Египедһээ гаралга 27 - Библи

Үргэлэй шэрээ бүтээлгэ

¹ Акаци модоор үргэлэй шэрээ хэхэш. Тэрэ хадаа дүрбэлжэн байха ёһотой – утаараа табан тохой ба үргэнөөрөө табан тохой, үндэрынь гурбан тохой болохо.

² Дүрбэн углууень эбэр шэнгеэр дээшэнь ёдойлгохош, үргэлэй шэрээтэй нэгэн бүхэли байха жэшээтэй. Шэрээгээ зэдээр бүрин хушахаш.

³ Үргэлэй шэрээгэй хэрэгсэлнүүдые: согой амһарта, шуһа сүршэхэ аяга, мяханай һэрээ, нүүрһэнэй удхуур, хайруулай табаг – бултыень зэд түмэрөөр бүтээгээрэй.

⁴ Үргэлэй шэрээдэ хабтагар зэд һагшуур шэнгеэр нүхэлжэ, дүрбэн углуудань дүрбэн сахариг холбохош.

⁵ Тэрэнээ үргэлэй шэрээгэй захаһаа доошоо, хахадтань хүрэтэр барижа бүхэлөөрэй.

⁶ Үргэлэй шэрээдэ гэжэ акаци модоор һургаагуудые хэжэ, зэд түмэрөөр бүрихэш.

⁷ Үргэлэй шэрээ зөөхэ хэрэгтэй болоо һаань, тэдэ һургаагуудаа хажуу тээхи сахаригуудта оруулхат.

⁸ Хабтагайгаар хэһэн үргэлэй шэрээ досоогоо хүнды байха ёһотой. Хада дээрэ шамда харуулһан шэнгеэр лэ хүүжэг.

⁹ Майхан һүмэеэ тойруулаад хашаалха болоно. Урда талаһаань нарин маалинга бүдөөр хэһэн зуун тохойн шэнээн утатай далбагар хүшэгэ байха.

¹⁰ Тэрэнээ хорин баханада үлгэхэ ёһотой. Бахана доро зэд түмэрөөр хорин түшэг хэжэ тодхохо; бахана дээрэхи дэгээ холболтонуудыень мүнгөөр хэгдэхэ.

¹¹ Мүн хойто талаһаа зуун тохой утатай далбагар хүшэгэ доогуураа хорин зэд түшэгтэй хорин баханада үлгэхэ. Бахана дээрэхи дэгээ холболтонуудынь мүнгөөр хэгдэхэ.

¹² Баруун хажууһаа хашаагай үргэнөөрнь табин тохой утатай далбагар хүшэгэ арбан баханада үлгэгдэхэ, арбан түшэгтэй байха.

¹³ Зүүн тээһээ хашаагай үргэниинь табин тохой байха ёһотой.

¹⁴ Орохо үүдэнһээ нэгэ тээшэ арбан табан тохой утатай далбагар хүшэгэ байг, гурбан түшэгтэй гурбан баханада татагдаг.

¹⁵ Хаалгаһаа нүгөө тээшээ баһал арбан табан тохой утатай гурбан түшэгтэ һуулгаһан гурбан баханатай хүшэгэ байха ёһотой.

¹⁶ Үүдэндэ гэжэ хорин тохой хүшэгэ сэнхир хүхэ, гүн улаан ба үдхэн улаан үнгэтэй ээрэһэн хилгааһан утаһаар нэхэгдэжэ, нарин маалинга бүдтэй зүйхэш. Үүдэндэ дүрбэн бахана, доронь дүрбэн түшэг байха ёһотой.

¹⁷ Хашаагай бүхы баханануудта холболто болон дэгээнүүдынь мүнгөөр, баханын түшэгүүд зэдээр хэгдэхэ ёһотой.

¹⁸ Һүмын газаахи хашаагай утань зуун тохой, үргэниинь табин тохой, нарин маалинга бүд халхабшын үндэрынь табан тохой байха. Баханын түшэгүүд зэд байха.

¹⁹ Майхан һүмын газаахи хэрэгсэлнүүд, нэмэргэ тогтоохо ба газаахи халхабшын гадаһанууд зэдээр хэгдэхэ.

²⁰ Израильшуудта иигэжэ захира: зула ходо бадараажа байхын тула тэдэ шамда гараараа худхаһан модоной сэбэр тоһо асараг.

²¹ Аһароон ба тэрэнэй хүбүүд Намтай Уулзалгын Майхан һүмэ соо, хэлсээнэй ханзын байрладаг хүшэгын наана Эзэнэй үмэнэ үдэшэһөө үглөө болотор саг үргэлжэ зулануудай бадаржа байхыень хинаха ёһотой. Израилиин зон энэ тогтоол хэтэ мүнхэдөө, үеһөө үедэ сахин байха болоно.