Египедһээ гаралга 19 - Библи

Синай хадын хормойдо

¹ Египедһээ гараһанһаань хойшо гурбадахи һара эхилбэ. Тэдэ Синайн губида ерэжэ тогтобо.

² Рэпидиимһээ гаража, Израилиин арад зон Синайн губида ерээд, хадын хормойдо хотон хүреэнээр тогтобо.

³ Моисей Бурханда айладхал хэхэеэ хада өөдэ гараба. Эзэн хадаһаа тэрээндэ хандаба: – Яковай уг удамда, Израилиин зондо иигэжэ соносхо:

⁴ «Египедшүүдтэ хэһэн үйлыем хараба гээшэт. Бүргэдэй дали дээрэ һуулгаһандал шуумар ябуулжа, таанадые Өөртөө асарба гээшэб.

⁵ Үгыем дууладаг ба Намтай баталһан хэлсээе үнэн шударгыгаар сахибал, та бүгэдэ Минии эрдэниин сэнтэ баялиг, арадуудай дундаһаа Минии шэлэмэл гансал арад болохо зэргэтэйт. Газар дэлхэй гээшэ Минии юм,

⁶ харин таанад Минии санаартадай хаан түрэ, нангин арад болохо жэшээтэйт!» Эдэ үгэнүүдые Израилиин зондо дамжуулал даа.

⁷ Моисей бусажа, аха захашуулые суглуулба, Эзэнэй тэрээндэ захирһанай ёһоор, эдэ үгэнүүдые дамжуулба.

⁸ Арад зониинь нэгэ хүн шэнги харюусаа бэлэй: – Эзэнэй үгөөр лэ ябахабди! Зоной харюу Моисей Эзэндэ дамжуулба.

⁹ – Шамтай хөөрэлдэхыем зон шэхээрээ шагнажа, шамда этигэхын туладань үдхэн үүлэн соо бэеэ бэелжэ шамда ерэхэб, – гэжэ Эзэн Моисейдэ айладаба. Моисейн арад зоной харюуе Эзэндэ дамжуулхадань,

¹⁰ Эзэн Моисейдэ айладаба: – Арад угсаатандаа иигээд буса. Энэ үдэртөө, үглөөдэр бэеэ арюудхажа, хубсаһа хунараа угаагты гэжэ зонхило.

¹¹ Нүгөөдэрэй үйлэдэ бэеэ зэһэг: зоной хараһаар байтар Эзэн Синай хадын оройдо морилхонь гээшэ.

¹² Хадые тойруулан зурлаа хээд, тэрэ зурлааһаа сааша гэшхэхэгүй, хада өөдэ гарахагүй, хадын хормойдо хүлөө табихагүй гэһэн хорюул табяарай. Хадын ойро хүлөө табиһан хүн амяа хороолгохо.

¹³ Амииень хорооходоо, тэрэнэй бэедэнь дүтэлжэ болохогүй – бүреэгэй абяанай дуугаржа байхада шулуугаар шэдэжэ, али номо һуршаар харбажа алаха хэрэгтэй. Хада өөдэ гараха гэжэ һэдэһэн хадань, мал амитан, хүн болоно гү, хэншье һаань, тэрэниие амиды орхижо болохогүй.

¹⁴ Моисей хадаһаа буужа, бэеэ арюудхаха гэһэн зарлиг дамжуулба. Хүнүүд хубсаһа хунараа угаажа, бэеэ арюудхан һэргээбэ.

¹⁵ Моисей зондо хэлэбэ: – Нүгөөдэртэ бэлдэгты. Эхэнэртэй хурисахые зайлагты.

¹⁶ Гурбадахи үдэрынь эртэ үглөөнһөө тэнгэри дуугарба, сахилгаан сахилба, хадын орой үдхэн үүлэндэ хушагдаба. Бүреэгэй шанга абяанай соностоходо, зоной зосоо заригад гэбэ.

¹⁷ Хүреэһээ гаража, зоноо дахуулан, Моисей Бурханай урдаһаа ошобо. Хадын хормойдо тэдэ жагсаба.

¹⁸ Эзэнэй гал мэтээр буухада, Синай хада пеэшэн шэнги утаа гараад, доһолжо эхилбэ.

¹⁹ Бүреэгэй абяан улам шанга боложол байгаа. Моисейн дуугархада, Бурхан үүлэн сооһоо тэнгэриин дуугаар харюусаха юм.

²⁰ Эзэн Синай хадын оройдо буужа, Моисейе дуудаба. Моисей дээшээ гараба.

²¹ Эзэн Моисейдэ айладаба: – Эзэндэ дүтэлжэ, Тэрэниие харахамнай гэжэ бү оролдуужаг. Доошоо буугаад, зониие һэргылэн хэлэхэ болобош: үгыем дуулаагүй һаа, амияа хороолгохо.

²² Санаартад Эзэндэ дүтэлхэ гээ һаа, бэеын арюуниие нарин сахиха ёһотой. Үгы гэбэл, Эзэн тэдэниие баһал һүнөөхэ.

²³ – Синай хадын оройдо арад зон гарахагүй, – гэжэ Моисей Эзэндэ хэлэбэ. – Та маанадые һэргылээ ха юмта. Хадын хормойгоор хилэ табяад, нангин хада гэжэ үргэмжэлэн нэрлээб.

²⁴ – Яба доошоо, һөөргөө Аһароонтой бусахаш. Харин санаартад ба хара зон Эзэндэ ерэхэмнай гэжэ бү һэдэг. Һэдээ һаань, Эзэн тэдэниие һүнөөхэ, – гэжэ Эзэн Моисейдэ айладаба.

²⁵ Моисей доошоо зон тээшэ буужа, энэ айладхалыень дуулгаба.