Египедһээ гаралга 30 - Библи

Сан санзай ууюулгын шэрээ бүтээлгэ

¹ Акаци модоор сан санзай ууюулгын шэрээ бүтээ.

² Тэрэшни тэбхэр түхэлтэй, ута үргэнөөрөө тохой, үндэрөөрөө хоёр тохой байха ёһотой. Эбэр мэтээр ёдойһон дүрбэн углуунуудтаяа нэгэн бүхэли болохо.

³ Оройень, хажуу талыень, эбэртэ углуунуудыень шэжэр алтаар хушахаш, тойруулан алтан хүбөө хэхэш.

⁴ Алтаар хоёр сахариг хэжэ, хүбөө доогуурнь бүхэлэн торгохо болоно. Сахаригуудтаа модон һургааг углажа, үргэлэй шэрээгээ үргөөд ябахат.

⁵ Һургааг акаци модоор хэхэт, мүн лэ алтаар хушахат.

⁶ Хэлсээнэй бэшэгтэй ханза халхалһан хүшэгын хажууда шамтай уулзахын үедөө Минии дээрэнь оршодог арюудхалгын хушалтын үмэнэ тэрэ үргэлэй шэрээ табигдаха ёһотой.

^7-8 Энэ шэрээ дээрэ хүжэ санзай ууяжа байха – Аһароон үглөө бүри бүхэһэн зула дэнгүүдээ заһан шэнэлдэг, үдэшэ бүри носоодог уялгатай байг. Эзэнэй үмэнэ хүжэ санзай саг үргэлжэ, үеһөө үедэ утагдажа байха ёһотой.

⁹ Энэ үргэлэй шэрээ дээрэ ондоо зорилгоор уталга, түгэс шатаалта үргэл, талхан үргэл, сэржэм үргэжэ болохогүй.

¹⁰ Жэлэй нэгэ дахин Аһароон шэрээгэй эбэрнүүдтэ шуһа сүршэжэ, арюудхалгын ёһо заншал үнгэргэдэг байг. Үеһөө үедэ жэлэй нэгэ удаа нүгэл сагааруулгын үргэлэй шуһаар сэбэрлэгдэдэг энэ арюудхалга Эзэнэй нангинай нангин зүйл болоно.

¹¹ Эзэн Моисейдэ айладаба:

¹² – Израильшуудай тоо бүридхэл хэхэ үедэ эрэ хүн бүхэн тоо бүридхэлһээ боложо өөртөө аюул ушаруулхагүйн тула Эзэндэ түлөөһэ оруулха ёһотой.

¹³ Тоо бүридхэлэй үедэ хүн бүхэн хадаа нангин шээкэлэй хахадыень (шээкэл – хорин гер) һүмэдэ оруулаг. Энэ бол Эзэндэ үргэл.

¹⁴ Хори наһа гүйсэһэн хүн бүхэн тоо бүридхэлэй эхилхэдэ, Эзэндэ иимэ үргэл хэхэ ёһотой.

¹⁵ Баян үгытэйһөө огто илгаатай бэшэ, хүн амин лэ өөрынгөө түлөө түлөөһэ хахад шээкэлһээ бага үргэл оруулха ёһогүй.

¹⁶ Израилиин зонһоо иимэ түлөөһэ абажа, Уулзалгын майхан һүмын дэргэдэхи ажалда хэрэглэхэш. Энэ бол Эзэндэ Израиль тушаа һануулһан тэмдэг, таанадай түлөө түлбэри болохо.

Зэдээр хэһэн угаалуур

¹⁷ Эзэн Моисейдэ айладаба:

¹⁸ – Гар, хүлөө зайлаха томо зэд амһарта, доронь зэдээр табюур хэхэш. Тэрэнээ майхан һүмын ба үргэлэй шэрээгэй хоорондо табижа, уһаар дүүргэхэш.

¹⁹ Аһароон ба тэрэнэй хүбүүд тэндэ хүл, гараа угаадаг-зайладаг байха.

²⁰ Майхан һүмэдэ орохын урда тээ тэдэ хүл, гараа угаагаагүй һаа, үхэхэ. Шатаалта үргэл хэхэеэ үргэлэй шэрээдэ дүтэлхын урда

²¹ тэдэ хүл, гараа угааха ёһотой. Үгы гэбэл, үхэхэ. Аһароон болон тэрэнэй уг удамда үеһөө үедэ дамжуулагдаха хуули гурим гэбэл, энэ мүн.

Магнайда түрхидэг ёһололой тоһон

²² Эзэн Моисейдэ айладаба:

²³ – Эгээл эрхим хүжэ санзай болохо табан зуун шээкэл мирра модоной дабирхай, хоёр зуу табин шээкэл халуун ороной хангалта лавр модоной нюдэһэн холтоһо, хоёр зуун табин шээкэл хангал үнэртэй хулһа,

²⁴ табан зуун шээкэл энэдхэг модоной зөөлэн хальһа (хуу һүмын шээкэлээр хэмнэхэ), мүн нэгэ гиин оливын тоһо абахаш –

²⁵ эдэ бүгэдые найруулхадаш, магнайда түрхидэг ёһололой нангин тоһо болохо.

²⁶ Нангин энэ тоһые Эзэнтэй уулзалгын майхан һүмэдэ, хэлсээнэй бэшэгэй ханзада,

²⁷ бүхы амһартатайнь хамта шэрээдэ, бүхы хэрэгсэлтэйнь хамта дэндэ, уталгын үргэлэй шэрээдэ,

²⁸ түгэс шатаалта үргэлэй шэрээ болон тахилай хэрэгсэлнүүдтэ, хүл, гараа зайладаг амһартада түрхихэ ёһотой.

²⁹ Эдэ бүгэдые иигэжэ арюудхахадаш, нангинай нангин болохо. Эдэ хэрэгсэлнүүдтэ хүрэһэн бүхы юумэн нангин болохо.

³⁰ Минии санаартад болохынь тулада Аһарооной, тэрэнэй хүбүүдэй магнайда түрхин арюудхахаш!

³¹ Израиль угсаатанда иигэжэ ойлгуулхаш: «Иимэ бүридэлтэй тоһон хадаа үеһөө үедэ үндэр шэрээдэ үргэмжэлэн һуулгаха ёһололдо хэрэглэдэг нангин тоһон болохо.

³² Тэрээниие ондоо хүндэ түрхижэ бү байгты. Өөртөө гэжэ иигэжэ найруулха ёһогүй: энэ хадаа нангин зүйл, таанадта тэрэл зандаа үлэг.

³³ Өөртөө гү, али ондоо хүндэ иимэ бүридэлтэй тоһо найруулһан гү, али түрхиһэн хүн усадхагдаха, угсаата арадайнгаа тооһоо гаргагдаха».

³⁴ Эзэн Моисейдэ зарлиг болобо: – Натаат, шэхэлээт, галбаан гэжэ хангал үнэртэй бодосуудые сан ууюулдаг дабирхайтай холижо,

³⁵ хүжэ санзайн бодос дабһа нэмэн найруулхаш. Энэ хадаа сэбэр, нангин хүжэ санзай мүн.

³⁶ Тэрээниие нюдэжэ, Минии шамда ерэжэ уулзадаг майхан һүмэ соо хэлсээнэй бэшэгэй урда ууюулдаг байхаш. Эдэ хадаа таанадта нангинай нангин зүйл болог.

³⁷ Өөртөө иимэ санзай хэжэ бү байгты, гансал Эзэнэй нангин зүйл болохо зэргэтэй.

³⁸ Иимэ хангал үнэр өөртөө анхилуулха зорилгоор санзай найруулһан хүн усадхагдаха, өөрын арад зоной тоодо тоогдохоёо болихо.