Египедһээ гаралга 33 - Библи

Израилиин хүбүүдтэ үгтэһэн Эзэнэй зарлиг

¹ Эзэн Моисейдэ айладаба: – Египедһээ гаргаһан арад угсаатантайгаа эндэһээ ябагты. Хойто үеын удамдань үгэхэб гэжэ Абраһаамда, Исаагта ба Яковта тангариглаһан газар тээшэ ошогты.

² Танай урда Өөрын Эльгээмэлые ябуулжа, ханаһаан, эмоор, хээт, пэриззии, хиив ба евүүс угсаатаниие үлдэхэб.

³ Һү тарагаар, бал тоһоор дэлбэржэ байһан тэрэ газарта ошогты! Би тантай ошохогүйб. Юуб гэхэдэ, үсэдһөөтнай хилэнлэн, таанадые усадхажа магадгүйб гэжэ һанан нарилнаб.

⁴ Һүрөөтэ үгэнүүдые дуулаһан зон гэмшэлэн уйлалдаба, зүүдхэлнүүдээ бэшэ үмдэбэгүй.

⁵ Эзэн Моисейдэ зарлиг болобо: – Израилиин зондо иигэжэ хэлэ: «Таанар үсэд зон байнат, суг ошоо һаа, агшан зуура таанадые усадхажа магадгүйб! Шэмэглэл зүүдхэлнүүдээ бэеһээ тайлагты. Юу хэхэеэ хаража үзэхэб».

⁶ Хорээб хадын хажууда Израилиин зон зүүдхэлнүүдээ тайлажа, бэшэ үмдөөгүй.

⁷ Тэрэ гэһээр Моисей майхан һүмэ гэжэ нэрлэдэг майханаа хотон хүреэнһөө холуур табидаг болобо. Хэн нэгэнэй Эзэндэ хандаха гээ һаа, Моисей хүреэнһөө гаража, майхан һүмэдэ ошодог болоо һэн.

⁸ Моисейн майхан һүмэдэ оротор өөһэдын майхангуудай хажууда зогсон харагша бэлэй.

⁹ Ороходонь, үүлэн бахана доошоо майхан һүмын үүдэнэй хажууда буудаг, тиигээд Эзэн Моисейтэй хөөрэлдэгшэ бэлэй.

¹⁰ Үүлэн бахана харамсаараа зон бултадаа майхангуудайнгаа хажууда газар эльгэлэн унадаг һэн.

¹¹ Эзэн Моисейтэй урда урдаһаа харалсан хүнтэй хөөрэлдэжэ байһан шэнгеэр хөөрэлдэгшэ һэн. Удаань Моисей хүреэндээ бусадаг, харин Моисейн туһалагша Нүүнэй хүбүүн Иисүүс майхан һүмэһөөн гарадаггүй бэлэй.

Эзэнэй найдуулга

¹² Моисей Эзэндэ хэлэбэ: – Энэ арадые саашань дахуула гэжэ намда айладахыеньшье айладаат, харин намтай хэниие эльгээхэеэ зарлиглаагүйт. Минии нэрэ һананаб гэжэ намда айладаа һэнта, сэдьхэлдэм намайе тааранаш гээ һэнта.

¹³ Тиимэ һаань, замаа мэдүүлыт, һанаандатнай таараха юумэ минии хэхын тулада Таниие ойлгохо арга олгуулыт. Эдэ зон Танайл арад ха юм!

¹⁴ – Би Өөрөө тантай ябажа, шамда туһалхаб, – гэжэ Эзэн айладаба.

¹⁵ Моисей Эзэндэ хэлэбэ: – Маанадтай ошохогүй һаа, эндэһээ ябахыемнай бү баадхыт.

¹⁶ Угсаата арадтаа талархажа байһанайтнай гэршэ ямар бэ? Маанадтай ябаха гээшэтнайл болоно! Тиибэл, дэлхэйн ондоо арадуудһаа бидэниие үлүү тооһонойтнай гэршэ энэ мүн лэ даа.

¹⁷ Эзэн Моисейдэ харюусаба: – Би энэ гуйлтыеш дүүргэхэб, юуб гэхэдэ, Минии һанаанда ши тааранаш, Би шамайе нэрээршни мэдэдэг болооб.

¹⁸ – Һүр солоёо намда үзүүлыт! – гэжэ Моисей гуйба.

¹⁹ Эзэн айладаба: – Бүхы һайн һайханаа урдууршни гаргахаб, шинии урда Өөрын нэрэ тунхаглахаб. Хэниие үршөөлдэ хүртөөхэ гэбэл, хүртөөхэб, хэниие хайрлаха гэбэл, хайрлахаб.

²⁰ Харин Минии нюур хаража шадахагүйш. Ямаршье хүн Минии нюур хараад, амиды үлөө гэжэ байгаагүй юм.

²¹ – Намда дүтэ энэ хабсагай дээрэ зогсохош, – гэжэ Эзэн Моисейдэ айладаба. –

²² Минии һүр солын хажуугаар гарахада, хабсагайн забһарай хабшалда шамайе хоргодуулан, гараараа халхалхаб. Үнгэрһэн хойноо

²³ гараа абахадам, ши Намайе хойноһоом үзэхэш, нюурыем харахагүйш.