Египедһээ гаралга 29 - Библи

Аһароониие хүбүүдтэйнь Эзэндэ алба хэхээр зорюулна

¹ Минии санаартад болохынь тулада хайшан гэжэ арюудхаха болоноб? Гэмтэлгүй буха, хоёр хуса шэлэжэ аба.

² Эрхим талхаар эһээлтэгүйгөөр бариһан хилээмэ, оливын тоһондо дэбтээһэн, шараһан эһээлтэгүй талха, оливын тоһо түрхиһэн, болгоһон эһээлтэгүй бообо

³ нэгэ араг соо хэхэш. Энэ араг, буха болон хоёр хуса туужа асара.

⁴ Аһароониие хүбүүдтэйнь Уулзалгын майхан һүмын үүдэндэ асархаш. Нюур, гарынь угаахаш.

⁵ Аһароондо бүхы хубсаһыень – самса, эфод дорохи самса, эфод ба сээжэбшэ-уута үмдэхүүлээд, эфодой бүһөөр бүһэлхэш.

⁶ Аһарооной толгойдо боолто малгай хүрмэхэш, хүрмэлтэдөө Нангин шүтөөнэй титим һуулгажа барюулхаш.

⁷ Оливын тоһо абажа, Аһарооной толгой дээрэнь адхан, тэрэниие тоһолон арюудха.

⁸ Аһарооной хүбүүдые ерүүлжэ, самса үмдэхүүлхэш.

⁹ Аһароондо болон хүбүүдтэнь бүһэ бүһэлжэ, толгойдонь боолтонуудые боохош. Санаартын нэрэ зэргэ Аһароон ба тэрэнэй хүбүүдтэ хэтэдээ үгтэхэ, тэдээндэ зорюулагдаһан ёһолол ши үнгэргэхэ болонош.

¹⁰ Уулзалгын майхан һүмын хажууда буха асархаш. Аһароон хүбүүдтэеэ бухын тархида гараа табюужаг.

¹¹ Уулзалгын майхан һүмын үүдэндэ Эзэнэй үмэнэ бухын ами таһалхаш.

¹² Бухын шуһанда хургаа норгоод, үргэлэй шэрээгэй эбэрнүүдтэ түрхихэш, үлэһэн шуһыень үргэлэй шэрээгэй хормойдо адхахаш.

¹³ Бухын бүхы дотор өөхыень, эльгэнэй хуби ба хоёр бөөрыень өөхэтэйнь үргэлэй шэрээ дээрэ галдахаш.

¹⁴ Харин мяха, арһан болон шабааһыень абаад, хотон хүреэнһөө гадагшань гаргажа галдахаш. Энэ хадаа нүгэл сагааруулгын үргэл болоно.

¹⁵ Удаань нэгэ хуса асараарай, Аһароон хүбүүдтэеэ тархи дээрэнь гараа табюужаг.

¹⁶ Амииень таһалаад, шуһанһаань абажа, үргэлэй шэрээе тойруулан сүршэхэ болоно.

¹⁷ Хусын бэе хэдэн хуби болгон хэсэглээд, гэдэһэ доторыень, хүлыень угаагаад, тархи ба бэшэ хубинууд дээрэнь табижа,

¹⁸ үргэлэй шэрээ дээрэ түгэс шатаахаш. Энэ хадаа Эзэндэ зорюулһан түгэс шатаалта үргэл, Тэрээндэ аятай анхилал, тахил мүн.

¹⁹ Хоёрдохи хусаяа абаарай, Аһароон хүбүүдтэеэ тархи дээрэнь гараа табюужаг.

²⁰ Хониёо алаад, шуһыень Аһарооной ба тэрэнэй хүбүүдэй баруун шэхэнэй омогто, баруун гарайнь эрхыдэ, баруун хүлэйнь эрхыдэ түрхихэш. Мүн үргэлэй шэрээ дээрэ тойруулан шуһанһаа сүршэхэш.

²¹ Удаань шэрээ дээрэһээ шуһа ба оливын тоһо абажа, Аһароондо, хубсаһандань сүршэхэш, хүбүүдтэнь, хубсаһандань мүн лэ сүршэхэш. Тиигэжэ Аһароониие хүбүүдтэйнь, тэдэнэй хубсаһые арюудхаха болонош.

²² Хусын мяханай өөхэ болон тарган һүүлыень, дотор өөхэ һэмжыень, эльгэнэйнь өөхэ, хоёр бөөрэ өөхэтэйнь илган абахаш. Энэ һахил хүртөөлгын үргэл хадань баруун хойто хүлыень абалсахаш.

²³ Эзэнэй урда табяатай эһээлтэгүйгөөр бариһан хилээмэнтэй түрсүүгһээ нэгэ хүбэриг хилээмэ, оливын тоһондо дэбтээһэн шараһан талха, нэгэ бообо абаад,

²⁴ бултыень Аһароон ба хүбүүдэйнь гар дээрэ табяад, дэен дэлгэгдэхэ үргэл болгон, Эзэнэй үмэнэ дэен дэлгүүлхэш.

²⁵ Удаань тэдэнэй гарһаа абаад, түгэс шатаалта үргэлтэй суг үргэлэй шэрээ дээрэ галдахаш. Энэ хадаа Эзэндэ таатай һайхан анхилал, Тэрээндэ зорюулагдаһан бэлэг мүн.

²⁶ Аһарооной һахилай үргэл болохо хусын үбсүүень абаад, Эзэнэй үмэнэ дэен дэлгэхэш. Тэрэ шинии хуби болоно.

²⁷ Эзэндэ гэжэ үргэһэн хониной үбсүү болон бэлэг гэжэ үргэһэн хүлые – Аһарооной болон хүбүүдэйнь һахил хүртөөлгын үргэлые – нангин гэжэ соносхохо ёһотойш.

²⁸ Израилиинхин үхэр мал үргэхэдөө, эдэл хубинуудые Аһароондо, тэрэнэй хүбүүдтэ үгэхэ ёһотой. Израилиин уг удамда хэтэ наһандаа сахигдаха ёһо гурим энэ мүн. Израилиин зон амгалан байдалай үргэлһөө Эзэндэ мүн лэ үргэхэ ёһотой.

²⁹ Аһарооной һахилай хубсаһан тэрэнэй уг удамда дамжуулагдаха ёһотой. Тэрэ хубсаһаарнь лэ һахил хүртөөдэг байха.

³⁰ Аһарооной һүүлээр санаартан болоһон, Уулзалгын майхан һүмын нангин газарта үүргэ дүүргэхэеэ ороһон удамынь энэ хубсаһые долоон хоногто таһалгаряагүй үмдэхэ ёһотой.

³¹ Һахил хүртөөлгын үргэлэй хониной мяха абажа, майхан һүмын хорёо соо, нангин газарта, шанахаш.

³² Аһароон хүбүүдтэеэ тэрэ мяханһаа хүртэн эдихэ ушартай. Уулзалгын майхан һүмын үүдэндэ урид табигдаһан араг соохи талха хилээмэнһээ мүн лэ эдиг.

³³ Тэдэниие арюудхалгын, тэдээндэ һахил хүртөөлгын, нангин болгоһоной үедэ үргэһэн үргэлые тэдэ өөһэдөө эдихэ ёһотой. Харин ондоо хүн огто эдихэ ёһогүй, энэ бол нангин зүйл.

³⁴ Һахил хүртөөлгын үргэлэй мяханһаа, талха хилээмэнһээ үглөө болотор юумэнэй үлөө һаань, галдаха хэрэгтэй. Хэншье энээниие эдихэ ёһогүй, юуб гэбэл, энэ бол нангин зүйл мүн.

³⁵ Аһароондо, тэрэнэй хүбүүдтэ хабаатай Минии айладаһан бүгэдые жэншэдгүй бүтээхэ – шинии уялга. Тэдэнэй һахил хүртөөлгын ёһолол долоон үдэр үргэлжэлхэ ушартай.

³⁶ Үдэр бүри нүгэл сагааруулгын үргэлдэ үхэр үүсэлдэг байхаш. Иигэжэ үргэлэй шэрээ арюудхалгын ёһолол бүтээхэш. Үдэр бүри тэрэнээ сэбэрлэжэ, шуһа, оливын тоһо сүршэжэ арюудхадаг байхаш.

³⁷ Үдэр дараалан, долоон үдэрэй туршада тэрэ ёһолол бүтээхэдэш, үргэлэй шэрээ нангинай нангин зүйл болохо. Тэрэнэй ойронь хүрэһэн бүхы юумэн нангин болохо.

³⁸ Үргэлэй тэрэ шэрээ дээрэ саг үргэлжэ, үдэр бүри хоёр түлгэн хурьга үргэдэг байхаш.

³⁹ Нэгыень үглөөгүүр, нүгөөдынь үдэшэлэн үргэдэг байхаш.

⁴⁰ Дүрбэнэй нэгэ хуби гиинэ оливын тоһонтой эфаагай арбанай нэгэ хуби шэниисын гурил худхаһан эрхим шанартай талха нэгэ хурьгантайнь сугтаа үргөөрэй, мүн дүрбэнэй нэгэ хуби гиинэ үзэмэй дараһан архи үргэхэш.

⁴¹ Хоёрдохи түлгэн хурьгаяа үдэшэлэн мүн лэ үглөөнэй шэнги тиимэ талхан, үзэмэй дараһан архи сэржэмтэйгээр үргэхэш. Энэ хадаа Эзэндэ таатай анхилма үнэр, Эзэндэ үргэгдэһэн бэлэг мүн.

⁴² Түгэс шатаалта энэ үргэлые таанад саг үргэлжэ, үеһөө үедэ майхан һүмын үүдэнэй хажууда үргэдэг байхат. Би тэндэ таанадтай уулзадаг, шамтай хөөрэлдэдэг байхаб.

⁴³ Израиль угсаатантай Минии уулзадаг тэрэ газар Минии һүр солын нангин газар болохол.

⁴⁴ Майхан һүмые болон үргэлэй шэрээ нангин болгохоб. Аһароон болон тэрэнэй хүбүүдые адислажа, Минии санаартад болгохоб.

⁴⁵ Израиль угсаатанай дунда ходо байжа, тэдэнэй Бурханиинь болохоб.

⁴⁶ Тэдэнэй дунда оршохын тула Минии, Эзэн Бурханайнь, Египедһээ тэдэниие гаргаһые тэдэ һанадаг байха. Би хадаа тэдэнэй Эзэн Бурхан мүн!