Египедһээ гаралга 32 - Библи

Алтан тугал

¹ Моисей хадаһаа бусанагүй гэжэ зон харажал байба. Аһароониие тойрон иигэжэ хэлэбэ: – Маанадые дахуулха бурхан бүтээгыш. Харин Египедһээ маанадые гаргаһан энэ Моисейтэй юуншье болоһониие мэдэхын аргагүй.

² – Танай һамгадай, хүбүүд, басагадай шэхэнэй һиихэнүүдые абажа, намда асарагты, – гэжэ Аһароон тэдэниие зонхилбо.

³ Зон Аһароондо алтан һиихэнүүдээ үгэбэ һэн ха,

⁴ Аһароон тэдэнииень хайлуулжа, тугалай хүрэг бүтээбэ. – Израиль, шамайе Египедһээ гаргаһан Бурханшни бэеэрээл! – гэжэ зон дуугаралдаба.

⁵ Энээниие харахадаа, Аһароон тугалай урда үргэлэй шэрээ бодхоожо тунхаглаба: – Үглөөдэр Эзэнэй һайндэр!

⁶ Хойто үглөөгүүрнь тэдэ түгэс шатаалта үргэл ба амгалан байдалай түлөө үргэл үргэбэ. Һүүлээрнь эдихэ, уухаяа һууба, найрлажа хүхижэ оробо.

⁷ – Хадаһаа бууха болобош, – гэжэ Эзэн Моисейдэ айладаба. – Египедһээ гаргаһан угсаатаншни забхайрһан зон лэ байна даа.

⁸ Минии зааһан замһаа ямаршье түргэн тэдэ хадуурба гээшэб даа! Тэдэ өөһэдтөө тугалай хүрэг хээд, тэрээндэ мүргэжэ байнал. Тэдэ «Израиль, шамайе Египедһээ гаргаһан Бурханшни бэеэрээл!» гэлдэнэ.

⁹ Эзэн айладаба: – Яагаа үсэд зэрюу зон гээшэб гэжэ гайханам!

¹⁰ Уур хилэнсэгээ дээрэнь адхажа, тэдэниие һүнөөхэм, бү һаад хэ, харин шамайе агууехэ арадай эхи табиһан элинсэгынь болгохоб!

¹¹ Моисей гараа хабсаруулан, Эзэн Бурханаа аргадажа эхилбэ. – Эзэн! – гэбэ тэрэ. – Агууехэ хүсөөрөө, агуу шадалаараа Египедһээ гаргаһан Өөрын арадта уур хилэн болоһоной үрэ ямар юм?!

¹² Энэ арадые үхэлдэнь хүтэлжэ гараа юм байна, хада уулын хормойдо абаашан, хатуу шангаар нэрбэжэ, газарай нюрууһаа үгы болгожо орхибол гэжэ Тан тухай египет зон хэлсэхэл, энэ хэндэ хэрэгтэйб?! Уур хилэнсэгээ номгоруулыт, үршөөгыт Өөрын арадые, бү һүнөөгыт!

¹³ Өөрын богоолнууд Абраһаам, Исаак ба Израильда юун тухай тангариг үгэһэнөө һаныт – тэдэнэй уг удамые тэнгэриин одо мүшэд шэнги олон болгохоб, тэдээндэ гэжэ найдуулһан газараа уг удамдань хэтын хэтэдэ эзэмшэн һуухыень үршөөхэб гэжэ Өөрыгөө гэршэ болгон тангариглаа бэлэйт!

¹⁴ Эзэн уур хилэнсэгээ номгоруулба. Өөрын арад угсаатаниие һүнөөхэ гэжэ забдаһан аад, болибо.

¹⁵ Моисей хадаһаа доошоо бууба. Гартаа хэлсээнэй хоёр шулуун хабтаһа баринхай.

¹⁶ Тэдэ хабтаһануудые Бурхан Өөрөө бүтээгээ, бэшэгүүдыеньшье хабтаһанууд дээрэ Өөрөө һиилэн зураа.

¹⁷ Энэ хирэдэ доро байһан зоной шууяан Иисүүсэй һонорто хүрэбэ. – Хотон хүреэндэмнай байлдаанай шууяан дуулданал! – гэжэ тэрэ Моисейдэ хэлэбэ.

¹⁸ – Энэ илалтын дуун бэшэ, энэ илагдаһанай ёолоон бэшэ! Архиин зугаа дуулданал! – гэжэ Моисей харюусаба.

¹⁹ Хүреэндэ дүтэлхэдөө, Моисей алтан тугалыень хараба. Зугаа дэлгэжэ, хатаржа байһан зониие хараба. Уур сухалда абтаһан Моисей абажа ерэһэн шулуун хабтаһануудаа хадын хормойдохи газарта биса хаяба.

²⁰ Тугалай хүрэгые галда хаяжа хайлуулаад, уйгааг тоброог болоторнь нюдэбэ. Тэрэнээ уһа руу хаяжа, Израилиин зониие үтэр уугты гэжэ зандаран, тэрэ уһыень уулгаба.

²¹ – Танай урда ямар гэмтэйдэнь энэ арадые иигэжэ нүгэлдэ түлхибэт? – гэжэ Моисей Аһароонһоо асууба.

²² Аһароон иимэ харюу үгэбэ: – Бү сухалдыш, эзэн минии! Эдэ зоной муу юумэндэ абьяастайень өөрөөш мэдэнэ ха юмши.

²³ Тэдэ иигэжэ хэлээл: «Маанадые дахуулха бурхан бүтээжэ үгыш. Египедһээ маниие гаргаһан Моисейтэй юуншье болоһые мэдэхын аргагүй!»

²⁴ Алтан һиихэ зүүдхэлнүүдээ асарагты намда гээ бэлэйб. Тэрэ алтыень галда хаяхадам, иимэ тугал болоол!

²⁵ Зон мэдэлһээм гараа гэжэ Моисей ойлгобо. Аһароон лэ иимэ үйлэ хэжэ, дайсадайнь наадан болгобо ха юм.

²⁶ Хүреэгэй үүдэндэ зогсоод, Моисей хэлэбэ: – Хэн Эзэндэ урбаагүйб? Нам тээшэ дүтэлэгты! Левиин бүхы хүбүүд хажуудань ерэбэ.

²⁷ Моисей тэдээндэ захиралта үгэбэ: – Израилиин Эзэн Бурхан зарлиг болобо: һэлмэеэ барижа, хүреэ соогуур, хаалтаһаа хаалта хүрэтэр һэтэ гарагты! Аха дүүшье байг, анда нүхэршье байг, хаяа хадхадаг хүршэшье байг, хамаагүй, сабшажа алагты!

²⁸ Левиин хүбүүд захиралтыень шууд дүүргэбэ. Тэрэ үдэр гурба мянган шахуу хүн алуулаа бэлэй.

²⁹ – Мүнөө таанад, – гэбэ тэдээндэ Моисей. – Аха дүү болон үри хүбүүдэйнгөө ами наһаар түлөөһэ оруулжа, Эзэнэй санаартад бологты! Тэрэл ушарта Эзэнэй үреэл үршөөлдэ хүртэхэт!

³⁰ Хойто үглөөнь Моисей арад зондо хэлэбэ: – Нүгэлтнай хэмжэшэгүй ехэ! Гэбэшье би Эзэндэ ошохом, гэмытнай сагааруулха арга олдожо магад.

³¹ Эзэндэ ошоод, Моисей хэлэбэ: – Эдэ зон хэмжэшэгүй ехэ нүгэл үйлэдөө. Өөһэдтөө алтаар бурханиие хээ.

³² Үршөөхэ гээшэ гүт? Үгы гэжэ харюусабал, намайешье Өөрын Номһоо зуража хаяыт!

³³ Эзэн харюу үгэбэ: – Намда эсэргүүсэн, нүгэл хэһэн хүнүүдые Өөрын Ном сооһоо баллахаб.

³⁴ Минии зааһан газарта зоноо ошожо асара. Минии Эльгээмэл урдашни ябаха. Хэһээлтын үдэрэй ерэхэдэ, нүгэлынь амсуулхаб.

³⁵ Тиигэжэ Эзэн Израилиин арадые Аһарооной хэһэн тугалай түлөө хэһээгээ һэн.