Египедһээ гаралга 28 - Библи

Санаартанай хубсаһа хунар бүтээлгэ

¹ Израилиин үри һадаһад сооһоо шинии аха Аһароониие хүбүүдтэйнь дуудажа асара. Аһароон болон тэрэнэй хүбүүд Надааб, Абиһуу, Эльазаар ба Итамаар Минии санаартад болохо табилантай.

² Һүр алдартай ба һайхан үзэмжэтэй байхынь тула һахилай хубсаһа Аһароон ахадаа оюула.

³ Уран гарта оёдолшод олдохо – Би тиимэ шадабари тэдээндэ үгөө бэлэйб. Минии санаартан болохо ёһололдонь хэрэгтэй хубсаһа Аһароондо оёхыень тэдэниие зонхило.

⁴ Минии санаартадаар алба хэхын тула шинии аха Аһароондо болон хүбүүдтэнь нангин хубсаһа – сээжэбшэ-уута, эфод, ута маалинга самса, угалзатай самса, толгойн боолто ба бүһэ тэдэ оёг.

⁵ Эдэ бүгэдые бүтээхын тула алтан, сэнхир хүхэ, гүн улаан, үдхэн улаан утаһа, маалинга абаг.

⁶ Алтан утаһаар, сэнхир хүхэ, гүн улаан, үдхэн улаан хилгааһаар, нарин маалингаар угалзатай эфод тэдэ хэг.

⁷ Хажуугаарнь тэрээндэ дала мүртэнь даруулгануудые хадаха хэрэгтэй.

⁸ Эфодой бүһэнь эфодтой нэгэн бүхэли шэнги байха ёһотой: эфодтол адли алтан утаһаар, сэнхир хүхэ, гүн улаан ба үдхэн улаан хилгааһаар, нарин маалинга зүйлтэтэйгээр нэхээтэй байха ёһотой.

⁹ Хоёр мана шулуу абажа, Израилиин хүбүүдэй нэрэнүүдые һиилэхэш:

¹⁰ нэгэ шулуун дээрэ зургаан нэрэ, нүгөө шулуун дээрэ – мүн лэ зургаан нэрэ, аха захаһаань эхилээд.

¹¹ Уран һилүүршэнэй шулуун дээрэ тамга һиилэһэн шэнгеэр, Израилиин хүбүүдэй нэрэнүүдые һиилээрэй. Эдэ шулуунуудые угалзатай алтан гуунуудта һуулгахаш.

¹² Тэдэ шулуунуудаа Израилиин хүбүүд тухай ходо һануулжа байхыень дала мүрэй даруулгануудта бүхэлхэш. Тэдэнэй нэрэнүүдые Аһароон дала мүртөө хадаад, Эзэнэй урда абажа ябаг.

¹³ Угалзатай алтан хоёр гуунуудта

¹⁴ шэжэр алтаар хэһэн гүрэмэл хоёр гэнжэ холбон бүхэлхэш.

¹⁵ Жээрэбэй сээжэбшэ-уута бүтээхэш. Тэрэнээ эфодтол адли алтан утаһаар, сэнхир хүхэ, гүн улаан ба үдхэн улаан үнгэтэй ээрэһэн хилгааһаар нарин маалинга зүйн нэхэхэш.

¹⁶ Тэбхэрхэнээр, ута богонёороо хахад тохой хэмжээнэй хоёр дабхар бүдөөр оёхош.

¹⁷ Сээжэбшэдээ эрдэни шулуу хэхэ дүрбэн шугам халааһа хэхэш. Нэгэндэнь бадмаа раага, молор, маргад;

¹⁸ нүгөө зэргэдэнь – оюун, миндарга, очир;

¹⁹ гурбадахидань – нал эрдэни, гартаам, ягаан болор;

²⁰ дүрбэдэхи зэргэдэнь – бэгтэ молор, мана ба хас эрдэни. Бүхы эрдэни шулуунуудые угалзатай алтан гуунуудта һуулгахаш.

²¹ Хамта дээрээ арбан хоёр шулуун, шулуун бүхэндэ тамга сохиһон шэнгеэр Израилиин арбан хоёр обогуудай нэгэнэйнь нэрэ һиилэгдэхэ.

²² Сээжэбшын түхэлэй уутада гэжэ шэжэр алтаар гэнжэ ооһорнуудые хэхэш.

²³ Хоёр алтан сахариг хээд, сээжэбшын углууда торгоогоод,

²⁴ алтан хоёр гэнжээрээ

²⁵ хоёр гуутай холбожо, тэдэ гуунуудые эфодой даруулгануудта урдаһаань торгоохош.

²⁶ Үшөө хоёр алтан сахариг хэжэ, сээжэбшэ-уутын хоёр углууда досоо талаһаань, эфодтой уулзадаг таладань барюулхаш.

²⁷ Үшөө хоёр алтан сахариг хэжэ, дала мүрэй даруулгануудай доодо хирхагаар, урда талаһаа, эфодой бүһэтэй уулзадаг газарта торгоохош.

²⁸ Сээжэбшэ-уутын сахаригуудые эфодой сахаригуудтай сэнхир ооһороор холбогдоһон, тиихэдээ уутань эфодой бүһэ дээгүүр байжа, эфодтоо нягтаар няалдаад байгуужаг.

²⁹ Аһароон нангин ордон руу орохо бүреэ энгэртээ Израилиин хүбүүдэй нэрэ хээд ябажа, Эзэнэй урда саг үргэлжэ һануулжа байха болоно.

³⁰ Уутада жээрэбэй шулуунууд хэгдэхэ ёһотой. Эзэнэй урда Аһарооной байхадань саг үргэлжэ тэдэнь байха зэргэтэй. Эзэнэй урда оршоходоо, Аһароон Израилиин хүбүүдэй жээрэбүүдые хододоо зүүжэ ябаг.

³¹ Эфод доро үмдэхэ самса сэнхир хилгааһан утаһаар нэхэхэш.

³² Тэрээндэнь толгойгоо углаха нүхэн байха, хахархагүйн тула эрмэгыень лабаар хүбэрдэхэ болоно, сэрэгэй хубсаһан шэнги бүхэ байха ёһотой.

³³ Доодо захаарнь сэнхир болон гүн улаан, үдхэн улаан үнгэтэй утаһануудаар жэмэсэй үрын түхэлтэй булсуунуудые хэхэш, хоорондонь алтан хонхохонуудые үлгэхэш.

³⁴ Алтан хонхонууд болон анар жэмэсэй үрэнүүд ээлжэлэн, самсын доодо захые хүбөөлһэн шэнги болоно.

³⁵ Мүргэлэй үедэ Аһароон энэ самсаяа үмдүүжэг. Нангин ордон руу Эзэндэ Аһарооной ороходо, мүн тэндэһээ гарахадань, хонхын абяан дуулдажа байха ёһотой, үгы һаа, тэрэ амияа алдаха.

³⁶ Алтан хабтаһа хээд, дээрэнь тамга һиилэһэн шэнгеэр «Эзэнэй нангин» гэһэн үгэнүүдые һиилэхэш.

³⁷ Толгойдо хүрмэдэг бүд дээгүүр, урдаһаа, уяхын тула тэрэ хабтаһандаа сэнхир хүхэ ооһор хадахаш.

³⁸ Аһарооной духа дээрэ уягдаха. Израиль угсаатанай оруулдаг үргэлэй зүйлнүүдтэ бүхы дутуу дундыень Аһароон өөр дээрээ абаха уялгатай. Аһарооной духа дээрэ тэрэ хабтаһаниинь ходо байха ёһотой – тиихэдээ үргэлынь Эзэнэй һанаанда таараха жэшээтэй.

³⁹ Аһароондо һайхан хээтэй нарин маалинга бүдөөр самса, толгойн хүрмэлтэ, үнгэтэ бүһэ оюулха ёһотойш.

⁴⁰ Аһарооной хүбүүдтэ самса, бүһэ, толгойн боолтонуудые һүр алдартай, һайхан үзэмжэтэй байхынь тулада оюулха болонош.

⁴¹ Аһароон ахадаа, хүбүүдтэнь эдэ хубсаһа хунар үмдэхүүлэ. Аһарооной болон хүбүүдэйнь магнайда оливын тоһо түрхи, санаартан болгохо ёһолол бүтээ, арюудха. Тэдэ Минии санаартад болохо.

⁴² Эшэгүүри халхалха богонихон, бүһэһээ үбдэг хүрэтэр, маалинга үмдэнүүдые тэдээндэ гэжэ оюулхаш.

⁴³ Майхан һүмэ соо Бурхантай уулзадаг газарта ороходоо гү, али һүмэ соо үргэлэй үедэ үргэлэй шэрээдэ дүтэлхэдөө, Аһароон болон хүбүүдынь тэдэниие үмдэхэ ёһотой. Үгы гэбэл, тэдээндэ зэмэ тохогдожо, ами наһаяа алдаха. Аһароондо болон удамдань хэтын заабари тэрэ гээшэ.