Египедһээ гаралга 36 - Библи

Майхан һүмэ

¹ Һүмэ барихынь тулада Эзэнэй мэргэн ухаа, оюун мэдэсэ үршөөһэн Бэцалээл, Оһолиааб болон бүхы уран шадабаритан Эзэнэй зааһан соонь жэншэдгүй нарин бүтээхэ ёһотой.

² Моисей Бэцалээлые, Оһолиаабые ба Эзэнэй шадабари үгэһэн, ажал хэхэ хүсэлтэй зониие дуудаба.

³ Тэдэ Моисейһээ һүмын барилгада гэжэ зоной үргэһэн зүйлнүүдые абаба. Зон шэнэ шэнэ бэлэгүүдые үглөө бүри асаржал байба.

⁴ Һүмэ барижа байгшад тиихэдэнь ажалаа зогсоожо,

⁵ Моисейдэ ерээд, хэлэбэ: – Эзэнэй зарлиг болоһон ажалһаа үлүү юумэ зон асаржа байнал, яаха гээшэбибди?

⁶ Һүмэдэ үргэл гэжэ эхэнэр, эрэшүүлшье асархаяа болиг гэжэ захиралта Моисей хүреэ соо байһан хамаг зондо дуулгахыень соносхобо. Тиин зонһоо үргэлэй юумэ абахаяа болибо:

⁷ хүрэхөөр юумэн сугларһан, хэрэгтэй хэмжээнһээ үлүү болоһон байгаа.

⁸ Ажалаа захалһан уран гартан майхан һүмэдэ гэжэ нимгэн маалинга бүдөөр, сэнхир хүхэ, гүн улаан ба үдхэн улаан үнгэтэй утаһаар үргэн энтэй арбан хэһэг бүд нэхэбэ; тэрээн бүхэндэнь херүүбүүдэй зураг нэхэгдэбэ.

⁹ Далбагар бүдэй хэһэг бүхэнэй утань хори найман тохой, үргэниинь дүрбэн тохой болобо; арбан хэһэг бүдынь аб адли хэмжээнэй байба.

¹⁰ Удаань таба табаар тэдэнээ холбожо оёбо.

¹¹ Захын бүдүүдэй эрмэгтэ сэнхир хүхэ түдүүлинүүдые хадаба, тиимэ түдүүлинүүдые нүгөө хэһэгэй захаар хадаба.

¹² Нэгэ хажууһаань табин түдүүли, нүгөө тээнь баһал табин түдүүли.

¹³ Табин алтан тобшонуудаар тобшолжо, хоёр хэһэгээ ниилүүлжэ, майхан һүмын зосоо нэмэргэ болобо.

¹⁴ Газаа нэмэргэ гэжэ ямаанай хөөбэр нооһоор үргэн энтэй арба нэгэн далбагар бүд нэхэбэ.

¹⁵ Далбагар бүд бүхэнэй утань гушан тохой, үргэниинь дүрбэн тохой болобо; бүхы арба нэгэн бүдынь аб адли хэмжээнэй байгаа.

¹⁶ Табыень нэгэ талын болгожо зүйбэ, зургааень нүгөө талын болгожо хамта холбобо.

¹⁷ Нэгэ хэһэгэй захаарнь табин түдүүли, нүгөө тээнь баһал табин түдүүли хадаба.

¹⁸ Зэдээр табин тобшо хэжэ, нэгэ нэмэргэ болгон, хоёр хубияа ниилүүлбэ.

¹⁹ Утан элдэһэн хониной арһаар дээрэһээнь хушалта хэбэ, үшөө тэрээнээ нарин элдэлгэтэй булгайраар хушаба.

²⁰ Майхан һүмэдөө акаци модоор ханын хүреэнүүдые хэбэ.

²¹ Хүреэ бүхэн утаараа арбан тохой ба үргэнөөрөө тохой хахад болобо.

²² Хоёр модо хүндэлэбшөөр холбожо хэбэ. Тиигэжэ майхан һүмын бүхы хүреэнүүдые холбобо.

²³ Майхан һүмын урда ханада гэжэ хорин хүреэ,

²⁴ хүреэ һуулгахада мүнгөөр хэһэн дүшэн түшэг хэбэ. Тиихэдэнь хүреэ бүхэнэй хормойдо, хоёр хүндэлэбшэдэнь тулгаһан хоёр хоёр түшэг болобо.

²⁵ Һүмын ара талын хойто ханадань мүн лэ хорин хүреэ

²⁶ ба хүреэ бүхэндэнь хоёр түшэг, хамтадаа дүшэн түшэг хэбэ.

²⁷ Майхан һүмын ара талын баруун ханада зургаан хүреэ,

²⁸ ара талын углуунуудтань үшөө хоёр хүреэ хэгдэбэ.

²⁹ Тэдэнээ доогуурнь асатуулба, харин дээгүүрнь (нэгэдэхи сахариг углаха газартань) бүхэлеэр хэбэ. Тиимэ хоёр хүреэ хэгдэбэ, углуу бүхэндэнь – нэгэ нэгэ.

³⁰ Эдэ найман хүреэнүүдэй һуурида арбан зургаан мүнгэн түшэг хэжэ һуулгаба.

³¹ Акаци модоор хүндэлэбшэнүүдые хэбэ: майхан һүмын нэгэ ханын хүреэнүүдые холбохо табан хүдэлэбшэ,

³² нүгөө ханын хүреэнүүдые холбохо табан хүндэлэбшэ, ара талын баруун хана бүхэлхэ үшөө табан хүндэлэбшэ.

³³ Дундахи хүндэлэбшэнь ханын хоёр захаһаа хүреэнүүдые холбобо.

³⁴ Хүреэнүүдээ алтаар бүрижэ, хүндэлэбшэтэй холбохын тулада алтан сахаригуудые хэбэ. Хүндэлэбшэнүүдээ баһал алтаар бүрибэ.

³⁵ Сэнхир хүхэ, гүн улаан ба үдхэн улаан үнгэтэй утаһаар ба нимгэн маалинга бүдөөр хүшэгэ нэхэбэ; тэрээн дээрэ херүүбүүдэй дүрэнүүд нэхэгдэбэ.

³⁶ Тэрээндээ акаци модоор дүрбэн бахана бэлдэжэ, алтаар хушаба, алтан дэгээнүүдые хэжэ, дүрбэн түшэг мүнгөөр шудхажа, баханануудаа һуулгаба.

³⁷ Сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр майхан һүмэ руу орохо газарые халхалдаг олон үнгэтэ хүшэгэ хэбэ.

³⁸ Дэгээнүүдтэй табан бахана хэбэ, баханануудаа дээрэ-дороһоонь алтаар бүрибэ, зэдээр хэһэн түшэгүүдые һуулгаба.