Египедһээ гаралга 20 - Библи

¹ Бурхан һургаалай иимэ үгэнүүдые айладаба:

² – Би шамайе Египедэй дарлалтаһаа гаргаһан Эзэн Бурханшни гээшэб.

³ Намһаа ондоо бурхан шамда байха ёһогүй.

⁴ Өөртөө шүтөөниие бү зохёо, дээдэ тэнгэридэ байһан ба газар дээрэ, мүн газарһаа доогуур уһан соо байһан алибаа юумэнэй дүрсэ бү дархала.

⁵ Тэдээндэ бү һүгэдэ, бү мүргэ. Юуб гэхэдэ, Би, Эзэн Бурханшни, жүтөөрхэн сахидаг Бурхан гээшэб. Намайе хэрэгсээнгүй ябаһан эсэгэнэрэй түлөө үри хүүгэдыень, аша гушанарыень гурбадахи, дүрбэдэхи үе хүрэтэрынь хэһээдэгби.

⁶ Намда дуратай, захяа заабариием сахижа ябагша зондо мянганшье үе хүрэтэрынь үршөөл хайра үзүүлдэгби.

⁷ Эзэн Бурханайнгаа нэрые дэмы бү дурда. Тэрэнэй нэрэ дэмы нэрлэдэг хэнииешье Эзэн хэһээлтэгүй орхихогүй.

⁸ Субботые нангин үдэр гээд сахидаг бай.

⁹ Зургаан үдэрэй туршада ажаллажа, алибаа хэрэгээ бүтээжэ бай,

¹⁰ харин долоодохи үдэр – суббото, тэрэ Намда зорюулһан үдэр. Энэ үдэр ямаршье ажал бү хэ, өөрөөшье, хүбүүн, басаганши, богоол шэбэгшэдшни, мал адагуусаншни, хотодош байрлаһан ерүүл хүншье, бултадаа ямаршье ажал хэхэ ёһогүй.

¹¹ Юуб гэхэдэ, Эзэн огторгой, газар, далай бүтээгээд, досоонь байгааша бүхы юумэ зургаан үдэрэй туршада байгуулаа, харин долоодохи үдэртэ амараа. Тиимэһээ Эзэн гарагай долоое үреэлдөө хүртөөгөөд, нангин үдэр болгоо.

¹² Эзэн Бурханайнгаа үршөөһэн газарта ута наһатай һуухын тулада эхэ, эсэгэеэ хүндэлжэ ябаарай.

¹³ Хүниие бү ала.

¹⁴ Ханидаа бү урба.

¹⁵ Хулгай бү хэ.

¹⁶ Хүниие хардажа худалаар бү гэршэлэ.

¹⁷ Хүнэй гэр байра буляаха гэһэн хүсэлдэ бү абта, хүнэй һамганда, хүнэй богоол шэбэгшэндэ, сар элжэгэндэ, хүндэ байһан ямаршье юумэндэ бү һанаашарха.

¹⁸ Бүхы зон тэнгэриин дуу, сахилгаа, бүреэгэй һүрөөтэ абяа, утаа бааяһан хада хаража байба. Айн шэшэржэ, холохон болоод хаража байба.

¹⁹ – Мантай ши хөөрэлдэ, – гэбэ тэдэ Моисейдэ. – Бидэ шамайе шагнажа байхабди. Бурхан сэхэ бү хандаг, ами наһамнай бидэндэ хайратай.

²⁰ – Бү айгты, – гэжэ Моисей харюусаба. – Таанадай Бурханһаа айжа, нүгэл хэхэеэ болихын тулада, таанадые туршаха гэжэ Бурхан ерээл.

²¹ Зон холохон зогсобо, үүлэн манан соо бэеэ бэелһэн Бурханда гансал Моисей дүтэлбэ.

Хэлсээнэй бэшэг

²² Эзэн Моисейдэ айладаба: – Израилиин зондо хэлэ: «Хараба гүт, Би тэнгэриһээ таанадта хандабаб.

²³ Алта мүнгөөр бурханай хүрэг дархалжа, Минии хажууда табижа бү байгты.

²⁴ Шорой обоолжо, Намда зорюулһан үргэлэй шэрээ бодхоохош, тэндээ өөрын мал һүрэг сооһоо жэжэ томо малые түгэс шатаалта үргэл ба амгалан байдалай түлөө үргэл үргэдэг байхаш. Нэрэеэ соносхоһон алишье газартаа Би шамда ерэжэ, үреэлдэ хүртөөдэг байхаб.

²⁵ Шулуугаар үргэлэй шэрээ хэбэл, шулуугаа өөлэжэ хэмхэлжэ болохогүй. Өөлэхэдөө шулуу бузарлана гээшэш.

²⁶ Үргэлэй шэрээгэй үндэртэ табсан дээгүүр гаража бү байгаарай, эшэгүүри бузаршни үзэгдэжэ магад».