Египедһээ гаралга 37 - Библи

Хэлсээнэй ханза

¹ Уран гарта Бэцалээл акаци модоор хоёр хахад тохой утатай, нэгэ хахад тохой үргэнтэй ба үндэртэй ханза хэжэ,

² газаа, зосооһоонь шэжэр алтаар хушажа, тойруулаад шэжэр алтаар хүбөөлбэ.

³ Дүрбэн алтан сахариг хэжэ, ханзын дүрбэн хүлдэ бүхэлбэ: ханзын нэгэ хажууһаа хоёр сахариг, нүгөө тээһээнь хоёр сахариг.

⁴ Акаци модоор һургаагуудые хэжэ, алтаар дабтан бүрибэ,

⁵ ханзын хоёр хажуугай сахаригуудта оруулба. Тэрэ һургааг модондо ханзаяа тээгээд ябаха боломжотой болобо.

⁶ Ханзые хааха хабхаг сэбэр алтаар бүтээбэ; утань хоёр хахад тохойн, үргэниинь нэгэ хахад тохойн хэмжээнэй байба.

⁷ Хабхагай хоёр захаарнь алтаар дабтажа, хоёр херүүбэй дүрсэ урлаба.

⁸ Тэдэнь хабхагтай нэгэн бүхэли зүйл болохо.

⁹ Урда урдаһаа зогсоод, хабхаг тээшэ шэртэн, далияа дээгүүрнь дэлгэжэ байба.

Шэрээ

¹⁰ Акаци модоор хоёр тохой утатай, тохой үргэнтэй, тохой хахад үндэртэй шэрээ хэбэ.

¹¹ Алта дабтажа, шэрээгээ бүреэд, алтаар хүбөөлбэ.

¹² Захаарнь альганай шэнээн үндэр хана хээд, баһал алтаар хүбөөлбэ.

¹³ Алтан сахаригуудые хээд, шэрээгэй дүрбэн углууда хүл дээгүүрнь торгообо.

¹⁴ Ханада няалдаһан тэдэ сахаригуудта һургаагуудые хээд, шэрээгээ үргэжэ һууриһаань хүдэлгэхэдэ болоно.

¹⁵ Шэрээ зөөхэ һургаагуудые баһал акаци модоор хэжэ, баһал алтаар бүрибэ.

¹⁶ Мүн лэ сэбэр алтаар шэрээ дээрэ байха, сэржэмдэ хэрэгтэй болохо амһарта – табаг, шанага, аяга, домбо хэбэ.

Алтан дэн

¹⁷ Сэбэр алта дабтажа, модоной түхэлтэй дэн бүтээбэ. Эшэ болон һалаануудынь, һалаа дээрэ табигдаха зулын амһарта, оёортонь дэнгэй гол бариха амһарта, сэсэгэй һалаа дэльбэнүүд бүгэдэ нэгэн бүхэли боложо харагдаба.

¹⁸ Дэнгэй модон зургаан һалаатай байба: гурбаниинь нэгэ талаһаань, нүгөө гурбань нүгөөдэ талаһаань.

¹⁹ Зургаан һалаа бүхэндэ бүйлсын сэсэг шэнги дэльбэтэй, оёортоо булсатай гурбан аягаханууд һууба.

²⁰ Дэнгэй оройдонь бүйлсын сэсэг мэтэ дүрбэн сэсэг хэбэ.

²¹ Хоёролжон һалаанууд доро аягын һуури, нүгөө хоёр һалаа доро аягын һуури, гурбадахи хоёролжон һалаа доро баһал аягын һуури: бүхы зургаан һалаа доро тиимэ һууринуудые хэбэ.

²² Сэбэр алтаар дабтан бүтээһэн зулын голой амһартанууд, һалаануудынь дэнтэеэ нэгэн бүхэли болобо.

²³ Долоон дэн хэбэ, зулын голой хабшуур, согой амһарта сэбэр алтаар бүтээбэ.

²⁴ Дэндэ болон тэрэнэй бүхы хэрэгсэлдэ нэгэ талаант хэмжээнэй шэжэр алта гаргашалагдаба.

Сан санзайн ууюулгын шэрээ

²⁵ Акаци модоор сан санзай ууюулгын шэрээ бүтээбэ. Тэрэнь тэбхэр түхэлтэй, ута үргэнөөрөө тохой, үндэрөөрөө хоёр тохой болобо. Эбэр мэтээр ёдойһон дүрбэн углуунуудтаяа нэгэн бүхэли зүйл болобо.

²⁶ Оройень, хажуу талыень ба эбэртэ углуунуудыень шэжэр алтаар хушаба, тойруулан алтан хүбөө хэбэ.

²⁷ Алтаар хоёр сахариг хэжэ, хүбөө доогуурнь бүхэлэн торгобо. Сахаригуудтаа модон һургааг углажа, үргэлэй шэрээгээ үргөөд ябахаар болгобо.

²⁸ Һургаагуудаа мүн лэ акаци модоор хэжэ, алтаар бүрибэ.

²⁹ Магнайда түрхидэг ёһололой нангин тоһо болон уталгада хэрэгтэй һайхан хангалтай бодос сэбэрээр, шадамараар найруулба.