Египедһээ гаралга 24 - Библи

Израильшууд Бурхантай хэлсээ батална

¹ Эзэн Моисейдэ айладаба: – Аһароон, Надааб, Абиһуу болон Израилиин далан аха захатаниие абаад, хада өөдэ гаража, Намда, Эзэндэ, холоһоо мүргэгты.

² Зүгөөр гансал Моисей Намда дүтэлхэ ёһотой! Ондоо хэншье Нам руу бү дүтэлэг, арад зон хада өөдэ гараха ёһогүй.

³ Моисей зондоо ерэжэ, Эзэнэй үгэнүүдые болон тогтоолнуудые бүгэдыень хэлэжэ үгэбэ. Арад угсаатаниинь нэгэ хүн шэнги харюусаа: – Эзэнэй үгэ соонь лэ ябахабди.

⁴ Моисей Эзэнэй бүхы үгэнүүдые бэшэжэ абаба. Үглөөдэрынь хадын хормойдо үргэлэй шэрээ түхеэржэ, Израилиин уг аймагуудай тоогоор арбан хоёр нангин шулуу зэргэлүүлэн табиба.

⁵ Израиль угсаатан соохи залуу хүбүүдтэ хандажа, түгэс шатаалта үргэл ба амгалан байдалай түлөө үргэл хэхыень зонхилбо. Тэдэнь Эзэндэ бухануудые үргэбэ.

⁶ Хахад шуһыень Моисей аяганууд соо суглуулжа, үлэһэн хахад шуһыень үргэлэй шэрээдэ сүршэбэ.

⁷ Хэлсээнэй бэшэг уншажа үгэхэдэнь: – Эзэнэй айладаһан соо жэншэдгүй ябахабди! – гэжэ зон дабтан байба.

⁸ Моисей үргэлэй шуһа зон дээгүүр сүршөөд, хэлэбэ: – Эзэнэй тантай баталһан хэлсээнэй шуһан энэ мүн. Тэрэнэй үгэнүүд хадаа хэлсээнэй эрхэ нүхэсэл гэжэ ойлгогты.

⁹ Удаань Моисей, Аһароон, Надааб, Абиһуу болон Израилиин далан аха захатан хада дээрэ гаража,

¹⁰ Израилиин Бурханиие бараалхаба. Тэрэнэй хүл доро тэнгэридэл арюун тунгалаг эрдэни шулуугаар хэһэн тайзан үзэгдэһэн шэнги байгаа һэн.

¹¹ Бурхан Израилиин удамаршадта багаханшье хоро хүргэбэгүй. Тэдэ Бурханиие үнэхөөр бараалхажа, эдеэ унда зооглогшо һэн.

¹² Эзэн Моисейдэ айладаба: – Хада өөдэ Намда гарыш. Энэ арадта ухаа заахын тулада Минии бэшэһэн һургаал, зарлигуудтай шулуун хабтаһануудые шамда үгэхэб.

¹³ Моисей Иисүүс туһалагшатайгаа Бурханай үндэртэ зорибо.

¹⁴ – Ерэтэрнай эндэ байгаарайгты, – гэжэ Моисей аха заха хүнүүдтэ хэлэбэ. – Таанадтай Аһароон ба Хуур үлэхэ. Хэрэг гараа һаань, тэдээндэ хандахада болоно.

¹⁵ Моисей өөрөө хада өөдэ гараба. Хада үүлэндэ хушагданхай байгаа.

¹⁶ Эзэнэй һүр соло Синай уулада буугаа. Зургаан үдэртэ хадые үүлэн хушанхай байгаад, долоодохи үдэртэнь Эзэн үүлэн сооһоо Моисейе дуудаба.

¹⁷ Уулын оройдо соробхилһон гал мэтэ Эзэнэй һүр соло Израилиин зондо үзэгдөө бэлэй.

¹⁸ Моисей үүлэн соо орожо, хада өөдэ гараба. Тэндээ дүшэн үдэр болон дүшэн һүни байгаа бэлэй.