Египедһээ гаралга 25 - Библи

Майхан һүмын хэрэгсэлнүүд

¹ Эзэн Моисейдэ зарлиг болобо:

² – Намда үргэхэ юумэ суглуулаг гэжэ Израилиин зондо зонхило. Хэн юу үгэхэ дуратайб, тэрэнээ үгэг.

³ Иимэ үргэһэн зүйлнүүдые суглуулагты: алта, мүнгэ, зэд,

⁴ сэнхир хүхэ, гүн улаан ба бадмаа раагын үдхэн улаан үнгэтэй ээрэһэн хилгааһа утаһа, нарин маалинга бүд болон ямаанай хөөбэр нооһо,

⁵ элдээд утаһан хониной арһа болон нимгэн булгайр, акаци модо,

⁶ зула носоохо оливын тоһо, үргэмжэлэлэй ёһо бүтээлгэдэ хэрэглэдэг тоһоной хангал бодос, уталгын хүжэ санзай,

⁷ эфодто болон энгэрэйнь гуу хүреэдэ хэхэ мана шулуу болон эрдэни шулуу суглуулагты.

⁸ Израиль угсаатан Намда гэжэ нангин шүтөөнэй һүмэ барюужаг, тиихэдэнь Би тэдэнэй дунда оршодог болохоб.

⁹ Таанад Минии байха майхан һүмэ, тэрээн соохи бүхы юумэ Минии харуулһан соо жэншэдгүй нарин бүтээхэ болонот.

Хэлсээнэй ханза яажа бүтээхэ тухай

¹⁰ Акаци модоор нангин бэшэг хадагалха ханза хүүжэг: хоёр хахад тохой утатай, нэгэ хахад тохой үргэнтэй ба үндэртэй ханза байха ёһотой.

¹¹ Газаа зосооһоонь шэжэр алтаар хушажа, шэжэр алтаар хүбөөлхэш.

¹² Дүрбэн алтан сахариг хэжэ, ханзын дүрбэн хүлдэ торгоон бүхэлхэш: ханзын нэгэ хажууһаа хоёр сахариг, нүгөө тээһээнь хоёр сахариг.

¹³ Акаци модоор һургаагуудые хайжа, алтаар дабтан бүрижэ,

¹⁴ ханзын хоёр хажуугай сахаригуудта оруулхаш. Тэрэ һургааг модондо ханзаяа тээгээд ябадаг байхат.

¹⁵ Һургаагуудаа сахаригһаань абажа болохогүй.

¹⁶ Ханза соо Хэлсээнэй бэшэг хадагалхыетнай Би үгэхэб.

¹⁷ Ханзые хааха хабхаг сэбэр алтаар бүтээхэш; утань хоёр хахад тохойн, үргэниинь нэгэ хахад тохойн хэмжээнэй байха ёһотой.

^18-19 Хабхагай хоёр захаарнь алтаар дабтажа, хоёр херүүбэй дүрсэ бүтээхэш. Тэдэш хабхагтай нэгэн бүхэли зүйл болохо.

²⁰ Урда урдаһаа зогсоод, хабхаг тээшэ шэртэн, далияа дээгүүрнь дэлгэжэ байха.

²¹ Хабхагые ханза дээрэ табихаш, ханза соо Минии үгэһэн Хэлсээнэй бэшэг табиха болонош.

²² Хэлсээнэй ханзын хабхаг дээрэ далита херүүбүүдэй хоорондо Би шамтай уулзажа, Израилиин зондо зарлигуудаа соносхохо үедөө оршохоб.

²³ Акаци модоор хоёр тохой утатай, тохой үргэнтэй, тохой хахад үндэртэй шэрээ хэхэш.

²⁴ Сэбэр алта дабтажа, шэрээгээ хушаад, алтаар хүбөө хэхэш.

²⁵ Захаарнь альганай шэнээн үндэр хана хээд, баһал алтаар хүбөөлхэш.

²⁶ Дүрбэн алтан сахаригуудые хээд, шэрээгэй дүрбэн углууда хүл дээгүүрнь торгоохош.

²⁷ Ханада няалдаһан тэдэ сахаригуудта һургаагуудые хээд, шэрээгээ үргэжэ һууриһаань хүдэлгэхэдэ болоно.

²⁸ Шэрээ зөөхэ һургаагуудые баһал акаци модоор хэжэ, баһал алтаар бүреэрэй.

²⁹ Мүн лэ сэбэр алтаар табаг, шанага, домбо, аяга хэхэ болонош – сэржэмдэ хэрэгтэй.

³⁰ Тус шэрээ дээрэ Намда зорюулагдаһан хилээмэн саг үргэлжэ табижа байха ёһотойш.

³¹ Сэбэр алта дабтажа, модоной түхэлтэй дэн бүтээхэш. Эшэ болон һалаануудынь, һалаа дээрэ табигдаха зулын амһарта, оёортонь дэнгэй гол бариха амһарта, сэсэгэй һалаа дэльбэнүүд бүгэдэ нэгэн бүхэли болохо зэргэтэй.

³² Дэнгэй модон зургаан һалаатай байха: гурбаниинь нэгэ талаһаань, нүгөө гурбань нүгөөдэ талаһаань.

³³ Зургаан һалаа бүхэндэ бүйлсын сэсэг шэнги дэльбэтэй, оёортоо булсатай гурбан аягаханууд һууха.

³⁴ Дэнгэй оройдонь бүйлсын сэсэг мэтэ дүрбэн сэсэг байха.

³⁵ Хоёролжон һалаанууд доро аягын һуури, нүгөө хоёр һалаа доро аягын һуури, гурбадахи хоёролжон һалаа доро баһал аягын һуури: бүхы зургаан һалаа доро тиимэ һууринууд.

³⁶ Сэбэр алтаар дабтан бүтээһэн зулын голой амһартанууд, һалаануудынь дэнтэеэ нэгэн бүхэли байха ёһотой.

³⁷ Зулын долоон бишыхан амһарта хэжэ, дэн дээрэ табихадаш, урдань һайнаар гэрэлтүүлхэ.

³⁸ Зулын голой хабшуур, согой амһарта хуу сэбэр алтаар хэгдэһэн байха ёһотой.

³⁹ Дэндэ болон тэрэнэй бүхы хэрэгсэлдэ нэгэ талаант хэмжээнэй шэжэр алта гаргашалха болохош.

⁴⁰ Ойлгоорой, хада дээрэ шамда яажа харуулаа һэмбиб, тон тиимээр жэншэдгүй наряар бүтээхэ ёһотойш.