Египедһээ гаралга 17 - Библи

Рэпидиим хабсагайһаа гараһан уһан

¹ Сиин губиһаа саашаа ябахадаа, Израилиин зоной бүлэг Эзэнэй заабаряар холо ябангүй тогтодог һэн. Рэпидиим гэжэ газарта тогтобо. Тэндэнь ууха уһанай байхагүйдэ,

² улад зон үнөөхил Моисейе гэмнэжэ эхилээ һааб даа. – Уһа оложо үгыш манда, ундамнай хүрэхэдэнь яаха зонбибди? – гэжэ гэмэр гутар гэлдэбэ. – Уһанай үгыдэ би яахабиб? – гэбэ Моисей. – Эзэнээл туршана гээшэт.

³ Ангаһан зон Моисейһээ һалаха юм бэшэл даа: – Бидэниие юундэ Египедһээ гаргаабши? Үхи хүүгэдтэеэ, үхэр малтайгаа ангажа үхэхымнай гү?

⁴ Сүхэрһэн Моисей Эзэнһээ: – Арад зоноо яаха хээхэмниб? Эдэш удахагүй намайе шулуугаар шэдэжэ алахань лэ, – гэжэ һураба.

⁵ – Зоной урда гара. Израилиин нэгэ хэды аха заха зон шамтай ябуужаг. Нил мүрэнэй уһа сохигшо дулдыгаа абаарай, тиигээд яба.

⁶ Тэндэ, Хорээб хада дээрэ, Би урдаш хабсагай дээрэ байлсахаб. Хабсагай ёборходош уһан дэлбэрэн гараха. Зон уһа уужа садаха, – гэжэ Эзэн Моисейе зонхилбо. Моисей айладхалыень Израилиин ахамад тэргүүтэнэй хараһаар байтар бүтээбэ.

⁷ Тэрэ газар Массаа ба Мэрибаа гэжэ нэрлэгдээ бэлэй, юуб гэхэдэ, тэндэ Израиль угсаатан «Эзэн мантай гү, али бэшэ гү?» гэлдэн, Эзэниие зэмэлһэн, тэсэбэрииень туршаһан гэхэ.

Амалээгтэй байлдаан

⁸ Рэпидиимдэ байхадань, амалээг угсаатан ерэжэ добтолбо.

⁹ – Амалээг угсаатантай тулалдаха зониие шэлэн аба. Харин би Бурханай дулды гартаа барижа, үндэрэй оройдо зогсохоб, – гэжэ Моисей Иисүүс туһалагшадаа хэлэбэ.

¹⁰ Нүүнэй хүбүүн Иисүүс Моисейн захиралта дүүргэжэ, амалээг зонтой тулалдаанда зоноо дахуулан оробо. Моисей хадаа Аһароон Хуур хоёртой хамта гүбээгэй оройдо гараба.

¹¹ Моисейн гараа үргэхэдэнь, Израиль илажа захалха юм, гараа доошоо буулгахадань, амалээг дайсан булижа байба.

¹² Эсэһэн Моисейн гараа үргэхэнь хүндэ болобо. Хажуудань шулуу асаржа табибад. Моисей шулуун дээрэ һууба, Аһароон ба Хуур хоёр талаһаа гарынь дүнгэлсэбэ. Наранай оротор Моисейн гарнууд үргэгдэнхэй байба

¹³ – Нүүнэй хүбүүн Иисүүс амалээг угсаатанай сэрэгые булиһаар булижа, бултыень һэлмээр хюдаа агша.

¹⁴ Эзэн Моисейдэ иигэжэ зарлигтаба: – Хуйламал бэшэгтэ дурасхаал болгон бэшээд, Иисүүстэ соносхоорой: Амалээгые газарай нюрууһаа Би огтолон һалгахаб – нэрэньшье үлэхэгүй!

¹⁵ Моисей үргэлэй шэрээ бодхоожо, «Эзэн – минии туг» гэжэ нэрлэбэ.

¹⁶ – Энэ хадаа «Эзэнэй туг гартамнай! Эзэн амалээгтэй үеһөө үедэ дайлалдаха!» гэһэн удхатай, – гэжэ тэрэ хэлээ һэн.