Египедһээ гаралга 2 - Библи

Моисейн мүндэлэлгэ

¹ Тэрэ сагта Левиин обогой нэгэ хүн обогойнгоо эхэнэрые һамган болгожо абаба ха.

² Һамганиинь хээлитэй болоод, хүбүү түрэжэ, һайхан байһыень хараад, гурбан һара соо нюугаад байба.

³ Гэбэшье саашадаа нюуха аргагүй болоходонь, хулһан арагта дабирхай түрхижэ, уһанда шэнгэхээр бэшэ болгоод, нялхаяа араг соо мансытайнь хэбтүүлжэ, голой эрьедэ хулһан соо табиба.

⁴ Нялхын эгэшэ юун бологшо ааб гэжэ холохонһоо адаглажа байба.

⁵ Фараоной басаган бэеэ угаахаяа голой эрьедэ шэбэгшэнэртэеэ хамта ерэбэ ха. Хулһан соо байһан араг үлгы обёорходоо, зараса басагаяа эльгээжэ асаруулба.

⁶ Нээжэ харахадань, нарай хүүгэн бархиржа байба. Фараоной басаган нялхые хайрлан энхэрбэ. Еврей үхибүүн гэжэ тэрэ ойлгоо.

⁷ Холохонһоо хаража байһан нялхын эгэшэ фараоной басаганда дүтэлжэ хэлэбэ: – Би ошожо, энэ нялхые хүхөөрөө танда тэнжээхэ эхэнэрые еврей эхэнэрнүүд сооһоо дуудажа асархам гү?

⁸ – Ошыш даа, ошо, – гэжэ фараоной басаган хэлэбэ. Басаган ошоходоо, хүүгэнэй эхыень дуудажа асарһаниинь тэрэ бэлэй.

⁹ Фараоной басаган ерэһэн һамганда иигэжэ хэлэбэ: – Энэ нялхые абажа, хүхөө хүхүүлэн намда тэнжээгыш, түлөөһэ үгэхэб. Тиигэжэ түрэһэн эхэнь нарай хүбүүе абажа тэжээбэ.

¹⁰ Хүбүүнэй томохон боложо хүдэржэхэдэ, эхэнь фараоной басаганда асарба. Фараоной басаган хүбүүе өөрын хүбүүн болгожо, «уһан сооһоо тэрэниие гаргажа абааб» гэжэ хэлэн, Моисей гэжэ нэрэ үгэбэ.

Моисейн Египедһээ тэрьедэлгэ

¹¹ Олохон жэл үнгэршэбэ, Моисей томо болоод байгаа. Нэгэтэ угайнгаа зондо тэрэ ошожо, гасаланта хүшэр ажалыень нюдөөрөө үзэбэ. Египедэй харуулшанай еврей хүниие сохижо байхыень хараба.

¹² Иишэ тиишээ хараашалаад, хүнэй үгы байхадань, тэрэ египет харуулшаниие алаад, элһэндэ булаба.

¹³ Үглөөдэрынь баһа ерэхэдэнь, еврей хоёр хүн наншалдажа байба. – Суг хажуудаш тулижа байһан хүниие харшалха ямар муу заяатай амитамши? – гэжэ Моисей сохигшодонь хэлэбэ.

¹⁴ – Хэн шамайе манай дээрэ ноён болгоо юм, зарга шиидхэгшээр табяа юм? Египедэй тэрэ хүниие алаһандаал адли намайе алахаяа һанаа гүш? – гэжэ тэрэ хүн урдаһаань һөөргэдэбэ. Тэрэ үйлэ хэрэгни мэдэгдээ гэжэ Моисей ойлгоходоо, айхын ехээр айба.

¹⁵ Энэ ушар тухай дуулаһан фараон Моисейе барижа саазалха гэһэн захиралта үгэбэ. Амияа аршалха гэжэ Моисей тэрьелхэдээ, мидиан угсаатанай газарта ошоо бэлэй. Тэндэхи нэгэ худагай хажууда амаржа һуухадань,

¹⁶ эсэгынгээ хонидые уһалха гэжэ уһаар тэбшэ дүүргэхэеэ мидиан угсаатанай санаартанай долоон басагад дүтэлжэ ерэбэ.

¹⁷ Худагта ерэһэн ондоо хонишод басагадые баһажа, худагта дүтэлүүлбэгүй. Моисей бодоод, басагадые үмөөрэн, хонидыень уһалжа үгэбэ.

¹⁸ Басагадай гэртээ бусахадань, Рэүһээл эсэгэнь асууба: – Басагадни, яагаа түргэн бусабат мүнөөдэр?

¹⁹ – Египедһээ ерэһэн нэгэ хүн маанадые хонишодой урда үмөөржэ, уһа удхаад, хонидыемнай уһалаал, – гэжэ тэдэ хөөрэбэ.

²⁰ – Алим тэрэ хүнтнай? Юундэ тэрэниие хээрэ орхёод ерэбэт? Дуудагтыл даа, эдеэлүүлэгты, – гэжэ тэрэ басагадтаа хэлэбэ.

²¹ Моисей тэрэ айлайда байха гэжэ шиидэбэ. Рэүһээл удангүй Циппоораа гэжэ басагаяа Моисейдэ хадамнаба.

²² Һамганайнгаа хүбүү түрэхэдэнь, «би хари газарта ерүүл хүн болооб» гэжэ хэлээд, хүбүүндээ Гэршоом гэжэ нэрэ үгэбэ.

²³ Удаахан саг үнгэрбэ, Египедэй хан түрые эзэлжэ байһан фараоншье нүгшэбэ. Хүшэр ажалда дарагдаһан израильшууд ёоложо, туһа эрижэ, Бурханаа дуудан байгаа. Тэдэнэй ёолоон Бурханда дуулдаба.

²⁴ Ёолооень соносоһон Бурхан Абраһаам, Исаак болон Яковтай хэлсээ баталһанаа һанаандаа оруулба.

²⁵ Тиин Израиль угсаатан тээшэ Бурхан харасаяа шэглүүлбэ, анхаралаа хандуулба.