Египедһээ гаралга 26 - Библи

Майхан һүмэ

¹ Майхан һүмэдэ гэжэ нимгэн маалинга бүдөөр сэнхир хүхэ, гүн улаан ба шад улаан үнгэтэй утаһаар үргэн энтэй арбан хэһэг бүд нэхэхэш; тэрээн бүхэндэнь херүүбүүдые нэхэхэ болоно.

² Далбагар бүдэй хэһэг бүхэнэй утань хори найман тохой, үргэниинь дүрбэн тохой, арбан хэһэг бүдшни аб адли хэмжээнэй байха ёһотой.

³ Удаань таба табаар тэдэнээ холбожо оёхош.

⁴ Захын бүдүүдэй эрмэгтэ сэнхир хүхэ түдүүлинүүдые хадахаш, тиимэ түдүүлинүүдые нүгөө хэһэгэй захаар баһа хадахаш.

⁵ Нэгэ хажууһаань табин түдүүли, нүгөө тээнь баһал табин түдүүли.

⁶ Удаань табин алтан тобшонуудаар тобшолжо, хоёр хэһэгээ ниилүүлхэдэш, майхан һүмын зосоо нэмэргэ болохо.

⁷ Газаа нэмэргэ гэжэ ямаанай нооһоор үргэн энтэй арба нэгэн далбагар бүд нэхэхэш.

⁸ Далбагар бүд бүхэнэй утань гушан тохой, үргэниинь дүрбэн тохой болохо, бүхы арба нэгэн бүдынь аб адли хэмжээнэй байха ёһотой.

⁹ Табыень нэгэ талын болгожо, хамтадхан оёхош, зургааень нүгөө талын болгохош, нэгэ талын зургаадахи үлүүе дундуурнь эбхэхэш – тэрэш үүдэн дээгүүр һанжан байха.

¹⁰ Нэгэ захаарнь табин түдүүли, нүгөө тээнь баһал табин түдүүли хадахаш.

¹¹ Зэдээр табин тобшо хэжэ, тэдэ тобшонуудые тобшолжо, нэгэ нэмэргэ болгон, хоёр хубияа ниилүүлэ.

¹² Нэмэргын утаһаа үлүү гараһан хахад энгынь майхан һүмын ара талын хана хушаха ёһотой.

¹³ Хажуу тээгүүрхи нэгэ нэгэ үлүү тохой хажуу хана хушаха ёһотой.

¹⁴ Утан элдэһэн хониной арһаар дээрэһээнь хушалта хэжэ, үшөө тэрээнээ нарин элдэлгэтэй булгайраар хушаарай.

¹⁵ Майхан һүмэдөө акаци модоор ханын хүреэнүүдые хэхэш.

¹⁶ Хүреэ бүхэн утаараа арбан тохой ба үргэнөөрөө тохой хахад байха.

¹⁷ Хоёр модо хүндэлэбшөөр холбожо хэһэн байха ёһотой. Тиигэжэ майхан һүмын бүхы хүреэнүүд хэгдэһэн байха ёһотой.

¹⁸ Майхан һүмын урда ханада гэжэ хорин хүреэ хэхэ хэрэгтэй.

¹⁹ Хүреэ һуулгахада мүнгөөр хэһэн дүшэн түшэг хээрэй. Тиихэдэнь хүреэ бүхэнэй хормойдо, хоёр хүндэлэбшэдэнь тулгаһан хоёр хоёр түшэг байха.

²⁰ Һүмын ара талын хойто ханадань мүн лэ хорин хүреэ,

²¹ ба хүреэ бүхэндэнь хоёр түшэг, хамтадаа дүшэн түшэг байха.

²² Майхан һүмын ара талын баруун ханада зургаан хүреэ,

²³ ара талын углуунуудтань үшөө хоёр хүреэ,

²⁴ тэдэнээ доогуурнь асатуулхаш, харин дээгүүрнь, нэгэдэхи сахариг углаха газартань, бүхэлеэр хэхэ хэрэгтэй. Тиимэ хоёр хүреэ хээрэй, углуу бүхэндэнь – нэгэ нэгэ.

²⁵ Эдэ найман хүреэнүүдэй һуурида арбан зургаан мүнгэн түшэг хэжэ һуулгаха хэрэгтэй.

²⁶ Акаци модоор хүндэлэбшэнүүдые хэхэш: майхан һүмын нэгэ ханын хүреэнүүдые холбохо табан хүдэлэбшэ,

²⁷ нүгөө ханын хүреэнүүдые холбохо табан хүндэлэбшэ, ара талын баруун хана бүхэлхэ үшөө табан хүндэлэбшэ.

²⁸ Дундахи хүндэлэбшэнь ханын хоёр захаһаа хүреэнүүдые холбохо ёһотой.

²⁹ Хүреэнүүдээ алтаар бүрижэ, хүндэлэбшэтэй холбохын тулада алтан сахаригуудые хэхэш. Хүндэлэбшэнүүдээ баһал алтаар бүрихэш.

³⁰ Хада дээрэ шамда яажа заагаа һэмбиб, тэрэнэй ёһоор лэ майхан һүмэ бодхоохош.

³¹ Сэнхир хүхэ, гүн улаан ба шад улаан үнгэтэй утаһаар, нимгэн маалинга бүдөөр хүшэгэ нэхэхэш; тэрээн дээрэ херүүбүүдэй дүрэнүүдые нэхэхэ ёһотойш.

³² Тэрэ хүшэгэеэ акаци модоор хэгдэһэн, алталмал дүрбэн баханада үлгэхэш. Тэдэ баханануудые һуулгаха мүнгэн дүрбэн түшэг хэрэгтэй.

³³ Хүшэгэнь тобшонууд доро сэхэ тудалдаха ёһотой. Хүшэгын саана хэлсээнэй ханзаяа табихаш. Энэ хүшэгэ һүмын хамагай нангин хубиие нангин газарһаа илгаха болоно.

³⁴ Хамагай нангин газарта табяатай, хэлсээнэй ханза дээрэ арюудхалгын хушалта табихаш.

³⁵ Хүшэгын урда шэрээ, шэрээгэй урда дэн табихаш. Дэнгынь майхан һүмын урда ханын хажууда, шэрээнь хойто ханын хажууда табигдаха.

³⁶ Сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр майхан һүмэ руу орохо газарые халхалдаг олон үнгэтэ хүшэгэ бүтээгдэһэн байха ёһотой.

³⁷ Хүшэгэдөө гэжэ акаци модоор табан бахана хээд, алтаар хушахаш. Алтан дэгээнүүдые баханануудтаа үлгэхэш. Баханануудта табан түшэгые гуулин түмэрөөр шудхаха болонош.