Египедһээ гаралга 31 - Библи

Субботын үдэрые сахилга

¹ Эзэн Моисейдэ айладаба:

² – Иудын обогой Бэцалээлые шэлээб. Бэцалээл Үриин хүбүүн, Үрии Хуурай хүбүүн.

³ Бурханай һүлдөөр тэрэниие дүүргээб. Тэрээндэ мэргэн ухаа, оюун мэдэсэ, хамаг урлалай үндэр шадабари үршөөгөөб.

⁴ Тэрэ алта мүнгэн, зэд гэхэ мэтэ хамаг түмэрөөр аргагүй бэрхэ дархан болоо.

⁵ Эрдэни шулуу өөлэжэ, гуу хүреэдэ һуулгажа шадаха, модо һиилэхэ, юрэдөө бүхы урлал шадаха.

⁶ Туһалагшаар тэрээндэ Даан обогой Ахисамаахай хүбүүн Оһолиаабые үгэбэб. Шадаха, туһалха зондо һүбэлгэн ухаа, уран шадабари хүртөөбэ гээшэб. Минии шамда захирһан юумэ бүгэдыень тэдэ хүүжэг:

⁷ Майхан һүмэ, хэлсээнэй бэшэгэй ханза, ханзын арюудхалай хушалта болон майхан һүмын хамаг хэрэгсэл,

⁸ талханай шэрээ амһартатайнь, шэжэр алтан дэн бүхы хэрэгсэлтэйнь, уталгын үргэлэй шэрээ,

⁹ түгэс шатаалта үргэлэй шэрээ, бүхы хогшол хэрэгсэлтэйнь, угаалгын амһарта табюуртайнь,

¹⁰ Аһароон санаартанай һахилай нангин хубсаһа ба хүбүүдэйнь санаартан болоходоо үмдэхэ хубсаһа хунар,

¹¹ дээдын шэрээдэ үргэмжэлэн һуулгаха ёһололой тоһо болон һүмэ соо ууюулха хүжэ санзай – Би шамда айладаа бэлэйб, бултыень айладаһаарни бүтээгүүжэг.

¹² Эзэн Моисейе зонхилбо:

¹³ – Минии суббото сахиха гэжэ Израилиин зондо хэлэ. Суббото хадаа Минии таанадтай хэлсэһэнэй, Эзэнэй таанадые шэлэжэ абаһые үеһөө үедэ һанажа ябахыетнай тогтооһон тэмдэг гээшэ.

¹⁴ Субботые сахин байгты: тэрэ хадаа таанадта нангин мүн. Субботые бузарлаһан хүн хороогдохо, тэрэ үдэр ажал хэһэн хүн угсаатанайнгаа тоодо тоогдохоёо болихо.

¹⁵ Зургаан үдэр хүдэлхэ ёһотой, харин долоодохи үдэр хадаа суббото, амаралтын үдэр, Эзэнэй нангин үдэр мүн. Субботодо ажал хэһэн хүн бүхэн усадхагдаха.

¹⁶ Израилиин улад зон үеһөө үедэ субботые сахин байг. Энэ болбол хэтэ мүнхын хэлсээн.

¹⁷ Минии ба Израиль угсаатанай хоорондо хэтэдэ баталагдаһан тэмдэг энэ болоно. Юуб гэбэл, Эзэн тэнгэри газар хоёрые зургаан үдэр соо байгуулаа, харин долоодохи үдэртөө тэнюун сэдьхэлтэйгээр амараа бэлэй.

¹⁸ Синай дээрэ Моисейтэй хөөрэлдэжэ дүүргэхэдөө, Эзэн тэрээндэ Өөрын гараар һиилэһэн Хэлсээнэй хоёр шулуун хабтаһа үгэбэ.