Египедһээ гаралга 16 - Библи

Сагаан будаа ба бүднэ шубууд

¹ Элиимһээ Синай тээшэ зориходоо, Израиль угсаатан тэдэ хоёрой хоорондо байдаг Сиин губида ерэбэ. Египедһээ гараһан сагһаа хойшо хоёрдохи һарын арбан табанай үдэр бэлэй.

² Губида байхадаа, Израилиин хүбүүд Моисей Аһароон хоёрто гэмэрэлдэжэ эхилбэ.

³ – Египедтэ Эзэнэй гарһаа үхөө һаамнай дээрэ һэн ха, – гэлдэбэ. – Тэндэ мяхатай тогоо тойроод һуугша һэмди, дуран соогоо талха эдигшэ бэлэйбди. Арад зоноо үлэсхэлэндэ дайруулжа үхүүлхэ гэжэ энэ сүл губида асарба гүт?

⁴ Эзэн Моисейдэ айладаба: – Би таанадта бороогой ороһон шэнгеэр огторгойһоо талха оруулхаб. Үдэр бүри зон гаража, үдэрэйнгөө эдихэ хоол суглуулдаг байха. Минии тогтооһон эрилтэ байха, тэрэниие сахина гү гэжэ Би Өөрөө хинахаб.

⁵ Долоон хоногой зургаадахи үдэртэнь урда үдэрһөө хоёр дахин ехые суглуулһанаа тэдэ хараха.

⁶ Моисей ба Аһароон Израилиин хүбүүдтэ хэлэбэ: – Египедһээ таниие Эзэн дахуулан гаргаа гэжэ энэ үдэшэндөө ойлгохот.

⁷ Үглөөдэр үглөөгүүр Эзэнэй һүр соло харахат. Юуб гэхэдэ, таанадай гэмэрэлдээн Тэрээндэ дуулдаба. Харин бидэ хэн гээшэбибди? Юундэ манда гэмэрхэ болобот?

⁸ – Үдэшэндөө Эзэн мяха үршөөхэ, харин үглөөдэр садатараа хилээмэ эдихэт. Юуб гэхэдэ, танай гэмэрэлдээе Тэрэ дуулаа. Харин бидэ хэн гээшэбибди? Маанадые бэшэ, Эзэниие муушална гээшэт, – гэжэ Моисей хэлэбэ.

⁹ – Израилиин ниигэмые Эзэнэй урда зогсохо гэжэ зонхило. Юуб гэхэдэ, тэдэнэй гэмэрэлдээн Тэрээндэ дуулдаа, – гэжэ Моисей Аһароондо хэлэбэ.

¹⁰ Эдэ үгэнүүдые Аһарооной Израилиин зондо дамжуулхадань, тэдэ губи тээшэ харасаа шэглүүлбэ. Тэндэхи зэрэлгээтэ огторгойдо Эзэнэй һүр һүлдэ үүлэн түхэлөөр үзэгдөө һэн.

¹¹ Эзэн Моисейдэ айладаба:

¹² – Би Израиль угсаатанай гэмэрэлдээ сонособоб. Тэдээндэ иигэжэ хэлэ: «Үдэшэндөө мяха, үглөөдэрынь садатараа талха хилээмэ эдихэт. Таанадай Бурхан болодог Эзэн гэжэ тиихэдэ мэдэхэт».

¹³ Үдэшэлэн тоогүй олон бүднэ шубууд ниидэжэ ерэбэ. Зоной тогтоһон хүреэн соогуур дүүрэн шубуун бии болобо. Үглөөгүүр хүреэень тойроод шүүдэр унаһан байба.

¹⁴ Шүүдэрэй хатахада, губида хюруу унаһан шэнги, гэшхэхэдэ шар-шар гэһэн нимгэхэн сэн бун газар хушаһан байба.

¹⁵ Израилиин хүбүүд ойлгожо ядан, бэе бэеһээ энэ юун гээшэб гэжэ асуужа байба. Моисей хэлэбэ: – Таанадай эдихэ будаа Эзэн үршөөбэ гээшэ.

¹⁶ Гэбэшье заабаритай байха: үлүү хомхойронгүй, хүн бүхэнэй үдэр соол эдихэ зэргээр суглуулха шухала гээд Эзэн айладхаа.

¹⁷ Израиль угсаатан хэлэһээрнь болоо бэлэй. Шадаха зэргээрээ – хэн ехые, хэн багые – будаа суглуулба,

¹⁸ харин гайха ехэ, суглуулһанаа хэмжэхэдэнь, ехые суглуулһан хүн үлүү юумэгүй байгаа, багые суглуулһан хүн дутагдалгүй байгаа. Бүлэ бүхэндэ хэрэгтэй хэмжээн лэ сугларһан байба.

¹⁹ – Суглуулһанаа үглөө эдихэбди гэжэ орхижо бү байгаарайгты, – гэжэ Моисей заабарилба.

²⁰ Үгыень дуулаагүй заримашуул олдоол һааб даа. Будаа үлээжэ, үглөө болотор орхиходонь, будаадань хорхой бии болоһон байба. Моисей тэдээндэ ехэтэ уурлаба.

²¹ Үглөө бүри гэр бүлэдөө хүрэхэ хэмжээгээл зон суглуулдаг болобо. Суглуулаагүй будаань үдэрэй наранда хайлашаха юм.

²² Зургаадахи үдэртөө хоёр дахин ехэ хэмжээнэй сагаан будаа суглуулба. Энээн тухай удамаршад Моисейдэ дуулгаба.

²³ – Эзэн энээн тухай айладаа агша һэн. Үглөө ажал хэхэгүй амарха үдэр, Эзэнэй табиһан нангин үдэр суббото мүн болоно. Дуратайгаа жэгнэгты, дуратайгаа шанагты, үлэһыень үглөө болотор орхиходош хамаагүй, – гэжэ Моисей хэлэбэ.

²⁴ Моисейн зүбшөөһөөр, зон үлүү эдеэгээ үглөө болотор үлөөбэ һэн ха. Тэрэнь гутабагүй, хорхой бии болобогүй.

²⁵ – Энээнээ мүнөөдэр эдигты. Энэ үдэр хадаа Эзэнэй табиһан нангин гараг гээшэ, газарта юушье олохогүйт.

²⁶ Зургаан үдэр суглуулдаг байхат. Долоодохи үдэртэ Бурханай табиһан субботодо юумэ олохогүйт, – гэбэ Моисей.

²⁷ Зарим зоной долоодохи үдэртэ баһал суглуулха һанаатай гарахадань, юуншье олдобогүй.

²⁸ Эзэн Моисейдэ иигэжэ айладаба: – Хэзээ болотор Минии тогтооһон тогтоол, хуулинуудые эбдэхэбта?

²⁹ Ойлгоногүй аалта: Би, Эзэн, гараг тогтоогооб, тиимэһээ зургаадахи үдэртэнь хоёр үдэрэй эдеэ үгэнэб. Субботодо хүн бүхэн гэртээ һууха, хайшаашье гараха ёһогүй.

³⁰ Израиль угсаатан гарагай долоондо гэртээ һуужа амардаг болобо.

³¹ Эзэнэй үгэһэн сагаан будаань халуун үбһэнэй үрэһэн шэнги аад, бал тоһотой боорсогой амтатай байгаа һэн. Тэрэниие израильшууд манна гэжэ нэрлээ.

³² Моисей иигэжэ хэлэбэ: – Эзэн иигэжэ зарлигтаа: үдэр соо нэгэ хүнэй эдихэ хэмжээнэй сагаан будаа үеһөө үедэ дурасхаал болгон хадагалагдажа байха зэргэтэй. Египедһээ сүл губида ерээд үлэн хооһон зобожо байхадатнай, Эзэнэй үгэһэн эдишые хүн бүхэн үзэжэ байг.

³³ – Алтан домбо соо нэгэ хоомэр сагаан будаа хээд, Эзэнэй урда таби, үеһөө үедэ хадагалагдажа байха зэргэтэй, – гэжэ Моисей Аһароондо хэлэбэ.

³⁴ Эзэнэй Моисейдэ захирһаарнь, Аһароон Хэлсээнэй ханзын хажууда амһарта соо сагаан будаа хадагаламжада табиба.

³⁵ Израиль угсаатан Бурханай зааһан нютагта ерэтэрээ, Ханаһаан нютагай хилэ гаталтараа дүшэн жэлэй туршада сагаан будаагаар хоолложо ябаа гэдэг.

³⁶ Хоомэр гээшэнь нэгэ хүниие садхааха гурилай хэмжээн гэхэ гү, али эфаагай арбанай нэгэ хуби болоно.