаа хажуу тээхи сахаригуудта оруулдаг байха юм. Үргэлэй шэрээ досоогоо хүнды, хабтагайгаар хэгдэбэ.

⁸ Мүн майхан һүмын үүдэндэ алба хэдэг эхэнэрнүүдэй толиин зэд абажа, угаабариин амһарта ба табюур хэбэ.

⁹ Удаань тэрэ һүмэеэ тойруулаад хашаа хэбэ. Урда талаһаань нарин маалинга бүдөөр хэһэн зуун тохойн шэнээн утатай далбагар хүшэгэ байба.

¹⁰ Тэрэнээ хорин баханада үлгэбэ. Бахана доро зэд түмэрөөр хорин түшэг хэжэ бүхэлбэ. Бахана дээрэхи дэгээ холболтонуудыень мүнгөөр хэбэ.

¹¹ Мүн хойто талаһаа зуун тохой утатай далбагар хүшэгэ доогуураа хорин зэд түшэгтэй хорин баханада үлгэбэ. Бахана дээрэхи дэгээ холболтонуудынь мүнгөөр хэгдэбэ.

¹² Баруун хажууһаа хашаагай үргэнөөрнь табин тохой утатай далбагар хүшэгэ арбан баханада үлгэгдэбэ, арбан түшэг бахананууд доро шудхагдаба. Баханын дэгээ холболтонуудынь мүнгөөр хэгдэбэ.

¹³ Зүүн тээһээ хашаагай үргэниинь баһал табин тохой болобо.

¹⁴ Орохо үүдэнһээ нэгэ тээшэ арбан табан тохой утатай далбагар хүшэгэ гурбан түшэгтэй гурбан баханада татагдаба.

¹⁵ Хаалгаһаа нүгөө тээшээ баһал арбан табан тохой утатай гурбан түшэгтэ һуулгаһан гурбан баханатай хүшэгэ хэгдэбэ.

¹⁶ Хашаагай бүхы далбагар хүшэгэнүүд нарин маалинга бүдөөр хэгдэбэ,

¹⁷ баханын түшэгүүд зэд түмэрөөр шудхагдаба, баханын дэгээнүүд болон холболтонууд мүнгөөр хэгдэбэ. Баханын оройе мүнгөөр хушаба. Хашаагай бүхы бахананууд мүнгэн холболтонуудаар холбогдобо.

¹⁸ Хашаагай үүдэнэй хүшэгэ сэнхир хүхэ, гүн улаан ба үдхэн улаан үнгэтэй ээрэһэн хилгааһан утаһаар нэхэгдэжэ, нарин маалинга бүдтэй зүйгдэбэ. Хорин тохой утатай байба. Нэмэргын үндэр хашаагайхи шэнги табан тохой болобо.

¹⁹ Үүдэндэ дүрбэн зэд түшэг дээрэ дүрбэн бахана һуулгагдаа; баханын дэгээнүүдые мүнгөөр хээ. Баханын орой мүнгэн, холболтонуудынь мүнгэн болобо.

²⁰ Майхан һүмын ба хашаагай халхабшын гадаһанууд зэдээр хэгдэбэ.

Алта, мүнгэ ба зэдэй жагсаал

²¹ Аһароон санаартанай хүбүүн Итамаарай ударидалга доро левидүүд Моисейн захиралтаар хэлсээнэй майхан һүмын хамаг гаргашын тоо бүридхэбэ.

²² Иудын обогой Хуурай хүбүүн болохо Үриин хүбүүн Бэцалээл Эзэнэй Моисейгээр дамжуулан зарлигтаһыень дууһан бүтээбэ.

²³ Уран һиилүүршэ, угалзатай бүд, сэнхир хүхэ, гүн улаан ба үдхэн улаан утаһа хилгааһаар, нарин маалинга бүдөөр үзэсхэлэнтэ үнгэтэй бүд нэхэхэ уран шадабаритай Даан обогой Ахисамаахай хүбүүн Оһолиааб тэрээнтэй суг байгаа.

²⁴ Нангин һүмын барилгада хэрэглэгдэһэн үргэлэй алтан гэхэдэ, хорин юһэн талаант ба долоон зуун гушан шээкэл хэмжээнэй болобо (нангин һүмын шээкэлэй хэмжээгээр).

²⁵ Ниигэм зоной тоо бүридхэлэй үедэ суглуулагдаһан сагаан мүнгэн зуун талаант ба мянга долоон зуун далан табан шээкэл болобо (нангин һүмын шээкэлэй хэмжээгээр):

²⁶ бүридхэлдэ ороһон хори наһанһаа дээшэ амин бүхэнһөө (зургаан зуун гурба мянга табан зуун табин хүн) һүмын хахад шээкэлэй хэмжээгээр абтаба.

²⁷ Нэгэ талаант мүнгэн һүмын баханануудай ба хашаагай баханануудай түшэг шудхалгада оробо: зуун түшэгтэ – зуун талаант.

²⁸ Баханануудай дэгээ холболтонуудта ба баханануудай оройе мүнгөөр бүрилгэдэ нэгэ мянган долоон зуун далан табан шээкэл сагаан мүнгэ гаргашалба.

²⁹ Үргэлөөр ороһон зэд түмэр далан талаант ба хоёр мянга дүрбэн зуун шээкэл болобо.

³⁰ Тэрээгээр Уулзалгын майхан һүмын үүдэндэ баханануудай түшэгүүдые, һагшуур түмэртэй үргэлэй шэрээ болон тэрэнэй хэрэгсэл,

³¹ хашаагай хүшэгын ба хашаагай үүдэнэй баханануудай түшэгүүдые, майхан һүмын ба газаа халхабшын гадаһануудые хэбэ.