Египедһээ гаралга 21 - Библи

Еврей яһанай барлагууд тухай хуули

¹ Тэдээндэ үгэхэ ёһотой хуулинуудшни гэхэдэ, иимэ.

² Еврей яһанай богоолые худалдажа абаад, зургаан жэл соо тэрэшни шамда зарагдабал, долоодохи жэлдэнь тэрэниие түлөөһэгүйгөөр сүлөөдэ табяарайш.

³ Гансаараа ерээ һаа, гансаараа ябаг, һамгатай ерэһэн байбал, һамганиинь тэрээнтэй ошолсог.

⁴ Хэрбээ эзэниинь тэрээндэ эхэнэрые үгэһэн, тэрэнь хүүгэдые түрэһэн байбал, эхэнэр хүүгэдтэеэ эзэнэй гэжэ тоологдохо, богоолынь гансаараа ябаг.

⁵ Хэрбээ «Би эзэндээ, эхэнэртээ ба хүүгэдтээ дуратайб, сүлөөдэ гараха дурагүйб» гэжэ богоолой хэлээ һаа,

⁶ эзэниинь тэрэниие Бурханда дүтэлүүлэн – үүдэндэ гү, али үүдэнэй тотогодо асаран – шүбгөөр шэхыень соо нүхэлхэ болоно. Тэрэ гэһээр хэтэдэ богоолынь болохо.

⁷ Хэрбээ ондоо хүндэ басагаяа богоол болгожо худалдаа һаань, басаганиинь эзэнһээ эрэ хүн шэнгеэр табигдахагүй.

⁸ Һамган болгохо гэжэ эзэн абаһан аад, бодолоо хубилгабал, түлөөһөөр хүнэй абахые зүбшөөхэ уялгатай. Голоод хари хүндэ худалдаха ёһогүй.

⁹ Хүбүүнэйнгээ һамган болгохо гэжэ абабал, басагандаа шэнги хандаха ёһотой.

¹⁰ Эзэниинь өөртөө ондоо һамга абабал, богоол эхэнэртээ мяханай хуби, хубсаһа хунар болон гэр соо унтари һуурииень үлээг.

¹¹ Эдэ гурбые үлээгөөгүй ушарта эхэнэр гэрһээ түлөөһэгүй гаража ошохо эрхэтэй.

Бэеын гэмтэлгэ тухай хуули ёһо

¹² Хүниие үхэтэр сохиһон хүнэй ами хороохо ёһотой.

¹³ Сохиһон хүн алаха хүсэлгүй байгаа гэжэ элирээ һаа (Бурханай эрхэ хүсэлөөр тиимэ юумэн ушараа гээшэ ааб даа), хоргодохо эрхэ тэрээндэ үгтэжэ болодог, хаана хоргодохыень Би шиидхэхэб.

¹⁴ Хэрбээ ондоо хүниие зорюута алаад, Минии үргэлэй шэрээгэй дэргэдэшье хүлисэхые гуйгаа һаань, тэрэнэй ами хороохо ёһотойш.

¹⁵ Эхэ, эсэгэеэ сохиһон алибаа хүнэй ами таһалха ёһотой.

¹⁶ Хүниие хулгайлжа, худалдаһан хүнэй (үгы гэбэл, хулуулгаһан хүн тэрээндэ олдобол) ами таһалха ёһотой.

¹⁷ Аба эжы хоёроо муушалһан хүн үхэлдэ хүртэхэ ёһотой.

¹⁸ Хэрэлдээнэй үедэ нэгэниинь нүгөөдэеэ шулуугаар гү, али нюдаргаараа сохиходонь, гэмтэжэ хэбтэриин болоошье һаа,

¹⁹ амиды үлэбэ гэлэйг, хожомынь бодожо, таяг тулаад гарадаг болоо һаань, сохигшо хүн хэһээлтэдэ орохогүй, гансал үбдэһэн сагай түлөө ба аргалалгыень түлэхэ болоно.

²⁰ Эзэниинь богоолоо, эрэ, эмэ хамаагүй, модоор сохиходонь, тэрэ дороо үхэбэ гэлэйг, тэрэнэй түлөө харюусалга амасуулха болоно.

²¹ Харин сохюулһан богоолой гү, али богоол эхэнэрэй нэгэн хоёр үдэр амиды байһан ушарта нэхэхэ ёһогүй. Богоол гээшэ эзэнэйнь зөөри мүн.

²² Эрэшүүл наншалдаанай үедэ жэрмэһэн эхэнэрые дайраба, тэрээнһээ уламжалан эхэнэр дутуу түрэбэ гэлэй. Эхэнэр амиды байбал, гэмтэй хүн гэршын хажууда мүнгэ түлэхэ ушартай. Хэдые түлэхыень тэрэ эхэнэрэй үбгэн хэлэхэ.

²³ Эхэнэрэй наһа барабал, ами наһанай түлөө ами наһа үгэхэ шинии уялга.

²⁴ Нюдэнэй түлөө нюдөөр, шүдэнэй түлөө шүдөөр. Гарай түлөө гараар. Хүлэй түлөө хүлөөр.

²⁵ Шатааһанай түлөө – шатааха. Шархын түлөө – шарха. Гэмтэлгын түлөө – гэмтэлгэ.

²⁶ Эзэниинь эрэ гү, али эхэнэр богоолоо сохёод, нюдыень гэмтээбэл, сүлөөдэ табиха ушартай.

²⁷ Эзэниинь богоолой шүдэ түү сохёо һаа, мүн лэ сүлөөдэ табиха болоно.

²⁸ Эрэ гү, али эмэгтэй хүниие буха мүргэжэ алаба гэлэй, бухые шулуугаар сохижо алаха ёһотой. Мяхыень эдижэ болохогүй. Бухын эзэн харюусалгада татагдахагүй.

²⁹ Харин буха урданшье мүргэдэг байһан, тэрэнииень эзэн мэдэдэг аад, бухань хүниие мүргэжэ алаба гэлэй. Тэрэ ушарта бухыень шулуудажа алаха, эзэнэйнь ами баһа хороохо ёһотой.

³⁰ Аминай түлөө түлөөһэ түлэхэ гээ һаань, амиды үлэхын тула эриһыень түлүүлхэ ушартай.

³¹ Гэрэй эзэнэй хүбүү гү, али басагые буха мүргөө һаань, баһал тиигэжэ болохо.

³² Хэрбээ эрэ гү, али эмэгтэй богоолые бухын үхэтэр мүргөө һаа, бухын эзэн богоолой эзэндэ гушан шээкэл сагаан мүнгэ үгэхэ, харин бухыень шулуудажа алаха.

³³ Уһанай нүхэ нээлтэтэй орхиходо, буха гү, али элжэгэн унашаба гэлэй.

³⁴ Нүхэнэй эзэн амитанай сэн түлэхэ ёһотой, бэе мяхыень өөртөө абажа болохо.

³⁵ Буха ондоо бухые мүргэжэ алаба гэлэй, амиды бухые хоёр эзэд худалдаад, мүнгыень хубааха ушартай.

³⁶ Мүргэдэг буха гэжэ урдань мэдэгдэһэншье һаа, бухаяа харууһалаагүй эзэн бухаяа үгэжэ, хохидолыень даадаг.